1 O Abasi, nsoo ido nọ afo isịn ñnyịn ke nsi-nsi?

Nsoo inam nọ iyadesịd mfo asio ufiob ye mme edọñ ake afo abọọhọ?

2 Toiyo idịd a-afo akedeppe ke ataa anyan ini,

mbon udeeme mfo, a-afo akefakka,

Abod Saiyọn, ake afo akedʌññọ.

3 Wọññọ ñkpad mfo se mme nsi-nsi ñwuudo,

se afịd nsobo ake mme asua enamma ke adisana itie mfo.

4 Mbon usua mfo ekuun ke itie afo akesooboke ye ñnyịn;

ammọ ewuuk ndaaha ammọ do nte mme idiọọñọ.

5 Ammọ ekenam ñkpọ nte mbon e-ekamake ekịd

adisiak mfrọ ke esịd mme eto akai.

6 Ammọ emaebʌñ afịd mme ñkpọ usọ

ke mme ekịd ye mme akpeti ammọ.

7 Ammọ emaefọp adisana itie mfo eduọọk ke isọñ;

ammọ emaesappa itie idʌñ Anyịñ mfo.

8 Ammọ emaebo ke esịd ammọ "Ñnyịn iyaisobo ammọ ataa afịd-afịd!"

Ammọ emaefọp afịd itie nte ekesikpono Abasi ke afịd isọñ.

9 Awo inọọhọ ñnyịn mme idiọọñọ e-etooho Abasi;

mme prọfed ibaaha aba,

ndin ibaaha awo ñnyịn ndomokeed se idiọọñọ me ñkpọ ami adiikpeene die.

10 O Abasi, asua aduusak fiin ikpeene die?

Nte asua adiisue anyịñ mfo ke nsi-nsi?

11 Nsoo inam nọ afo adʌt ubọk mfo adat, ubọk nnasia mfo?

Diañña ubọk mfo ke esịd afọñ mfo nyʌñ sobo ammọ!

12 Ado Abasi ado Adidem mmi tọọñọ ke usen edem;

anye aben adinyaaña adi ke ederimbod.

13 Ado afo akebakka akpainyañ ke adudu mfo,

afo akebom iwuod mme amọn ke mmọọñ.

14 Ado afo akenuak mme iwuod idiọọk unam mmọọñ

anyʌñ aben anye anọ nte ndita ke akpautatan.

15 Afo akesiak mme idịm ye mme aba mmọọñ;

anyʌñ anam mme inyañ e-efegheke esat.

16 Afo anie uweemeayio, akonayio anyʌñ ado ake mfo;

afo akenam utịn mme afiọñ.

17 Ado afo akenịm afịd mme adaña ederimbod;

afo akenam ndaayio mme ukwọedịm.

18 Abọọñ toiyo naña asua usak fiin,

naña ndisịme awo asueñ anyịñ mfo.

19 Kuuyaak uwem ibiom mfo usịn ke ubọk mme afai unam;

Kuufre uwem ikọd mfo e-ebaaha ke ukuud ke nsi-nsi.

20 Kpono edioomo mfo,

sia ñkpad mbon abom eyọhọ ke mme ñkịm-ñkịm itie ke isọñ.

21 Kuuyak awo se efiik atịmme edem anyọñ ke asuenne;

yak awo uweene ye awo unana etooro anyịñ mfo.

22 O Abasi, dakka da, nwana anwan iwuod mfo;

toiyo naña mme ndisịme awo usak fiin afịd usen.

23 Kuufre akpọsọñ uyom mme asua mfo,

ñkpoyo utọk mme asua mfo, asʌkkọ akaka iso adọọk.