1 Afọfọn anọ awo

e-efeene mme ukwañido amọ,

e-enyʌññọ efʌk ndiọiñkpọ amọ.

2 Afọfọn anọ awo

ake Abọọñ imiibatta idiọọkñkpọ amọ inọ anye

a-abiaña imiinyʌññọ iba ke sịbidịd amọ.

3 Ke ini ami ñkedoppo uyio,

mme akpọ mmi emaeyeeme

ato ntuaña mmi ke afịd usen.

4 Sia uweemeayio ye akonayio

ubọk mfo amandoro miin ke idem;

udịd amañkweeñe

nte ufiob a-awuọhọ ke ini ndaayio.

5 Ndin ami mmaaben idiọọkñkpọ mmi unịm fiin ke iso

ñnyʌññọ mfʌk mme ukwaññkpọ mmi.

Ami mmaabo nte, "Ami ñyaayaara

mme ndudue mmi nnọ Abọọñ."

Ndin afo amaafeen

mme ndudue mmi.

6 Ke ntoro yak mme andunịm fiin ke akpanikọ ebọñ akam unọ fiin

ke ini eduukịt fiin;

ke akpanikọ mbufịd ñkpoon mmọọñ

idiisịmme ammọ.

7 Afo ado itie udịbe mmi;

afo ayañkpeme miin asio ke mfịna

anyʌñ adat ikwọ ubọkkọ añkanna miin akʌk.

8 Ami ñyautemme ñnyʌñ ukpeep fiin usʌñ a-anaaha afo asaña;

ami ñyaunọ fiin item ñnyʌñ ntịñ anyen use fiin ye anyen ima mmi.

9 Kuuba nte enañmbakara me ñwaahadọñki,

ake adiinieghe ifiọk

a-anaaha esịn ammọ ukwak ye udʌk ke mbañ

imiidooho ntoro ammọ isañake ubịne.

10 Ukuud a-akeeneke mbon ibak ewak,

ado ima Abọọñ ake imiikpuuho

akanna awo se inie mbuọdidem ke anye akʌk.

11 Idaara ke Abọọñ inyʌñ inem esịd, ndufo mme ndinen awo;

ikwọ, afịd ndufo e-enieghe nti esịd!