1 Degbeŋgyoo, nyaŋ yɛna Wurubuarɛ ŋon n ne lɛɛ ma nyee,

nyaŋ te mee wii baake nelim na ka weese.

2 Yela ma kefane kelii n gyaŋ,

see deŋele na n ke tei me kewii.

3 Nombia ne takaa maŋ nideli,

te mɛɛ benaa yeŋ.

4 Bɛɛ kala maŋ kpuna baŋ bee gyu yebɔɔ man nɛ man,

me yɛɛ ŋgba walaŋ ŋon ɔ be dana doŋ ya nɛ.

5 Be ta lese maŋ see yenaŋ kpuna woya,

ŋgba baŋ bɔɔ koo mo wɔ do yebɔɔ man,

baŋ bɔɔ lese wɔ lee n nyiŋmaa man,

keŋ n bɛɛ tɔɔse wɔ bela ya nɛ.

6 N ta mo maŋ do bɔɔ kyilimkyilim keŋ man,

bɔɔ keŋ detiŋtɛɛ tuum doo nɛ man.

7 N baŋ gyakaa me dɔɔ nideli,

n baŋ te wuu maŋ ŋgba kakpela nɛ.

8 N te wɔŋ ma akoso pou lee ma wose man,

me ta bese duwaare kolo be gyaŋ.

n te tɔ maŋ do keŋ mɔɔ tale lee ya.

9 Kewii te yele me sia bɛɛ naa nideli ya,

Degbeŋgyoo, mɛɛ baake neŋ wee kamasɛ,

me te gyina me nyiŋmaase tee neŋ.

10 Nyaŋ ke yɛɛ gyakoloŋ nombia wola balaŋ ayeŋɛɛ?

Ba woya baa koro lese n yele?

11 Baa kolosi n kegyae nombia yebɔɔ man,

yaa nya anokoare kedi woyadɛɛ?

12 Ŋolo ne naa n gyakoloŋ nombia detiŋtɛɛ man

yaa n katenee ayɛɛsa woyadɛɛ?

13 Mɔna Degbeŋgyoo, nyaŋ te mee wii baake,

nebo na ma kefane ne lii n gyaŋ.

14 Degbeŋgyoo, weera te n bɛɛ maŋ,

te n moo n sia weese maŋ?

15 Leenaŋ me biatɛɛ te me naa diyem te ma benaa yeŋ,

gyakoloŋ ta gyoo maŋ te ma wose tekerii maŋ lee nya ayɛŋ maŋ dɔɔ.

16 N baŋ nedoŋ te gbirisi ma wose,

nya ayɛŋ maŋ te wɔlɛɛ maŋ.

17 Wee dibiliŋ pou na be te kilisi maŋ ŋgba boo kewuu nɛ,

ba te tɔ maŋ do yenaase pou.

18 N te yele me gyoona na me dɔɔna te wɔŋ ba wose lee me gyaŋ,

detiŋtɛɛ yɛna me gyoo ŋon ɔ benaana maŋ.