1 Yak Abasi adakka ada, yak mme asua amọ esuana;

yak mbon usua amọ efeeñe ke iso amọ.

2 Afo ayaafuut ammọ asio nte nsʌñikañ,

nte ndukpe atara ke iso ikañ,

yak mbon ibak etak ke iso Abasi.

3 Ado yak ndinen awo enem esịd

enyʌñ edaara ke iso Abasi;

yak ammọ enem esịd enyʌñ edaara.

4 Ikwọ inọ Abasi, ikwọ ke itooro anyịñ amọ,

ibenne anyịñ amọ ake asañake ke ntọñanyọñ;

idaara ke iso amọ, anyịñ amọ ado Abọọñ

5 Anye ado ete anọ nditọakpa, andikpeme mme ebekpa,

anye ado Abasi ke adisana itie idʌñ amọ,

6 Abasi anọ mme ikpọọñ ufọkidʌñ;

anye adat mbon ñkpakọb awuọ ye ikwọ,

ado anam mbon nsọñiwuod edʌñ ke nsaad isọñ.

7 Ke ini afo, Abasi, akebemme ikọd mfo iso awuọ,

ke ini afo akesañake aboiyo ke anaan,

8 isọñ amaanyeñ, mme hefịn esaana edịm eyaak eduọk,

ke iso Abasi, Abasi ake Sainai,

ke iso Abasi, Abasi Isrel.

9 Afo akenọọ uwak mbara, O Abasi;

afo amaasọọñọ akpan udeeme mfo idem ke ini mba.

10 Ikọd mfo emaedʌk edʌñọ ke esịd,

ndin ato ke uyọhọ mfo, Abasi, afo amaanọ mme uweene ñkpọ.

11 Abọọñ asuan ikọ,

ndin ibaan se isuan ikọ esaña ke ekamba udịm:

12 "Ndidem ye mme udịm ekọñ efeeñe ke usọp;

mme ibaan se iba ke ufọk edeeme mbịme ekọñ.

13 Akpọkọm idaha a-ndufo edaiyake ke mme ufọk edọñ,

mme mba ibiom mmi eyọhọ ye silfa,

mme ntañ amọ eyọhọ ye nsem-nsem kold."

14 Ke ini Andikoñ Ñkan akesuanna mme ndidem ke isọñ,

akeba nte sino aduọ ke Abod Salmọn.

15 Abod Basan, abod ubọọñ,

Abod Basan, akpọsọñ abod,

16 nsoo inam nọ ase ke isịnanyen, afo akpọsọñ abod,

abod a-Abasi amekke adida nte itie ukara,

itie ake Abọọñ ke idem amọ adiidʌñ ke nsi-nsi?

17 Mme sariọd Abasi edo mme duob ke mme tọsịn

enyʌñ edo mme tọsịn ke mme tọsịn;

Abọọñ amaato ke Sainai adidʌk ke adisana itie amọ.

18 Ke ini afo amaakedọọk ke anyọñ,

afo amaasịn uwak awo ukad;

afo amaabọi mme enọ ato mbon awo,

ye mbon nsọñiwuod,

nọ afo, Abọọñ Abasi, akpedʌñ do.

19 Yak itooro anie Abọọñ, Abasi Andinyaaña ñnyịn,

a-abiommo mbiomo ñnyịn ke usen ke usen.

20 Abasi ñnyịn ado Abasi ake anyaañake;

ubọkkọ ke ñkpa ato Abọọñ Andikara.

21 Ke akpanikọ Abasi ayaanuak iwuod mme asua amọ,

ye ided-ided etịñiwuod mbon se ikaa iso ke ndiọiñkpọ ammọ.

22 Abọọñ Abasi abo ate, "Ami ñyaakoono ammọ nto ke Basan ndi;

Ami ñyaasioño ammọ ke udem inyañ ndi,

23 nọ ndufo enyiin ñkpad efrọ ke iyiib mme asua ndufo,

ndin mme edeme ewa ndufo eyaenie udeeme ammọ ñko."

24 Mme awo ekịt udịmisañ mfo, O Abasi,

udịmisañ Abasi mmi ye Adidem esañake ekedʌk adisana itie.

25 Mbon ikwọ eboiyo iso, mme abre ñkpọ ekeene ammọ;

ubọikpa e-ebreke ntək ibịdubọk esaña ye ammọ.

26 Itooro Abasi ke uwak atu awo;

itooro Abọọñ ke atu esob nditọ Isrel.

27 Do ke etək ekpək Benyamin, adat ammọ usʌñ,

do ñko ke ekamba udịm mbọọñ Yuda,

mbọọñ ake Sebulọn ye Naftali eba ñko.

28 Dat adudu mfo, Abasi;

iwọt ñnyịn adudu mfo, Abasi ñnyịn, naña afo akedak anam.

29 Ke ntak tembịd mfo ke Yeruselem

ndidem eyaekoono mme enọ usọk fiin.

30 Duat ndiọi unam ikọd ke atu ñnyanyaha,

ye udịm ñyaaraenañ ke atu mme ñyịn enañ mme idịd.

Ke emaekesuuhọ anye itie, yak idiọọk unam ikọd akoono mme ukwak silfa adi.

O Abasi, suan mme idịd e-emaaha ekọñ.

31 Mme isʌñutom eyaeto Iyib edi;

Kuus eyaedi edinʌhọ enọ Abasi.

32 Ndufo mme abio ederimbod, ikwọ ikwọ inọ Abasi,

ikwọ itooro inọ Abọọñ,

33 inọ anye a-awatta aboiyo ke mme ñkoññkan hefịn, mme hefịn esed,

a-aduatta ke akpọsọñ uyio.

34 Ndufo ikwọrọ adudu Abasi,

ake ubọọñ uyai amọ adoroke Isrel,

adudu amọ anyʌññọ aba ke mme hefịn.

35 Afo, Abasi, amenie uteeñe ke adisana itie mfo;

Abasi Isrel anọ ikọd amọ adudu ye udịd.

Yak itooro anie Abasi!