Isaías 8

Issayyaasiki Belti Ardiinxe Booji’ensha’a Beesisake Kadee qico

1 Duuchchi Woddiki Gootti ane hiyyee qici, «Bidiro lumok aaxxe’e ise’ninna, ‹balleessatteenna booji’atee ariifati› hite itti borreessi hiyye. 2 Lame addatemaaka manna, ikkinna qeesichcho Uuriyanna Beraakiyyuki belti Zakkariyaasi dhugaate kandaashsha assi» hiyye.

3 Shiixxooxxe yanna uduma ani wabeekitte anxe arenni welti galennen: isenna sila’wite labba belto ilde. Duuchchi Woddiki Gootti anee, «Summa beltiinka ‹Balleessateenna booji’otee ariifati!› hite fulchi. 4 Beltikinna ‹Annayyo, yookaani Amayyo› hiyye ye’a ege’neba edi darre Asoorik moyanji Demasiqoxxanna Semaariyaxxa karra booji’e adhdhaan» hiyye.

Asoorike Moyanjixxa Daga

5 Duuchchi Woddiki Gootti higgeenna ane’e hiyyee qici,

6 «Kunni ardi laana yaa’aaka

Selihoommixxe muummeka wode’e gibexxi

Moyanjo Retsininna

moyanjo Faquhe’n gammandeen.

7 Tennexxe Duuchchi Woddiki Gootti jabakanna hunnaameessa lola’iinka wede’e,

Asoorika moyanjo isike gaachchanni duuchchinni welti insa’ne’ni idagaan.

Efiraxxisiki galaani wo’me danbala’aamakishsha;

isi wede’in qarqara hedheeka boga duuchcha wo’maan. 8 Hunnati dhi’me Yihudiinke boga’n timaani:

duuchchingechcho buqe bira’ni

Goobin qico’n geyaan.

Kaddo malee Amanu’eeli

Isinna lukkichcho beltanna keeli giddo shoxxe heqqitammashsha

boga konne heqqaan» hiyye.

9 Ha’no gosa gosake arda bagedokee lasse!

Yaane kinni muddinan;

Ha’no bayyi boga hexxineeki ardi duuchchi caqase;

bagedokeenna qophpheefatte! Yaane kinni muddinan;

ta’anna bagedokee qophpheefatte; muda muddinaan.

10 Yaada fulche kinni heddineeshsha kadabaan;

Mageni no’onni welti hedhemmaxxee

mari’e ha’noxxinna qabbabaan.

Duuchchi Woddiki Gootti Wabeekichcho Xexxe’achchisee qico

11 Ardi me’eshsha me’abe’noshsha Duuchchi Woddiki Gootti jabaxxe ifixxe hunnanni anee hiyye xexxe’achchisee qici,

12 «Kunni ardi xaqarote hiyyaaxxa yaane

ha’no xaqarote hitinoqqe;

Insa’ne sodaantaxxa yaane ha’no sodaatinoqqe;

eettenne yaane’aanna alaltinoqqe.

13 Ha’no woyyoonsiyyo hasisaak

Ani Dada Duuchcha Ajajanoka Duuchchi Woddika Goottan;

ha’no sodaatiyyo hasisaak isoonni callanni;

ha’no alayyo hasissaak isoten.✝8:13 1 Phex. 3:14-15.

14 Ani woyyimma anixxen ardakee gollake kadannon;

lamiinge Yihudakennaa Isira’eelike ardi’a kinni

Ani guggufachchiissake kinjonna

ibissaaxxe rassaa kadannon.

Iyyerusaalemike ardi’a

abidaaxxe fonxoro ribbo insa’ne’a kadannon.

15 Tennexxee heddi guggufataan;

ibeenna enqemaan;

fonxorote’ninna ibe abidemaan» hiyye.✝8:15 1 Phex. 2:8.

Moramakenna Ekedhati Haaso’ammake Manni’a Xexxe’achchiisa Uwwendee qico

16 Magenokenaa’n baratteettexxa jabeessite abixxi; isenna maxxansi;

ookkonee seeranna anxe hordofeeyyexxe oddo’n maxansi.

17 Duuchchi Woddiki Gootti Isra’eelinaa’n alba hoyyedheeka

ani iso’o heqqedhannon;

isonde addatannon.✝8:17 Ibr. 2:13.

18 Kunniseteni aninna; anxi oosenna ani Tsiyoonixxe kooba’n hedheeke Dada Duuchcha Ajajaki Duuchchi Woddiki Gootti Isira’eelike ardi’a xexxe’achchiisatike beesisa kandona’a no’aa uwwe’en.

19 «Loqonxa’ninna hashashati mora’ni ekedhati haaso’aaka manna qodhdhe» hiyya’n ha’noo gorsa’neeki manni hedheen: lubboti hedheeki manni’a ifixxe yaane’a ekedha qodhdheexxi mannii’ni Mageno qodhdhexxa woyyabaa?

20 Mageniinke seeribanna dhugaaba’a marre tennee assa gibbinoole bariisatiki ifi ha’no’a ifabaan.

Rakkotixxa Yanna

21 Ardi bogi giddo solo’we rakkate doonsakiyya hiyyaan: solo’wemmaxxee mufate iimi’a uuda’n insa’neeka moyanjonna Mageno yowwaan. 22 Ookkonneechchi uduma butti’a uundaa wodda leellaachchi rakko, dukkananna sodaachchissaaxxe yaanen: dukkana dimmi giddi’aanna hunnaan.