Mme Saam 53

Ake etubom ikwọ. Asañake akekem ye Mahalad. Saam maskil ake Defid.

Baaba Awo Ndomokeed Ikemeke Adisịn Abasi

1 Ndisịme awo abo ke esịd ammọ ate,

"Abasi ibaaha."

Ammọ edoñño mbon ñwo, usʌñ ammọ anyʌñ ado ndiọi;

ibaaha awo ndomokeed se inam eti ido.

2 Abasi atie ke anyọñ asuuk anyen ase ubon awo

me ayaakịt awo ndomokeed

se inie ifiọk,

ndomokeed se iyem Abasi.

3 Afịd ammọ ekpọñ usʌñ, afịd ammọ ekappa mbubịk;

ibaaha awo ndomokeed se inam eti ñkpọ,

ibaaha awo ndomokeed.

4 Afịd mme anamidiọọk ami isʌkkọ idiọọñọ ñkpọ ndomokeed?

Ammọ eta ikọd mmi nte eta uyo;

akenam ammọ iseemeke ikoot Abasi.

5 Ado se ammọ do, eba ke akpọsọñ ndịk,

akpesʌkado ñkpọ ndịk imiikibaaha.

Abasi amaasuan mme akpọ mbon se ikinwana ye afo;

afo amaanam abuud amʌm ammọ, sia Abasi amaasịn ammọ ke ndek.

6 O, ubaha nte adinyaaña Isrel akpetooho Saiyọn adi!

Ke ini Abasi amaanake aben ikọd amọ ake emaekesuan atịmme adi,

yak Yekọb adaara Isrel anyʌñ anem esịd!