1 Abọọñ, kop akam mmi,

kpañ utọñ nọ aseeme ake ami ñyemme mbọm;

ke akpanikọ ye adinenido mfo

di ñnyaaña miin.

2 Kuukoot ayịnufọk mfo ikpe,

sia ibaaha aduuwem awo se inen ke iso mfo.

3 Asua ambịne miin,

anye ansọnnọ miin anịm ke isọñ;

anye anam ami ndʌñ ke ekịm

nte mbon ake emaekekpañña ke anyan ini.

4 Ke ntoro sịbidịd mmi amem ke idem mmi;

esịd mmi akop mmemidem.

5 Ami mmetoiyo mme usen edem;

ami mmekere mbaña afịd mme utom mfo

ñnyʌñ ñkere mbaña se ubọk mfo anam.

6 Ami mmedette ubọk mmi unọ fiin;

Ami mmenie udọñ unọ fiin nte nsaad isọñ.

7 Abọọñ, sọp mbọọrọ miin;

sịbidịd mmi akpa mba.

Kundịp miin iso mfo

imiidooho ami ndiiba nte mbon e-esọiyọke edʌk ube.

8 Yak ubakusen aben etob nsọọñọnda ima mfo ansọk,

sia ami nsịn mbuọdidem mmi ke afo.

Ñwọt miin usʌñ a-akpenaaha ami ñka,

sia ami ñyaak uwem mmi usịn fiin ke ubọk.

9 Abọọñ, ñnyaaña miin sio ke ubọk mme asua,

sia ami ndịp idem mmi ke afo.

10 Ñkpeep miin adinam uduak mfo,

sia afo ado Abasi mmi;

yak eti sịbidịd mfo

andat miin aka unaisọñ.

11 Abọọñ, ke ntak anyịñ mfo, nịm uwem mmi;

ke adinenido mfo, nsio miin ke afanekọñ.

12 Ke nsọọñọnda ima mfo, kʌp mme asua mmi inua;

sobo afịd mbon eñyịreke miin,

sia ami ndo ayịnufọk mfo.