Mme Saam 75

Ake etubom ikwọ. Akeene uyioikwọ ake "Kuusobo." Saam ake Asaf. Ikwọ.

1 Ñnyịn imutooro fiin, Abasi,

ñnyịn imutooro fiin, sia Anyịñ mfo a-akpere;

mme awo ebʌk ebaña mme utịppe adinam mfo.

2 Afo abo, "Ami mmek ini ake ami ñkenịmme;

ami ndo andikpe ikpe ke unen.

3 Ke ini ederimbod ye mme awo se idʌñ ke esịd enyeeñeke,

ado ami mmʌm mme abai amọ ñkama.

4 Ami mmedọkkọ mbon ntañidem mbo, ‘Ikiiduaak inua aba,’

ñnyʌñ mbo mbon ibak, ‘Ikiidịppe mme nnʌk ndufo.

5 Ikiidịppe mme nnʌk ndufo ke hefịn;

ikiinyʌñ itañ ikọ ke edu usọñanyen.’ "

6 Awo ndomokeed ibaaha ke usakkautịn me ke usobutịn

me ke akpautatan a-akemeke adibenne idem amọ.

7 Ado Abasi akpe abiide:

anye asuuhọ awo keed, anye adịppe awo mfen.

8 Kọọb mmọdo asịne ke ubọk Abọọñ

a-ayọhọke ye ukọd a-afịtte efuud e-enyʌññọ ewuak ye mme ñkpadia;

anye atọkkọ adọñ, ndin afịd mbon ibak ke ederimbod

enwọñ anye tutu asịm ataa ntak.

9 Amaado ami, ami ñyaabʌk ami ke nsi-nsi;

Ami ñyaakwọ itooro nnọ Abasi Yekọb,

10 abooho, "Ami ñyaakpịkke mme nnʌk afịd mbon ibak,

ado eyaebenne nnʌk adinen awo ke anyọñ."