1 Ke afo, Abọọñ Abasi mmi,

ke ami nnie idodanyen.

2 Ami mbuọt idem ke afo;

kuuyak ami ñkịt abuud,

kuunyʌñ uyak mme asua mmi eñkan miin.

3 Baaba awo ndomokeed a-anieghe idodanyen ke afo

adiidia abuud ibaaha tutu amama,

ado abuud ayaamʌm mbon

e-enamma abiaña ke unana ntak.

4 Ñwọt miin mme usʌñ mfo, Abọọñ,

ñkpeep miin mme usʌñ mfo.

5 Ndat miin usʌñ ke akpanikọ mfo nyʌñ ñkpeep miin,

sia afo ado Abasi Andinyaaña mmi,

ndin idodanyen mmi ado ke afo afịd usen.

6 Toiyo, Abọọñ, ekamba mbọm ye ima mfo,

sia ammọ ebaaha tọọñọ ke esed.

7 Kuutoiyo mme idiọọkñkpọ uyịn mmi

ye nsọñiwuod mmi;

ke ima mfo ntoiyo miin,

sia afo, Abọọñ, amefọn.

8 Abọọñ afọn anyʌñ anen;

ke ntoro anye ayaatemme mme anamidiọọk usʌñ amọ.

9 Anye adat mbon nsuukidem usʌñ ke se inen

anyʌñ akpeep ammọ usʌñ amọ.

10 Afịd mme usʌñ Abọọñ edo imaima ye akpanikọ

anọ mbon e-enamma edioomo amọ.

11 Ke ntak anyịñ mfo, Abọọñ,

feen ndudue mmi, akpesʌkado anye akponno.

12 Mme anie, ndin, edo mbon se ibaak Abọọñ?

Anye ayaatemme ammọ usʌñ a-anaaha nte ammọ emek.

13 Ammọ eyaenie eduek ke ayio uwem ammọ,

ndin ubon ammọ eyaedat isọñ enie.

14 Abọọñ ayaara esịd amọ anọ mbon se ibaak anye;

anye anam ammọ ediọọñọ edioomo amọ.

15 Anyen mmi awʌhọ ke Abọọñ afịd ini,

sia anye ikpọọñ adiisio ukod mmi ke afia.

16 Wọññọ nse miin nyʌñ ntua mbọm,

sia ami ndo ikpọọñ ñnyʌñ mba ke nnananyen.

17 Ben mfịna esịd mmi sio

nyʌñ nsio miin ke ekamba ubiak mmi.

18 Se ukuud mmi ye mbaba mmi

nyʌñ ben mme ndiọiñkpọ mmi sio.

19 Se naña mme asua mmi ewak

ye naña ammọ enekke ensua!

20 Kpeme uwem mmi nyʌñ ñnyaaña miin;

kuuyak ndia abuud,

sia ndịbe ke afo.

21 Yak mfọnmma ye adinenido eñkpeme miin,

sia idodanyen mmi, Abọọñ, ado ke afo.

22 O Abasi, fak Isrel sio,

ke afịd mme mfịna ammọ!