1 Ami ñyaakwọ akwa ima Abọọñ Abasi ke nsi-nsi;

ami ñyaakama inua mmi mbʌk akpanikọ mfo

ke afịd emana.

2 Ami ñyaabʌk anwa-anwa mbo ke ima mfo ada ke nsi-nsi,

ke afo amewuuk akpanikọ ke idem hefịn.

3 Afo akebo ate, "Ami mmenam edioomo ye awo ake ami mmekke,

ami mmenam enwọñọ ye Defid, awo mmi,

4 ‘Ami ñyaasiak ubon mfo nnịm ke nsi-nsi

ñnyʌñ nnam ebekpo mfo asọọñọ ada ke afịd emana.’ "

5 Abọọñ, mme hefịn etooro mme utịppeñkpọ mfo,

ye akpanikọ mfo ke esob ndisana awo.

6 Anie ke ikpaanyọñ ke ekeme adidat ndomo ye Abọọñ?

Anie atie nte Abọọñ ke atu mbon udịm anyọñ?

7 Ke esob ndisana awo, Abasi ke ebaak ekan;

anye anie uteeñe akan afịd se ikanna anye ikʌk.

8 Anie atie nte afo, Abọọñ Abasi Andikponñkan?

Afo, Abọọñ, akpon akan, akpanikọ mfo anyʌñ ukanna fiin akʌk.

9 Afo akara mbufịd inyañ;

mme awawa amọ emaedakka ida, afo asuuhọ ammọ.

10 Afo akenuak Rahab nte keed ke atu mbon se ewot,

afo amaasuan mme asua mfo ke akpọsọñ ubọk mfo.

11 Mme hefịn unie fiin, afo anyʌñ anie ederimbod ñko;

afo akesiak ekondo ye afịd se idọñọ ke esịd.

12 Afo akebot adoro ye usuuk;

Tabọ ye Hemọn ekwọ idaara enọ anyịñ mfo.

13 Ubọk mfo asaña ye adudu;

ubọk mfo anie inweek, ebenne ubọk nnasia mfo ke anyọñ.

14 Adinenido mme unenikpe edo itiad idakisọñ ebekpo mfo;

ima ye akpanikọ ubem fiin iso.

15 Afọfọn anọ mbon e-ediọọñọke adudaara fiin,

e-esañake ke unwana iso mfo, O Abọọñ.

16 Ammọ enem esịd ke anyịñ mfo ke afịd usen;

ammọ ekwọ etooro adinenido mfo.

17 Sia afo ado ubọọñ mme adudu ammọ,

mfọn mfo ñko abenne nnʌk ñnyịn ke anyọñ.

18 Ke akpanikọ, atuekọñ ñnyịn anie Abọọñ,

adidem ñnyịn anyʌñ anie Adisana Abasi Isrel.

19 Ini keed afo amaatañ ikọ ke ñkukịd,

abo mme ndinen ikọd mfo ate:

"Ami mmesịn awo ekọñ adudu ke idem;

ami mmesio akparawa keed ke atu mme ikọd mmi nnịm.

20 Ami mmekịt Defid awo mmi;

ami mmeyet anye adisana adan mmi.

21 Ubọk mmi ayaamʌm anye akama;

ke akpanikọ ubọk mmi ayaanọ anye adudu.

22 Mme asua idiikanna anye;

mbon ibak idiifʌnnọke anye.

23 Ami ñyaanuak mme asua amọ ke iso amọ

ñnyʌñ ñyʌppọ mbon utọk amọ nduọñọ.

24 Nsọọñọnda ima mmi ayaaba ye anye,

ato ke anyịñ mmi nnʌk amọ ayaadịppe ke anyọñ.

25 Ami ñyaanam ubọk amọ akaara ke akpainyañ,

ubọk nnasia amọ anyʌñ akaara mme inyañ.

26 Anye ayaabọñ añkoot miin, ate: ‘Afo ado Ete mmi,

Abasi mmi, Itiad Adinyaaña mmi.’

27 Ñko ami ñyaasio anye nnịm nte akpan mmi,

andikoñ ñkan ke atu mme ndidem ederimbod.

28 Ami ñyaanịm ima mmi nnọ anye ke nsi-nsi,

ndin edioomo mmi ye anye idiikpuuho ke nsi-nsi.

29 Ami ñyaasiak ubon amọ nnịm ke nsi-nsi,

ebekpo amọ ayaasọọñọ ada adaña nte mme hefịn ebaaha.

30 "Adieke nditọ ideen amọ ekpọññọ mbed mmi

inyʌññọ isaña ke mme ewʌhọ mmi,

31 adieke ammọ ebiada mme mbed mmi

enyʌñ etre adinam uyio mmi,

32 ami ñyaakama ikpa mmia ammọ ufen ke idiọọkñkpọ ammọ,

ñyaatịm ammọ ke ukwañido ammọ;

33 ado ami ndiibọọhọ anye ima mmi,

ndiinyʌññọ ñkpọñ akpanikọ mmi.

34 Ami ndiibiatta edioomo mmi

me adikpəho se ñkpọkinua mmi aketañ.

35 Ami mmenwọñọ ke adisanaido mmi, akañ keed ami nte akpatre,

ami ndiinyʌññọ nsʌhọ nsu nnọ Defid,

36 ke ubọọñ amọ ayaakaa iso aba ke nsi-nsi

ñko ebekpo amọ ayaasọọñọ ada ke iso mmi nte utịn;

37 anye ayaasọọñọ ada ke nsi-nsi nte afiọñ,

nte ntiense akpanikọ ke ikpaanyọñ."

38 Ado afo amesịn, afo amese ke ndek,

afo amaanekke ayat esịd ye awo se emaekeyet adan inịm.

39 Afo amekañ edioomo mfo ye awo mfo

amenyʌñ asappa anyanya ammọ ke ntọñ.

40 Afo amewuut afịd ndibene amọ

anyʌñ asobo ñkpọsọñ itie amọ.

41 Afịd awo se isaña ifrọ ke usʌñ ebịme anye;

anye akappa ado ñkpọ nsaha anọ mbọhọidʌñ amọ.

42 Afo amedịppe ubọk nnasia mme asua amọ;

afo amenam afịd mme asua amọ edaara.

43 Ke akpanikọ, afo amewọññọ mben akañkañ amọ

unyʌññọ unọ anye unwam ke ekọñ.

44 Afo ametre akwa uyai amọ

anyʌñ atop ebekpo amọ aduọọk ke isọñ.

45 Afo amekpịkke ini uyịn amọ;

afo amenyʌñ aben abuud afʌk anye ke idem.

46 Abọọñ, adiikpeene die? Afo uduudịp idem mfo ke nsi-nsi?

Ifiobesịd mfo adiisak nte ikañ ikpeene die?

47 Toiyo naña ayio uwem mmi aməho.

Se naña afo akebot afịd uduud awo ke ikpu-ikpu o!

48 Anie akeme adidu uwem ndin ikpaaha ñkpa

me anie akeme adibọkkọ adudu udi?

49 Abọọñ, akaan akwa ima mfo aba ke mmọọ,

ake afo akedatta akpanikọ mfo anwọñọ anọọ Defid?

50 Abọọñ, toiyo naña esak awo mfo,

naña ami mbiom usọñanyen afịd mme idịd ke esịd mmi,

51 mme usọñanyen ake mme asua mfo, Abọọñ, ensakka,

ake ammọ esakka afịd ikpadisañ awo mfo emaekeyet adan inịm.

52 Itooro anie Abọọñ ke nsi-nsi

Amen ye Amen.