1 Itooro Abọọñ.

Afọn die adikwọ itooro nnọọ Abasi,

anem anyʌñ anen die adikwọ itooro nnọ anye!

2 Ado Abọọñ abọp Yeruselem;

anye akoono nditọ Isrel se eketañ esio.

3 Anye akọk mbon mbʌññọesịd

anyʌñ abọp unan ammọ.

4 Anye anọ ibad ntantaafiọñ

anyʌñ akoot ammọ ke anyịñ.

5 Abọọñ ñnyịn akpon anyʌñ asọñ adudu;

ifiọk amọ inieghe utịd.

6 Abọọñ amʌm mbon nsuukidem akama

ado atop mbon ibak asịn ke isọñ.

7 Ikwọ ikwọ itooro idadesịd inọ Abọọñ;

ibre ikwọ inọ Abasi ñnyịn ke ekpa.

8 Anye afʌk ikpaanyọñ ye ntọñanyọñ;

anye anọ isọñ edịm

anyʌñ anam mbid afịt ke ntək abod.

9 Anye anọ mme enañ ndidia

ye mme ekọọñebʌkayob ke ini ammọ eseemeke enọ anye.

10 Idadesịd amọ idooho ke adudu ake enañmbakara,

me inemesịd amọ ke ukod mbon ekọñ;

11 Abọọñ adat esịd ke mbon se ibaak anye,

esịnne esịd ammọ ke nsọọñọnda ima amọ.

12 Yeruselem, ikpono Abọọñ;

Saiyọn, itooro Abasi ndufo.

13 Anye anam mme ukwak inuaatob ndufo asọọñọ

anyʌñ adiọñ mbon e-ebaaha ye ndufo.

14 Anye anam mme adaña ndufo enie emem

anyʌñ iyʌkkọ ndufo ye ataa eti wiid.

15 Anye adọñ ikọ amọ utom ke ederimbod;

ikọ amọ asọp eti-eti.

16 Anye adette sino nte idededọñ

anyʌñ asuan ndedeb nte ntọñ.

17 Anye aduọk edịmitiad nte ñkeñe itiad.

Anie awo ikpikan ida ke sino atueb amọ?

18 Anye adọñ ikọ amọ aditara ammọ;

anam afịm amọ atara, mmọọñ akan afeghe.

19 Anye ayaara ikọ amọ anọ Yekọb,

mme mbed ye ewʌhọ amọ anọ Isrel.

20 Anye inamma ami inọ idịd ndomokeed mfen;

ammọ idiọọñọke mme mbed amọ.

Itooro Abọọñ.