Salmos 19

Mme Utịppeñkpọ Abasi ye Ufọn Mbed Amọ

1 Mme hefịn ebʌk ubọọñ Abasi;

mme ikpaanyọñ enyʌñ etañ se ubọk amọ anam.

2 Ke usen ke usen ammọ eneme;

kwa akonayio ammọ eyaara ifiọk.

3 Ammọ inieghe nneme, ikamake ikọ isem usem;

awo ikoppo uyom ito ammọ.

4 Ado uyio ammọ awuọ adʌk afịd unadod,

ikọ ammọ asịm utịd ederimbod.

Ke mme hefịn Abasi anam atayad anịm anọ utịn.

5 Aba nte ebendọ ato ubeed amọ awuọ adi,

nte awo uko anem esịd adifeghe nduba amọ.

6 Anye asakka ke mbeñ anyọñ keed

anyʌñ asaña akanna akewuọ mbeñ uko;

ñkpọ ndomokeed a-mmiikoppo ufiob amọ ibaaha.

7 Mbed Abọọñ afọn ama,

ademme awo ukpọñ.

Mme ewʌhọ Abọọñ edo akpanikọ,

enam mme akọi enie aniọñ.

8 Mme usʌñ Abọọñ enen,

enọ idaara ke esịd.

Mme mbed Abọọñ eyamma,

enọ anyen unwana.