1 Ami mmema Abọọñ sia anye amaakop uyio mmi;

anye amaakop ntuaayịd ake ami ñyemme mbọm.

2 Sia anye amannọ miin ñkpañutọñ,

ami ñyaakoot anye ke naña nte ami mbaaha ke uwem.

3 Mme udʌk ñkpa emaeñwaña miin,

ñnyeñidem udi amaadinsịm miin;

ukuud ye nnananyen emaeñkanna miin ekʌk.

4 Ndin ami mmaakoot anyịñ Abọọñ:

"Abọọñ ñnyaaña miin!"

5 Abọọñ ado adinen anyʌñ afọn ido;

Abasi ñnyịn ayọhọ ye esịd mbọm.

6 Abọọñ asikpeme mme akọi;

ke ini ekensuuhọke itie, anye amañnyaaña miin.

7 Ukpọñ mmi, tịmme kaa itie nduọkadudu mfo,

sia Abọọñ afọn ye afo.

8 Abọọñ, sia afo ameñnyaaña miin asio ke ñkpa,

anyen mmi asio ke mmọọñayịd,

ukod mmi ke adifiọnnọ,

9 nọ ami nsaña ke iso Abọọñ

ke isọñ mme andidu uwem.

10 Ami mmaanie mbuọdidem ke Abọọñ ke ini ami ñkebooho,

"ukuud anekke ammʌm miin"

11 ke esịd ndịk ami mmaabo,

"Afịd awo edo mme asʌhọ nsu."

12 Nsoo ke ndiinọ Abọọñ

ke afịd mfọn a-anye afọnnọ ye ami?

13 Ami ñyaadịppe kọọb adinyaaña

ñnyʌñ ñkoot anyịñ Abọọñ.

14 Ami ñyaasio mme akaaña mmi nnọ Abọọñ

ke iso afịd mbon amọ.

15 Ñkpa ikọd Abọọñ e-enamma akpanikọ

ado ñkpọuto ke iso amọ.

16 Abọọñ, ke akpanikọ ami ndo ayịnufọk mfo;

ami nnam ñkpọ unọ fiin kpa naña eka mmi akenam;

afo amekpọk akpọnọ mmi asioño.

17 Ami ñyaawa uwa ekọọm unọ fiin

ñnyʌñ ñkoot anyịñ Abọọñ.

18 Ami ñyaasio mme akaaña mmi nnọ Abọọñ

ke iso afịd mbon amọ,

19 ke esịd akwere ufọk Abọọñ,

ke ufọọd mfo, Yeruselem.

Itooro Abọọñ.