1 Nte ndufo mme andikara emetañ se inen?

Nte ndufo emekpe ikpe mbon awo ke unen?

2 Iyoo, ndufo eduak ukwañ ke esịd ndufo,

ndin ubọk ndufo enam afai ke iso isọñ.

3 Mbon ibak emaewaaña ekpọñ usʌñ tọọñọ ke ini emana ammọ;

ammọ emaebiaña tọọñọ ke ntʌñidịb, esuan mme nsu.

4 Ifod ammọ aba nte ifod udʌkikọd,

nte ake asabọ ake amaakesiit utọñ amọ,

5 ake adiiyemme adikop uyioikwọ andikama nsuuk,

akpọkọm ifiọk andikpek anye akpon die.

6 O Abasi, bʌñ ammọ eded ke inua,

Abọọñ, wịppe mme eded mme ekpe ado sioño!

7 Yak ammọ esop nte mmọọñ afeghe afrọ;

yak mme idañ ammọ etịp, ammọ emaedʌt utịgha.

8 Yak ammọ eba nte ekwọọñ, a-atarake akappa udọd, ke ini anye asʌkkọ asaña,

nte akpa-ke-idịb nsekayịn, a-adiikịtte utịn.

9 Mbemiso mme ako ndufo ekop ufiob ifiaikañ ñkukịm,

me ammọ edo awawa me nsaad, eyaekwọọk mbon ibak eduọọñọ.

10 Mme ndinen awo eyaedaara ke ini ammọ emaekịt ke esio usiene iwuod ammọ,

ke ini ammọ emaenyiin ñkpad ammọ ke iyiib mbon ibak.

11 Do ndin ke mme awo ediibo,

"Ke akpanikọ ndinen awo esʌk ebọbọ nti utịb;

ke akpanikọ Abasi andikpe ikpe ederimbod mmọdo."