1 Ami mmaame ntie mbet Abọọñ;

anye amaawọññọ anse miin anyʌñ akop aseeme mmi.

2 Anye amandịppe miin asio ke ube adọrọke,

asio ke mbad ye akpʌk;

anye amaaben ukod mmi adot ke akwa itiad

anyʌñ anam ñkpad isañ mmi asọọñọ ada.

3 Anye amansịn miin ufa ikwọ ke inua,

ikwọ itooro anọ Abasi ñnyịn.

Uwak awo eyaekịt enyʌñ ebaak Abọọñ

enyʌñ ebuọt idem ke anye.

4 Afọfọn anọ awo

a-abuọttọ idem ke Abọọñ

i-imiiseeghe mbon ntañidem,

iseeghe mbon e-ekeeneke mme nsu-nsu abasi.

5 Abọọñ Abasi mmi,

mme utịppeñkpọ se afo anam ewak,

ye mme ñkpọ se afo aduak adinam inọọ ñnyịn.

Awo ndomokeed ikemeke adidomo idem ye afo;

akpedo ñkebo ntañ ñnyʌñ mbʌk se afo anam,

ekpa ewak ebọhọ ñkpekanna ntañ mma.

6 Afo ukuyemme uwa ye enọ,

ado afo ametat utọñ mmi,

ufọfọb uwa ye uwa idiọọkñkpọ afo ukuyemme.

7 Ndin ami mmaabo, "Se ami mi, ami mmedi,

ewet embaña miin ke ikpañwed.

8 Abasi mmi, ami mmenie udọñ adinam uduak mfo;

mbed mfo mmọdo asịne ke esịd mmi."

9 Ami mmetañ mme utom adinyaaña mfo ke ekamba atu awo;

ñkʌppọ ñkpọkinua mmi, Abọọñ,

nte afo adiọọñọke.

10 Ami ndịppe adinenido mfo ke esịd mmi;

Nsʌk ntatañ mbaña akpanikọ mfo ye unwam adinyaaña mfo.

Ndịppe ima mfo ye akpanikọ mfo

ke akwa atu awo.

11 Kuuben mbọm mfo uñkpọñ miin, Abọọñ;

yak ima ye akpanikọ mfo añkpeme miin afịd ini.

12 Sia mme mfịna ake imiinieghe ibad eñkanna miin ekʌk;

mme idiọọkñkpọ mmi ewak tutu, eñkịm anyen, tutu mmọọnọke ñkpọ aba.

Ewak ekan ided iwuod mmi,

ndin esịd anduọ.

13 Yak unem fiin esịd adiñnyaaña miin, Abọọñ;

sọp di, Abọọñ, di ñnyaaña miin.

14 Yak afịd mbon se iyem adidat uwem mmi

ekịt abuud ye ndutịme;

yak afịd mbon se iyem nsobo mmi

etịmme edem enyọñọ ke asuenne.