1 Ikop mme ikọ ami, afịd ndufo mme abio;

ikpañ utọñ, afịd ndufo se idʌñ ke ederimbod ami,

2 mme usuuhọ-usuuhọ awo ye mme awo ke ikpọ itie,

mme anieñkpọ ye mme uweene ñko:

3 Inua mmi ayaatañ ikọ aniọñ;

akikere esịd mmi ayaanọ ifiọk.

4 Ami ñyaakpañ utọñ nnọ ñke;

ami ñyaadat ekpa nnam ebetọikọ mmi anwaña:

5 Ntak ami ñkpedịkkeke ke mme ndiọi usen emaedi,

ke ini mbon ibak ye mbon abiaña eñkannake miin ekʌk,

6 mbon se ibuọt idem ke imọ ammọ

e-enyʌññọ eduaak inua ebaña ñkpoon inie ammọ?

7 Awo ndomokeed ikanna ifak uwem awo mfen

me adinọ Abasi usioisob ke iwuod ammọ,

8 usioisob ke iwuod awo keed asọñ udua,

ekọmudua ndomokeed akenam ikemme,

9 nọ ammọ ekpekaa iso edu uwem ke nsi-nsi

inyʌññọ ikịt mbiara.

10 Sia afịd awo e-ekeme ikịt ke mbon aniọñ e-ekpa,

ke mme ndisịme ye mbon unana iwuod etatak ñko,

ekpọñ inie ammọ enọ mbon mfen.

11 Udi ammọ adiido ufọk ammọ ke nsi-nsi,

itieidʌñ ammọ ke afịd emana,

akpesʌkado ammọ ekebenne anyịñ ammọ esio mme isọñ ammọ.

12 Kpa ye inie ammọ, mme awo ikpeeneke ke iso isọñ

ammọ eba nte ndiọi unam ake etakka.

13 Naña usʌñ mbon ake ebuọt idem ke idem ammọ aba adodo,

ye usʌñ mbon se ikeene ammọ ñko, e-emaaha se ammọ etañ.

14 Ammọ eba nte edọñ a-adooho ana nte ekpa;

ñkpa adiido andibọọk ammọ

(ado mme ndinen awo eyaekan ammọ ke usiere).

Idem ammọ ayaatak ke udi,

ikperekekpere mfọọn itie idʌñ ammọ.

15 Ado Abasi ayamfak asio ke adudu abioekpo;

anye ayandat miin anọ idem amọ.

16 Kuudịkke ke mbon mfen emaekappa emọinyọ,

ke ini uku ufọk ammọ amaatọt;

17 sia ammọ idiidatta ñkpọ ndomokeed inyọñ emaekpa,

uku ammọ idiisọiyọke ikeene ammọ.

18 Akpesʌkado naña ammọ ebaaha ke uwem ammọ ebat idem ammọ ke mbon se ediọñ;

ndin mme awo utooro fiin ke umauforo;

19 ammọ eyaekeene mbon e-emaekebem ammọ iso idakka isañ,

mbon i-imiidiikịtte unwana uwem aba ke nsi-nsi.

20 Mbon se imọinyọ ado inieghe ikike

eba nte ndiọi unam ake esoboke.