1 Kuufịna idem mfo ubaña mme abʌd-abʌd awo

kuunyʌñ ufịbe mbon se inam idiọọk;

2 sia ikpeeneke ammọ eyaeyeppe nte mbid,

eyaesọp ekpañña nte awawa mfañ.

3 Nie mbuọdidem ke Abọọñ nyʌñ nam se ifọn;

dʌñ ke isọñ nyʌñ kop inem ifuuro Abasi.

4 Nem esịd ke Abọọñ,

ndin anye ayaunọ fiin mme udọñ esịd mfo.

5 Yaak usʌñ mfo nọ Abọọñ;

buọt idem ke anye, ke anye ayaanam ami:

6 Anye ayaanam eti utịb mfo ayamma nte usiere,

unen mfo ayamma nte utịn ufọọd uweemeayio.

7 Ba ke ndobuyio ke iso Abọọñ

nyʌñ bet anye ke ime;

kuufịna idem mfo ubaña mbon e-eforoke ke usʌñ ammọ,

ke ini ammọ enamma ibak ñkara ammọ.

8 Tre iyadesịd nyʌñ kpọñ ifiobesịd;

kuufịna idem, adat awo asịn ke idiọọk.

9 Sia eyaesobo mme anamidiọọk,

ado mbon e-enieghe idodanyen ke Abọọñ eyaedat isọñ enie.

10 Etək ini mbon ibak idiibaaha aba;

akpekọm ayeeyem ammọ, uduukịtte.

11 Ado mbon nsuukidem eyaedat isọñ enie

enyʌñ ekop inem emem ye uforo.

12 Mbon ibak eduak idiọọk uduak ebaña ndinen awo;

enyʌñ ekwaaha eded ese ammọ;

13 ado Abọọñ asak mbon ibak,

sia adiọọñọ ke usen ammọ asʌk adi.

14 Mbon ibak esio akañkañ

enyʌñ ekọọk utịgha

nọ ato do etʌkkọ mme uweene ye mbon unana,

yak ewot mbon se usʌñ ammọ enen.

15 Ado akañkañ ammọ eyaekịm esịd ammọ,

mme utịgha ammọ ñko eyaebʌñọ.

16 Etək ñkpọ a-andinen awo enieghe

a-afọn akan inie uwak mbon ibak;

17 sia ubọk mbon ibak ayaabʌññọ,

ado Abọọñ amʌm ndinen awo akama.

18 Mbon unana ndudue eba ke ukpeme Abọọñ,

ndin udeeme ammọ adiiba ke nsi-nsi.

19 Ammọ idiiyeemeke ke ini idiọọk ñkpọntịppe;

ke ini akañ ammọ eyaedia eyʌkkọ.

20 Ado mbon ibak eyaetak:

Akpesʌkado mme asua Abọọñ ebaaha nte ñkpokpoñ ke ikọd,

ikañ ayaasobo ammọ, eyaesak ke nsʌñikañ.

21 Mbon ibak ewuọt ndin ikpeeghe,

ado ndinen awo enọ ke ntadubọk;

22 mbon se Abọọñ adiọñ eyaedat isọñ enie,

ado eyaesobo mbon a-anye asuuñọke.

23 Abọọñ anam ñkpad awo

a-amaaha anye asọọñọ ada;

24 akpesʌkado anye afiọnnọke, anye idiiduọhọ,

sia Abọọñ amʌm anye ke ubọk amọ.

25 Ami ñkedo etəkayịn ndin idahami mmesọñ,

ado akenam ñkịtte naña efeghe ekpọñ ndinen awo

me naña nditọ ammọ ebeeñe ndidia.

26 Ammọ edo ubọk enọ-enọ afịd ini enyʌñ ewuọt awo ñkpọ ke ntadubọk;

nditọ ammọ ediido adidiọñ.

27 Wọññọ kpọñ idiọọk nyʌñ nam se ifọn;

ndin afo ayaadʌñ ke iso isọñ ke nsi-nsi.

28 Sia Abọọñ ama mbon se inam unen

idiinyʌññọ ikpọñ mme anam akpanikọ.

Eyaesobo mme anamidiọọk afịd-afịd;

eyaesobo nditọ mbon ibak.

29 Ndinen awo eyaedat isọñ enie

enyʌñ edʌñ do ke nsi-nsi.

30 Inua ndinen awo etañ ikọ aniọñ,

edeme ammọ enyʌñ etañ se inen.

31 Mbed Abasi ammọ asịne ammọ ke esịd;

ñkpad ammọ ifiọnnọke.

32 Mbon ibak etie eyep mme ndinen awo,

eyem adiwot ammọ;

33 ado Abọọñ idiiyaaha ammọ isịn ke ubọk mbon ibak

idiinyʌññọ iyak ebiom ammọ ikpe ke ini ebenne ammọ eka ikpe.

34 Dot anyen ke Abọọñ

nyʌñ saña ke usʌñ amọ.

Anye ayaubenne fiin anịm ke anyọñ nọ adat isọñ anie;

emaesobo mbon ibak, afo ayaakịt.

35 Ami mmekịt awo ibak ye awo anana mbọm

nte atiai ñkọk nte ukịm,

36 ado ikikpeeneke anye amaaboiyo afep inyʌññọ iba aba;

akpesʌkado ami ñkeyemme anye, ñkekịtte anye.

37 Kere baña awo a-afọnnọ ama, se adinen awo;

ini iso mbon ake eyemme emem ayaafọn.

38 Ado eyaesobo afịd mme anamidiọọk;

ini iso idiibaaha inọ mbon ibak.

39 Adinyaaña mme ndinen awo ato Abọọñ;

anye ado akpọsọñ itie udịbe ammọ ke ini nnananyen.

40 Abọọñ anwam ammọ anyʌñ afak ammọ;

anye afak ammọ asio ke ubọk mbon ibak anyʌñ anyaaña ammọ,

sia ammọ edịbeke ke anye.