1 Abọọñ akpon, anyʌñ anekke adot se etooro,

ke abio Abasi ñnyịn, ke adisana abod amọ.

2 Ayaiya ke adikoñ amọ,

idadesịd afịd ederimbod,

nte abod Safọn, naña Abod Saiyọn aba adodo,

abio Akwa Adidem.

3 Abasi mmọdo ke mme itie ukpeme atob amọ;

anye awọt idem amọ nte itie ubọkkọ amọ.

4 Ke ini mme ndidem ekedianake keed,

ke ini ammọ ekekaaha ke udịm keed,

5 ammọ emaekịt anye ndin idem amaakpa ammọ;

ammọ emaefeeñe ye akpọsọñ ndịk.

6 Ñnyeñidem amaamʌm ammọ do,

ekop ubiak nte awonwaan a-abaaha ke uman.

7 Afo amaasobo ammọ nte mme nsʌñikañ Taasis

a-akpọsọñ afịm a-atooho usakkautịn asobo mbai-mbai.

8 Nte imaikikop,

kpa ntoro ke ñnyịn inyʌñ ikịt

ke abio Abọọñ Andikponñkan,

ke abio Abasi ñnyịn:

Abasi anam anye asọọñọ ada

ke nsi-nsi.

9 Ke esịd tembịd mfo, O Abasi,

ñnyịn itie ikere ibaña ima mfo ake imiikpuuho.

10 Kpa naña anyịñ mfo ado, O Abasi,

itooro mfo asịm mme utịd ederimbod;

ubọk nnasia mfo ayọhọ ye adinenido.

11 Abod Saiyọn adaara,

mme esịdidʌñ Yuda enem esịd

ebaña mme ubiideikpe mfo.

12 Isaña ikanna Saiyọn, isaña ikanna anye ikʌk,

ibat mme tọwa amọ,

13 inekke ise mme ndibene amọ,

ise mme itie ukpeme atob amọ,

nọ ndufo ebʌk ebaña ammọ

enọ emana ini iso.

14 Sia Abasi ami ado Abasi ñnyịn ke nsi-nsi nsi-nsi;

anye ayaado ndadusʌñ ñnyịn tutu akesịm utịd.