1 Ami ñyaunọ fiin ekọọm, Abọọñ, ke afịd esịd mmi;

Ñyaatañ mbaña afịd utịppe adinam mfo.

2 Ami ñyaanem esịd ñnyʌñ ndaara ke afo;

Ñyaakwọ itooro anyịñ mfo, O Andikoñ Ñkan.

3 Mme asua mmi etịmme edem;

ammọ eduọ enyʌñ esobo ke iso mfo.

4 Sia afo amaabenne unen mmi ye ikọ mmi,

atie ke ebekpo nte akpe unen ikpe.

5 Afo amesua anọ mme idịd anyʌñ asobo mbon ibak;

amesọọk anyịñ ammọ asio ke nsi-nsi nsi-nsi.

6 Nsi-nsi nsobo asịm mme asua mmi,

afo amesobo afịd mme abio ammọ;

awo ikemekekeme aditoiyo ammọ aba.

7 Abọọñ ada ukara ke nsi-nsi;

anye anịm ebekpo amọ adikpe ikpe.

8 Anye akara ederimbod ke unen

anyʌñ akpe ikpe mme awo nte adotto.

9 Abọọñ ado itie udịbe anọ mbon e-efiighe,

itie ubọkkọ ke ini afanekọñ.

10 Mbon se idiọọñọ anyịñ mfo enie mbuọdidem ke idem mfo,

sia afo, Abọọñ, akenam ukpọññọ mbon se uyem fiin.

11 Ikwọ itooro Abọọñ, a-adʌññọ ke Saiyọn;

Itañ inọ mme idịd se anye anam.

12 Sia anye a-asioho usiene iyiib a-atoiyo;

anye ifreke ntuaña mbon ñkpọnnam.

13 Abọọñ, se naña mme asua mmi eñkuut miin!

Ntua miin mbọm nyʌñ ndịppe miin sio ke inuaatob ñkpa,

14 nọ ato do ntañ ase mfo

ke mme inuaatob Adiaha Saiyọn,

ñnyʌñ ndaara adinyaaña mfo do.

15 Mme idịd eduọññọ edʌk ube a-ammọ eketịppeke;

iyịre ake ammọ ekedịppe amʌm ammọ ukod.

16 Ediọọñọ Abọọñ eto ke mme unen adinam ammọ;

ubọkutom mbon ibak, kpa anye adiimʌm ammọ ukad.

17 Mbon ibak esọiyọ edʌk ke itie mme akpañkpa,

afịd idịd se ifre Abasi.

18 Ado Abasi idiifreke ayịn uweene tutu amama;

idodanyen mbon ñkpọnnam idiitakka tutu amama.

19 Dakka da, Abọọñ, kuuyak ubon awo akan;

yak ekpe ikpe mme idịd ke iso mfo.

20 Nam ammọ ekop ndịk, Abọọñ;

yak mme idịd ediọọñọ ke mmimọ idoñño ñkaña awo.