1 Abọọñ akara,

yak mme idịd enyeñ idem;

anye atie ke ebekpo amọ ke atu mme serubim,

yak isọñ anyeeñe.

2 Abọọñ akpon ke Saiyọn;

anye akoñ akan ke afịd mme idịd.

3 Yak ammọ etooro ekandịk uteeñe anyịñ mfo;

anye ado adisana.

4 Adidem akpon, anye ama unen,

afo amewuuk se ido adinen

afo amenam anọ Yekọb,

se inen inyʌñ ifọn.

5 Ndufo itooro Abọọñ Abasi ñnyịn

inyʌñ ikpono anye ke itie udodukod amọ;

anye ado adisana.

6 Moses mme Erọn ekeba ke atu mme aku amọ,

Samwel akedo keed ke atu mbon se ikikoot anyịñ amọ;

ammọ emaeseeme ekoot anyịñ Abọọñ

ndin anye amaabọọrọ ammọ.

7 Anye aketañ ikọ ye ammọ ke abai ntọñanyọñ;

ammọ emaenịm mme mbed ye ewʌhọ se anye akenọọ ammọ.

8 Abọọñ Abasi ñnyịn,

afo akebọọrọ ammọ;

afo akedo Abasi a-afeene anọ Isrel,

akpesʌkado afo akemiaha ammọ ufen ke ukwañido ammọ.

9 Itooro Abọọñ Abasi ñnyịn

inyʌñ ikpono anye ke adisana abod amọ,

sia Abọọñ Abasi ñnyịn ado adisana.