1 O Akpemeedọñ Isrel, kop uyio ñnyịn,

afo a-adatta Yosef usʌñ nte udịmedọñ.

Afo a-atieghe ke ebekpo ke ufọọd mme serubim,

yamma wuọ 2 ke iso Ifrem, Benyamin ye Manase.

Demme uko mfo;

Di, nyʌñ inyaaña ñnyịn.

3 O Abasi, maana inọ ñnyịn adudu;

yak iso mfo ayamma inọ ñnyịn,

yak ñnyịn ibọ adinyaaña.

4 Abọọñ Abasi Andikponñkan,

iyadesịd mfo adiiduuñọ ikpeene die

nọ afo uduukoppo akam ikọd mfo?

5 Afo amenọ ammọ uyo mmọọñayịd,

afo amenam ammọ enwọñ mmọọñayịd ke ayọhọ ntəño usan.

6 Afo amenam ñnyịn ido ñkpọ nsaha inọ mme mbọhọidʌñ ñnyịn,

mme asua ñnyịn enyʌñ iduọi ñnyịn.

7 Maana inọ ñnyịn adudu, Abasi Andikponñkan;

yak iso mfo ayamma inọ ñnyịn,

nọ ñnyịn ibọ adinyaaña.

8 Afo amaawịppe fain ato Iyib;

afo amaabiiñe mme idịd asioño anyʌñ atọ anye.

9 Afo amaatem isọñ anọ anye,

anye amaasio adʌñ anyʌñ atara ayọhọ isọñ.

10 Ndeeñ amọ amaafuuk mme ikpọabod,

mme ikpọ eto sida ye mme ñkọk amọ.

11 Mme ñkọk amọ emaenyọọñ ekewuọ Akpainyañ,

mme ñkam amọ emaekesịm Inyañ.

12 Nsoo inam nọ afo awuut mme ndibene amọ

anam afịd awo se ifrọ ke usʌñ ekịp kreb amọ?

13 Mme ñyaaraedi eto ke akai ewai anye,

mme ntək unam eto ikọd enyʌñ eta anye.

14 Tịmme ibịne ñnyịn, Abasi Andikponñkan!

Tie ke anyọñ nyʌñ se!

Kpeme fain ami,

15 adʌñ ake ubọk nnasia mfo aketọọhọ,

ayịn ake afo akebọọhọ anịm anọọ idem mfo.

16 E-ekpịkke fain mfo eduọọk, e-efọp anye ke ikañ;

nduaiya mfo a-asobo ikọd mfo.

17 Dat ubọk mfo dot awo a-abaaha ke ubọk nnasia mfo,

ayịn awo ake afo akebọọhọ anịm anọọ idem mfo.

18 Ndin ñnyịn idiikannake edem uwọt fiin;

isọọñọ ñnyịn idem, ndin ñnyịn iyaikoot anyịñ mfo.

19 Maana inọ ñnyịn adudu Abọọñ Abasi Andikponñkan,

yak iso mfo ayamma inọ ñnyịn,

nọ ñnyịn ibọ adinyaaña.