1 Ke afo, Abọọñ, ke ami ndịbe,

kuuyak ami ndia abuud.

2 Dat adinenido mfo ñnyaaña miin nyʌñ nam ami mbọkkọ;

kpañ utọñ mfo nnọ miin nyʌñ ñnyaaña miin.

3 Do itiad udịbe mmi,

itie ake ami ñkemeke adika afịd ini;

nọ ewʌhọ nọ eñnyaaña miin,

sia afo ado ekamba itiad mmi ye itie ubọkkọ mmi.

4 Abasi mmi, ñnyaaña miin sio ke ubọk mbon ibak,

nsio ke ubọk ndiọi awo ye mbon unana esịd mbọm.

5 Sia afo amaado idodanyen mmi, Abọọñ Andikara,

nsọọñidem mmi tọọñọ ke uyịn.

6 Ami mbuọt idem ke afo tọọñọ ke emana mmi;

afo akensio miin ke esịd idịb eka mmi.

Ami ñyautooro fiin ke nsi-nsi.

7 Ami mmekappa ndo ñkpọ idiọọñọ nnọ uwak awo,

afo ado akpọsọñ itie udịbe mmi.

8 Inua mmi ayọhọ ye itooro mfo,

ami ñyaatañ anwa-anwa mbaña uyai mfo afịd usen.

9 Kunsaana miin uyaak ke ini usọñ mmi;

kuñkpọñ miin ke ini inweek mmi akweeñeke.

10 Sia mme asua mmi itañña eti imbaña miin;

mbon se itie ibet adiñwot miin edʌk adu.

11 Ammọ ete, "Abasi amaasịn anye;

bịne nyʌñ mʌm anye,

sia ibaaha awo se idiinyaaña anye."

12 Abasi mmi, kuñkpọñ miin unyọọñ usʌñ;

Abasi, sọp di, di ñnyaaña miin

13 Yak mbon se indot miin uyio etak ke abuud;

yak mbon eyemme adinnam miin ibak

eyọhọ ye ndọk ye asuenne.

14 Amaado ami, ñyaanie idodanyen afịd ini;

ami ñyaakaaka iso utooro fiin.

15 Inua mmi ayaabʌk mme ndinen ido mfo,

mme utom adinyaaña mfo afịd usen,

akpesʌkado ami ndiidiọọñọke naña ñkpebʌk afịd ammọ.

16 Abọọñ Andikara, ami ñyaadi ndikwọrọ mme ikpọ adinam mfo.

Ami ñyaakwọrọ mme ndinen adinam mfo, ake mfo ikpọọñ.

17 O Abasi, tọọñọ ke uyịn mmi, afo ameñkpeep miin,

ñko tutu usen mfịn ami ntañ anwa-anwa mbaña mme utịppe adinam mfo.

18 Akpọkọm ke ini usọñ mmi ye iwad,

Abasi mmi, kuñkpọñ miin,

tutu ami mbʌk mbaña adudu mfo nnọ emana mfen,

mme ikpọ adinam mfo nnọ mbon se idiidi ke ini iso.

19 O Abasi, adinenido mfo, a-asịm mme hefịn,

afo a-anamma mme ikpọ ñkpọ

Anie ubit fiin, O Abasi?

20 Akpesʌkado afo anamma yak ami ñkịt mme mfịna,

uwak ye idod,

afo ayaamaana anam nọ ami ndu uwem;

afo ayansio miin ke udem esịd isọñ

a-amaana amben miin adi abod.

21 Afo ayaadian ukpono annọ miin

anyʌñ andọñ miin esịd ini keed mfen.

22 Ami ñyautooro fiin ke ekpa

ke ntak akpanikọ mfo, Abasi mmi;

Ami ñyaakwọ itooro unọ fiin ke ndidoudʌk,

Adisana Abasi Isrel.

23 Ñkpọkinua mmi ayaabọñ ñkpo idaara

ke ini ami ñkwọọhọ itooro unọ fiin,

ami ake afo anyaañake.

24 Edeme mmi ayaabʌk mme ndinen adinam mfo

ke afịd usen,

sia mbon se ikiyem adinnọmọ miin

ekappa ekịt abuud mme ndutịme.