1 Kpa naña ebed anweek ayem idịm mmọọñ,

ntoro ke ukpọñ mmi anweek uyem fiin, Abasi mmi.

2 Ukpọñ mmi akop nsaditọñ ayem Abasi, ayem aduuwem Abasi.

Ini akee ke ami ñkeme adika ñkesoobo ye Abasi?

3 Mmọọñayịd mmi ado ndidia mmi

uweemeayio ye akonayio,

ke ini mme awo ekaaha iso embo miin,

"Mmọ Abasi mfo?"

4 Ami mmetoiyo mme ñkpọ ami

nte ñnwaññake ukpọñ mmi:

naña ñkesika ufọk Abasi

ke idak ukpeme Ataa Akpọsọñ

ye ñkpo idaara ye itooro

ke atu akwa udịm mme anam usọrọ.

5 Ukpọñ mmi, nsoo inam nọ afo afʌhọ?

Nsoo inam afo antịmede ke esịd idem?

Dot anyen ke Abasi,

ke ñyaasʌk ntooro anye,

Andinyaaña mmi ye Abasi mmi.

6 Ukpọñ mmi afʌhọ ke esịd idem mmi;

ke ntoro ami ñyaatoiyo Abasi

tọọñọ ke isọñ Yọdan,

mme abod Hemọn, ato ke Abod Misaa.

7 Udem akoot udem

ke uyom mme uduọmmọọñ mfo;

afịd mbufịd mmọọñ ye ubiọọñọ mmọọñ

emfʌk miin.

8 Ke uweemeayio Abọọñ awuuk ima amọ,

ke akonayio ikwọ amọ aba ye ami,

mbọñ akam nnọ Abasi uwem mmi.

9 Ami mbo Abasi a-adooho Itiad mmi,

"Nsoo inam afo amfre miin?

Ntaha a-anaaha ami nsaña mfʌhọ,

asua amfiik-e?"

10 Mme akpọ mmi ebọ akpọsọñ ubiak

nte mme asua mmi enduọiyọ miin,

esʌk ekaiso embo miin afịd ini,

"Anye Abasi mfo-o?"

11 Ukpọñ mmi, nsoo inam nọ afo afʌhọ?

Nsoo inam afo antịmede ke esịd idem?

Dot anyen ke Abasi,

ke ñyaasʌk ntooro anye,

Andinyaaña mmi ye Abasi mmi.