1 Kpañ utọñ kop ikọ mmi, Abọọñ,

kere baña aseeme mmi.

2 Kop ayịd a-ami ntuaha ñyem unwam,

Adidem mmi ye Abasi mmi,

sia ami mbọñ akam unọ fiin.

3 Abọọñ, ubakusen afo akop uyio mmi;

ubakusen ami nnịm mme ebeeñe mmi ke iso mfo

ñnyʌñ mbed ye idodanyen.

4 Sia afo udooho Abasi a-anemme esịd abaña ibak;

afo udaarake mbon ndoom.

5 Mbon ntañidem ikanna ida

ke iso mfo.

Afo asuasua mme anam idiọọk;

6 afo asoosobo mme asʌhọ nsu.

Mme mbon afai ye mbon abiaña

afo, Abọọñ, asuasua.

7 Ado ami, ato ke ntak ekamba ima mfo,

mmekeme adidʌk esịd ufọk mfo;

ke uteeñe ami mmetuak iwuod

ke adisana tembịd mfo.

8 Abọọñ, ndat miin usʌñ ke adinenido mfo

mbaak mme asua mmi;

nam usʌñ mfo ado nnen-nnen ke iso mmi.

9 Akpanikọ ndomokeed ibaaha ammọ ke inua;

esịd ammọ ayọhọ ye isiọ.

Usʌñitọñ ammọ ado anainwañ udi;

ekama edeme ammọ esʌhọ nsu.

10 Biom ammọ ikpe, O Abasi!

Yak mbufiọk ammọ ado ñkpọiduọ anọ ammọ.

Bịn ammọ sioño ke ntak uwak idiọọkñkpọ ammọ,

sia ammọ e-esọñ iwuod ye afo.

11 Ado yak afịd mbon se idịbe ke idak mfo enem esịd;

yak ammọ ekwọ ikwọ idaara afịd ini.

Tat ukpeme mfo fʌk ammọ,

nọ mbon e-emaaha anyịñ mfo edat esịd ke afo.

12 Ke akpanikọ, Abọọñ, afo amediọñ mme adinen awo;

amekanna ammọ akʌk ye mfọn mfo nte adat atuekọñ awañ ammọ.