1 Abọọñ, afo amenduuñọ miin,

anyʌñ andiọọñọ miin.

2 Afo amediọọñọ idaha a-ami ntieghe ye idahami a-ami ndaaha;

afo ameda ke anyan itie adiọọñọ akikere mmi.

3 Afo amediọọñọ idaha a-ami ñwuọhọwuọ ye idaha a-ami nnaahana;

afo amediọọñọ afịd usʌñ mmi.

4 Mbemiso ami nsosio ikọ ntañ,

afo, Abọọñ, amedọdiọọñọ afịd-afịd.

5 Afo ameñkanna miin akʌk ke iso ye ke edem,

afo anyʌñ andot miin ubọk ke iwuod.

6 Utọ ifiọk ado ado ataa utịppeñkpọ annọ miin,

anekke akoñ akan se ami nsịme.

7 Uke ke ami ñkpekaa ñkpọñ Sịbidịd mfo?

Ñkpefeghe ñka uke ñkpọñ iso mfo?

8 Ami ñkpedọọk ñka anyọñ, afo mmọdo aba;

ami ñkpenịm itie nnaa mmi ke udem, afo mmọdo aba.

9 Ami ñkpedakkanda ke mba usiere,

ami ñkpeba ke anyan mben akpainyañ,

10 kpa do ubọk mfo ayandat miin usʌñ,

ubọk nnasia mfo ayaasọñ ammʌm miin.

11 Ami ñkpebo, "Ke akpanikọ ekịm ayandịp miin

ndin unwana akappa ado akonayio añkanna miin akʌk,"

12 ukpọk ekịm idiikịmme unọ fiin;

akonayio ayaayamma nte uweemeayio,

sia ekịm aba nte unwana unọ fiin.

13 Sia afo akebot ataa esịd idem mmi;

afo akemfʌk miin ke idịb eka mmi.

14 Ami utooro fiin sia afo akembot miin ke ndịk-ndịk ye utịppe-utịppe usʌñ;

mme utom mfo edo utịppe,

ami mmenekke ndiọọñọ ntoro.

15 Ikpọkidem mmi ikidịbeke ke iso mfo

ke ini ekembotto miin ke ndedịbe itie,

ke ini ekendianna miin keed ke esịd isọñ.

16 Anyen mfo amaakịt idaha awo imiikibotto ikpọkidem mmi;

emaewet afịd usen se ekenịm ennọọ miin ke ñwed mfo

mbemiso keed ke atu ammọ adiwuọ ada.

17 Abasi, akikere mfo ado nsọñudua annọ miin!

Aditọ ammọ ndian akpon die!

18 Akpedo ami ñkeyem adibat ammọ,

ammọ ekpaewak ekan ntan isọn,

idaha andemmeke, ami nsʌk mba ye afo.

19 Abasi, akpekapado afo, ayaawot mbon ibak!

Idakka iñkpọñ miin, ndufo mbon e-eyemme inwọñ iyiib!

20 Ammọ etañ ikọ ubaña fiin ye ibak ke esịd;

mme asua mfo ekama anyịñ mfo ke idiọọk usʌñ.

21 Abọọñ, ado nte ami nsuaha mbon se usua fiin,

ñnyʌñ ntọhọ ye mbon ake esọññọ iwuod ye afo?

22 Ami nnieghe ñkpọ mfen ñkan usua nnọ ammọ;

ami mbat ammọ nte mme asua mmi.

23 Abasi, nduuñọ miin, nyʌñ diọọñọ esịd mmi;

ndomo miin nyʌñ diọọñọ ayeemensia akikere mmi.

24 Se me aba usʌñ ndomokeed se ami ndue,

nyʌñ ndat miin saña ke usʌñ nsi-nsi.