1 Afọn aditooro Abọọñ Abasi

adinyʌñ ñkwọ ikwọ nnọọ anyịñ mfo, O Andikoñ Ñkan,

2 adibʌk ima mfo ke ubakusen,

ye akpanikọ mfo ke akonayio,

3 ke ikwọ e-ebreke ke ndidoudʌk a-anieghe udʌk duob

ye uyioikwọ ke ekpa.

4 Sia afo Abọọñ, amenam esịd mmi anem, ato ke adinam mfo;

ami ñkwọ ikwọ ke inemesịd ato ke mme ñkpọ se ubọk mfo anam.

5 O Abọọñ, mme utom mfo ekpon eti-eti,

utom mfo akpon die, akikere mfo anyʌñ atʌñọ die!

6 Mbon unana ifiọk idiọọñọke,

inyʌññọ inwaña mme ndisịme,

7 ke akpesʌkado mbon ibak ekọttọ nte mbid

afịd mme anam idiọọk enyʌñ eforo,

eyaesobo ammọ ke nsi-nsi.

8 Ado afo, O Abọọñ, ubenne fiin ke nsi-nsi.

9 Abọọñ, ke akpanikọ mme asua mfo,

ke akpanikọ mme asua mfo eyaekịt nsobo;

afịd mme anamidiọọk eyaesuana.

10 Afo amaabenne nnʌk mmi nte ake ayaaraenañ ikọd ke anyọñ;

enduọk miin mme nti adan.

11 Anyen mmi akịt iduọ mme asua mmi,

utọñ mmi akop nsobo se isịm mme asua mmi.

12 Ndinen awo eyaefọọn idem nte ekpad ayob,

ammọ eyaekọt nte eto sida ake Lebanọn;

13 etọọhọ ke ufọk Abọọñ,

ammọ eyaefiọọrọ ke akwere Abasi ñnyịn.

14 Ammọ ediikaka iso enwịm mfịd ke usọñ,

ammọ eyaekaaka iso eseghe enyʌñ esịññe mfañ,

15 enyʌñ etañ ebo, "Abọọñ anen ido;

anye ado Itiad mmi, ndin ibak ibaaha ke idem ammọ."