1 Afọfọn anọ mbon e-ekereke ñkpọ ebaña mbon unana;

Abọọñ anam ammọ ebọkkọ ke ini nnananyen.

2 Abọọñ akpeme anyʌñ anịm ammọ uwem,

ebat ammọ esịn ke atu mbon se ikịt unen ke isọñ;

anye iyakka ammọ inọ udọñ esịd mme asua ammọ.

3 Abọọñ amʌm ammọ akama ke nnaa udọñọ

anyʌñ akọk ammọ udọñọ.

4 Ami mmaabo, "Ntua miin mbọm, Abọọñ;

ñkọk udọñọ, sia ami mmenam idiọọkñkpọ ke iso mfo."

5 Mme asua mmi etañ embaña ke idiọọkesịd ete,

"Ini akee ke anye adiikpa nọ anyịñ amọ asop?"

6 Keed ke atu ammọ amaadi adinse,

anye asʌhọ nsu, ke ini esịd amọ akereke ibak

ndin amaawuọ anye aketañ asaña ke esiin.

7 Afịd mme asua mmi edọñọ adu embaña miin;

ammọ ekere idiọọk embaña miin, ete,

8 "Ataa idiọọk udọñọ amʌm anye;

anye idiidakkake ida aba ke itie a-anye anaaha do."

9 Idem akpan ufan mmi,

awo a-ami ñkenieghe mbuọdidem ke idem amọ,

a-akewanake ubọk ndidia ye ami,

akanna ada añnwana miin.

10 Ado nie mbọm mbaña miin, Abọọñ;

mbenne miin, nọ ato do nsio ammọ usiene

11 Mmediọọñọ ke amenem esịd ye ami,

sia asua mmi iñkanna miin.

12 Ke ntak mfọnmma mmi afo ammʌm miin akama

anyʌñ amben miin anịm ke iso mfo ke nsi-nsi.

13 Itooro anie Abọọñ, Abasi Isrel,

ke nsi-nsi tutu ke nsi-nsi.

Amen ye Amen.