1 Ami ntua nseeme nnọ Abọọñ;

ami ndịppe uyio mmi nnọ Abọọñ ñyem mbọm.

2 Ami ñnwañña aseeme mmi nnọ anye;

ke iso amọ ke ami ntañ mfịna mmi.

3 Ke ini sịbidịd amemme ke idem mmi,

ado afo akpeme usʌñ mmi.

Ke afañ ake ami nsañake

mme awo edịp afia ennọ miin.

4 Se nyʌñ kịt, ke awo ndomokeed ibaaha ke ubọk nnasia mmi;

ibaaha awo se ikere ñkpọ imbaña miin.

Ami nnieghe itie udịbe;

ibaaha awo ndomokeed se ise ñkpọ ibaña uwem mmi.

5 Abọọñ, ami nseeme unọ fiin;

Ami mbo ke "afo ado itie udịbe mmi,

udeeme mmi ke isọñ mme aduuwem."

6 Kop ntuaayịd mmi,

sia ami mmenekke ñyem unwam;

ñnyaaña miin sio ke ubọk mbon se imbịne miin,

sia ammọ esọñ adudu eti-eti eñkan miin.

7 Ñnyaaña miin sio ke ñkpakọb mmi,

nọ ami ntooro anyịñ mfo.

Ndin mme ndinen awo eyaeboho ke ntak mmi

sia afo amefọn ye ami.