1 Abasi mmi, a-ami ntooroke,

kuudop uyio,

2 sia mbon ibak ye mbon abiaña

ekuumọ inua ammọ embaña miin;

amọ ekama edeme nsu etañ ikọ embaña miin.

3 Ammọ eñkanna miin ekʌk ye mme ikọ usuaesịd;

ammọ enam mfịna ye ami ke unana ntak.

4 Ammọ endot miin uyio ke usiene ima a-ami nnieghe nnọ ammọ

ado ami ndo awo abọñ akam.

5 Ammọ ensio miin usiene idiọọk ke eti,

enyʌñ ensua miin ke ima a-ami nnieghe nnọ ammọ.

6 Mek awo ibak yak afiik asua mmi;

yak awo ndoduyio ada ke ubọk nnasia amọ.

7 Emaekpe ikpe amọ, yak ekịt ndudue enọ anye,

ñko yak akam amọ abiom anye ikpe.

8 Yak usen amọ aməho;

yak awo mfen adat itie utom amọ ke ukara.

9 Yak nditọ amọ edo nditọakpa

ndin anwaan amọ ado ebekpa.

10 Yak nditọ amọ edo ñyooñ inọọk;

yak ebịne ammọ esio ke mme ñwuudo ufọk ammọ.

11 Yak anọewuọd abọ afịd se anye anie;

yak isenawo ebịme afịd se anye akekpa utom ke esịd.

12 Yak awo ndomokeed akuufọn mfọn ye anye

me anie mbọm abaña nditọakpa amọ.

13 Yak ekpịkke ubon amọ esio,

esọọk anyịñ ammọ esio ke emana mfen.

14 Yak etoiyo mme ukwaññkpọ mme ete amọ ke iso Abọọñ;

Yak ekuukwokko ndiọiñkpọ eka amọ esio.

15 Yak ndiọiñkpọ ammọ esʌk ekaiso eda ke iso Abọọñ,

nọ anye asọọk anyịñ ammọ asio ke iso isọñ.

16 Sia tọọñọ anam anye ikikereke naña afọn mfọn,

ado akọbọ mbon uweene awot

ye mbon unana ye mbon mbʌññọesịd.

17 Anye amaama adidọọñ akam,

yak atịmme abịne anye.

Anye ikikịtte ufọn adidiọñ awo,

yak adidiọñ anyọọñ usʌñ akpọñ anye.

18 Anye akesịne isuuñọ nte afọñ amọ;

adʌk anye idem nte mmọọñ,

adʌk akpọ amọ nte adan.

19 Yak aba nte ñweem afọñ ke eben ewañ ekanna anye,

nte ñkpahaisịn ke ebọp anye ke nsi-nsi.

20 Yak anye ami ado utịb Abọọñ anọọhọ mme asua mmi,

mbon e-etañña idiọọk embaña miin.

21 Ado afo, Abọọñ Andikara,

ñnwam miin ke ntak anyịñ mfo;

ñnyaaña miin ke ntak mfọnido ima mfo.

22 Sia ami ndo uweene ñnyʌñ nnana ñkpọ,

ñko esịd mmi abʌññọ ke esịd idem mmi.

23 Ami mmesop nte ndukpọñ ndubiayio;

eñnyeeñe miin nte ñkukuñkpọyọriyọ.

24 Edọñ mmi ameem ke ntak utreudia;

idem mmi akpịññe anyʌñ anana abʌk.

25 Ami ndo ñkpọ nsaha nnọ mme asua mmi;

ke ini ammọ eñkịtte miin ammọ efuuñ iwuod.

26 Abọọñ Abasi mmi ñnwam miin;

ñnyaaña miin keene nsọọñọnda ima mfo.

27 Nam ammọ ediọọñọ ke ado ubọk mfo,

ke afo Abọọñ anam ami.

28 Ke ini ammọ esuuñọke, afo diọñ;

yak mbon eñyemme miin ikọ edia abuud,

ado yak ayịnufọk mfo adaara.

29 Yak esịn mbon endotto miin uyio afọñidem ndọk

enyʌñ ewañ ammọ abuud nte ewịra.

30 Ami ñyaakama inua mmi ñkpono Abọọñ;

ke atu uwak awo, ami ñyaatooro anye.

31 Sia anye ada ke ubọk nnasia mbon unana

adinyaaña uwem ammọ nsio ke atu mbon e-ebiereke ikpe ñkpa enọ ammọ.