1 O Abasi, mme idịd ebom edʌk asaña-asaña udeeme mfo;

ammọ esappa adisana tembịd mfo,

ammọ esuuhọ Yeruselem enịm ke mbio.

2 Ammọ ekpọñ akpo mme isʌñutom mfo

enịm nte ndita enọ mme inuen anyọñ,

abʌkidem ikọd mfo enọ mme unam ikọd.

3 Ammọ eduọk iyiib nte mmọọñ

ekanna afịd Yeruselem ekʌk,

awo inyʌññọ iba se ibuuk mme akpañkpa.

4 Ñnyịn idoñño ñkpọ emiom inọ mme mbọhọidʌñ ñnyịn,

idoñño ñkpọ nsaha ye asuenne inọ ñkanñkʌk.

5 Adiikpeene die, Abọọñ? Afo uduuyat esịd ke nsi-nsi?

Ufịb mfo adiisak nte ikañ ikpeene die?

6 Nwañña ifiobesịd mfo fʌk mme idịd

i-imuunyịmmeke fiin,

fʌk mme abioubọọñ

i-imiikoodo anyịñ mfo;

7 sia ammọ emaesobo Yekọb

emaenyʌñ ebiat itie idʌñ amọ.

8 Kuuben mme idiọọkñkpọ ake emana esed udot ñnyịn ke idem;

yak mbọm mfo adisịme ñnyịn usọp-usọp,

sia ñnyịn iminekke iyem unwam eti-eti.

9 Inwam ñnyịn, Abasi Andinyaaña ñnyịn,

ke ntak ubọọñ anyịñ mfo;

fak ñnyịn sio nyʌñ feen mme idiọọkñkpọ ñnyịn

ke ntak anyịñ mfo.

10 Mme idịd ekpenam die ebo ete,

"Mmọ Abasi ammọ?"

Nam ediọọñọ ke atu mme idịd, ke iso ñnyịn

ke afo amesio usiene iyiib ikọd mfo eduọkkọ.

11 Yak mmịm mbon ñkpakọb edọọk edi ke iso mfo;

dat akpọsọñ ubọk mfo nyaaña mbon se emaekebiere ikpe ñkpa enọ.

12 Abọọñ, sio usiene emiom ake mbọhọidʌñ ñnyịn unọọhọ fiin,

yaak dot ke ikpanesịd ammọ utịme itiaba.

13 Ndin ñnyịn, ikọd mfo, mme edọñ ake afo abọọhọ,

iyautooro fiin ke nsi-nsi;

tọọñọ ke emana keed tutu emana asịm mfen,

iyaibʌk itooro mfo anwa-anwa.