1 O Abasi ñnyịn, itooro unie fiin, ke Saiyọn;

ñnyịn iyaisioño mme akaaña añnyịn ikinamma ye afo.

2 Sia afo adooho Abasi a-akoppo akam;

afịd awo eyaedi ubịne fiin.

3 Ke ini mme idiọọkñkpọ ñnyịn ekisịne ñnyịn ukad

afo akefeen mme ndudue ñnyịn.

4 Afọfọn anọ mbon ake afo amekke

anyʌñ aben akpere nọ edi edidʌñ ke mme akwere mfo!

Mme nti ñkpọ ufọk mfo iyʌkkọ ñnyịn,

ye ake adisana tembịd mfo.

5 Afo ibọọrọ ñnyịn ke uteeñe ye mme ndisana edinam,

Abasi Andinyaaña ñnyịn,

idodanyen afịd iso isọñ,

ye ake mme ñnyọọññkan akpainyañ,

6 afo a-akebotto mme ikpọabod ke adudu mfo,

akedatta adudu abana idem mfo

7 akenamma uyom inyañ adobo,

uyom mme mbufịd inyañ,

ye uyom mfịna mme idịd.

8 Afịd ekondo ayọhọ ye uteeñe ke mme utịppeñkpọ mfo;

naña ayio asiere ye naña ndubiayio asuuhọ ke ekịm,

afo anam mme ikwọ idaara eba.

9 Afo amaakere abaña isọñ anyʌñ anọ anye mmọọñ;

anam anye anwịm uwak mfịd.

Mme idịm Abasi eyọhọ ye mmọọñ

nọ anam abakpa anwịm anọ mme awo,

sia naña afo akeyem aba adodo.

10 Afo amedọk isọñ utọinwañ anyʌñ aneeñe mme ebono amọ;

amenam anye amem ke adiduọk mmọọñ anyʌñ adiọñ mme mfịd amọ;

11 Afo amaaben akwa mfọn mfo adiọñ isua

mme ukpad mbiomo mfo eyọhọ ye uwak inie.

12 Mbid isọñ anaan afịd aboiyo adaña;

mme ntək abod eyọhọ ye idadesịd.

13 Mme ufene ewak eyọhọ mme inwañ mbid

abakpa enwịm eyọhọ mme abedeñ;

ammọ esio ñkpo idaara enyʌñ ekwọ ikwọ.