1 Ami ñyaukpono fiin, Abasi ye Adidem mmi;

ami ñyaatooro anyịñ mfo ke nsi-nsi nsi-nsi.

2 Afịd usen ami ñyautooro fiin

ñnyʌñ ndịppe anyịñ mfo ke nsi-nsi.

3 Abọọñ akpon anyʌñ adot se etooro;

ikanna inwaña awo naña anye akpon.

4 Emana keed etañ utom mfo enọ emana mfen;

ammọ etañ ebaña mme ikpọ ñkpọ se afo anam.

5 Ammọ etañ ebaña uyai ubọọñ ubom mfo,

ñko ami ñyaakere mbana mme utịppe utom mfo.

6 Ammọ etañ ebaña adudu uwak ñkpọ ndịk mfo,

ami ñyaabʌk mbaña mme ikpọ adinam mfo.

7 Ammọ enam idaara ebaña uwak mfọn mfo

enyʌñ ekwọ adinenido mfo ke idaara.

8 Abọọñ anie esịd mfọn ye mbọm,

isọppọ iyadesịd, ayọhọ ye ima.

9 Abọọñ afọn ye afịd awo;

anye anie mbọm abaña afịd se anye akebot.

10 Abọọñ, afịd utom mfo utooro fiin;

mbon akpanikọ mfo ukpono fiin.

11 Ammọ ebʌk ubọọñ itie idʌñ mfo

enyʌñ etañ ebaña adudu mfo,

12 nọ afịd awo ediọọñọ ebaña mme ikpọ adinam mfo

ye ubọọñ uyai ebekpo mfo.

13 Ebekpo mfo ado nsi-nsi ebekpo,

ukara mfo ado ke afịd emana.

Abọọñ ke afịd enwọñọ amọ adot se ebuọt idem

ñko anye anam akpanikọ ke afịd se anye anam.

14 Abọọñ amʌm afịd mbon e-eduọhọ

anyʌñ adịppe afịd mbon e-enʌhọke.

15 Anyen afịd awo use fiin,

ñko afo anọ ammọ ndidia ke akem ini.

16 Afo atat ubọk mfo

anyʌñ anọ afịd mme aduuwem udọñ esịd ammọ.

17 Abọọñ ado adinen ke afịd usʌñ amọ

ñko anam akpanikọ ke afịd se anye anam.

18 Abọọñ akpere afịd mbon e-ekoodo anye,

afịd mbon e-ekoodo anye ke akpanikọ.

19 Anye anam udọñ mbon se ibaak anye;

anye akop ntuaña ammọ anyʌñ anyaaña ammọ.

20 Abọọñ akpeme afịd mbon e-emaaha anye,

ado anye ayaasobo mbon ibak.

21 Inua mmi ayaatañ itooro abaña Abọọñ.

Yak afịd se ebot etooro adisana anyịñ amọ

ke nsi-nsi nsi-nsi.