1 Nyaŋ Iserae namensekɛɛlere, nyii daa,

nyaŋ ŋon n ne tɛɛ Yosɛfo siaman ŋgba namense dikpii nɛ,

nyaŋ ŋon n ne kyaa kerubise dɔɔ gyoorobiiri man nɛ,

lese n wose debɔɔ,

2 Ɛferayim na Bɛneyamen na Manase siaman.

Lese n wɔɔle wola,

kɔŋ na n kaa lɛɛ daa.

3 Ao Wurubuarɛ, besena daa see de daseŋae man,

booli n sia fa daa,

na dee nyiŋ nyeedoŋ.

4 Ao Degbeŋgyoo Wurubuarɛ Dekpataakpere,

nyaŋ ka gyeŋ baŋ,

do n balaŋ kefane kelii woromɔ?

5 N moo siasaraŋ besena weenɛɛ fa wɔ be diiwɔ,

n yelaa be nyɔɔ siasaraŋ leenɔɔtɔɔ ŋgba loŋ nɛ.

6 N te yele de tebia ne kulu daa,

te de kɔlara mɔ na boŋo daa.

7 Wurubuarɛ Dekpataakpere, besena daa see de daseŋae man,

booli n sia fa daa,

na dee nyiŋ nyeedoŋ.

8 Nyaŋ moona gerepo woŋ lee Igyipite kɔŋ,

nyaŋ gegina tɛɛlese te n duu ke.

9 N desina tɛɛle keŋ fa ke,

te ke nyiŋa lila lɛɛ tɛɛle keŋ pou.

10 Ke wuluŋ wuu bulase ŋan dɔɔ,

te ke tombia wuu sida daase dinaana dɔɔ.

11 Ke tombia fɛlɛɛwɔ kelii ɛpo nɔɔman,

te ka poteewɔ kelii boo nɔɔman.

12 Weera n tekerii ka akyaŋse,

te baŋ pou bɛɛ lam nɛ ne fiu ke bia?

13 Kɔŋgbɛɛse ta lee laaman kaa wɔlɛɛ ke,

te ŋale man wonembia kaa dii ke bia.

14 Wurubuarɛ Dekpataakpere, bese kɔŋ de gyaŋ.

Tisina n sia lee adido kɛɛ.

Kaa kɛɛ gerepo wɔɔ kei dɔɔ,

15 gerepo keŋ n ba mo n dunoluŋ duu,

te n be kɛɛle ke fa n wose nɛ.

16 Ba te kara n gerepo keŋ lɔ, be ta too ke,

n kalawɔna wɔ te be munuwɔ.

17 Mo n nyiŋmaa gyakaa ŋon ɔ kyaa n dunoluŋ dɔɔ nɛ dɔɔ,

deniwalaŋ bu ŋon n be gyina e fa n wose nɛ.

18 Kenaŋ na dɔɔ gyae dɛɛ lee n wɔle ya,

do daa doŋ, na dɛɛ baake n yele.

19 Degbeŋgyoo Wurubuarɛ Dekpataakpere, besena daa see de daseŋae man,

booli n sia wola daa,

na dee nyiŋ nyeedoŋ.