1 Abọọñ Abasi, afo ado itieidʌñ ñnyịn

ke afịd emana.

2 Mbemiso mme abod ekebañña

me afo umuukubotto afịd ekondo diin,

tọọñọ ke nsi-nsi tutu asịm ke nsi-nsi afo ado Abasi.

3 Afo a-anam mbon awo etịmme enyọñ ke ntọñ,

ke adibo, "Etịmme enyọñ ke ntọñ, ndufo ubon awo."

4 Tọsịn isua ke iso mfo

etie nte usen keed aboiyo afep,

me nte ukpeme akonayio keed.

5 Ado afo akwọọk mme awo aduọọk ke idab ñkpa,

ammọ eba nte ufa mbid ake ubakusen:

6 Anye atịppe akọt ufa ke ubakusen,

ado asaat anyʌñ ayeppe ke ndubiayio.

7 Iyadesịd mfo ikan ñnyịn ubọk

ndịk anyʌñ imʌm ñnyịn ato ifịdesịd mfo.

8 Afo amaaben mme ukwaññkpọ ñnyịn anịm ke iso mfo,

amaanịm mme ndịbe ndiọiñkpọ ñnyịn anwa-anwa ke iso mfo.

9 Afịd usen uwem ñnyịn aboiyo ke ifiobesịd mfo;

utịd uwem ñnyịn ado ke mmịm.

10 Mme usen uwem ñnyịn akeme iwuọ isua ata mme duob,

me anaañ, udịd ñnyịn akpeben;

kpayeado uwak ini mme isua ami eyọhọ ye mfịna ye mfʌhọ,

sia ammọ eboiyo ke usọp, ndin ñnyịn inyọñ.

11 Akpekapado ñnyịn imidiọọñọ adudu iyadesịd mfo!

Ifiobesịd mfo akpon nte uteeñe a-adotto ye afo.

12 Ikpeep ñnyịn adibat mme usen ñnyịn,

nọ ñnyịn inie esịd aniọñ.

13 Suuhọ esịd, Abọọñ! Adiikpeene die?

Tua ikọd mfo mbọm.

14 Bak nam nsọọñọnda ima mfo iyʌkkọ ñnyịn ke ubakusen,

nọ ñnyịn ikwọ idaara inyʌñ inem esịd ke afịd usen uwem ñnyịn.

15 Nam yak usen inemesịd ñnyịn awak nte afịd mme usen ake afo akikuudo ñnyịn,

yak awak nte mme isua ake ñnyịn ikikịtte mfịna.

16 Nam ikọd mfo ekịt mme adinam mfo,

nam nditọ ammọ ekịt uyai mfo.

17 Yak mfọn Abọọñ Abasi ñnyịn idodo ñnyịn ke idem;

nam utom se ubọk ñnyịn anam asọọñọ ada inọ ñnyịn,

ii, nam utom se ubọk ñnyịn anam asọọñọ ada.