1 ଆମୋସନେ ଉଂଡେ ଯିଶାଇୟନେ ଦର୍ସନ୍, ମେଁ ଯିହୁଦା ଇଃସାଙ୍ଗ୍ଇଂ ଉଷୀୟ, ଯୋଥମ୍, ଆହସ୍ ଆରି ହିଜକିୟନେ ସାସନ୍ ବେଲା ଯିହୁଦା ଆରି ଯିରୂଶାଲମ ବିସଏରେ ଏନ୍ ଦର୍ସନ୍ ବାକେ ।
ଇସ୍ପର୍ନେ ସାମୁଆଁକେ ଅଁନେ
2 ଅ କିତଂହିନି, ଦ୍ରିଗ୍, ଅ ମଚ୍ପୁର୍, ମାପ୍ରୁନେ ସାମୁଆଁ ଅଁପା, ମାପ୍ରୁ ବାସଙ୍ଗ୍ବକେ, "ନେ ଗଗିସିଆଃଇଂକେ ଲାଲନ୍ପାଲନ୍ ଆରି ବିଃଚଙ୍ଗ୍ ନେବକେ, ମାତ୍ରମ୍ ମେଇଂ ନେନେ ବିରଦ୍ରେ କାମ୍ ଡିଙ୍ଗ୍ବଆର୍କେ ।
3 ଅରେଃ ମେଁନେ ସାକାର୍କେ ମ୍ୟାଃଏ, ଗଦ ନିଜର୍ ସାକାର୍ନେ କାଦି ବିଃନେ କୁଣ୍ଡ୍କେ ମ୍ୟାଃଏ, ମାତର୍ ଇସ୍ରାଏଲ ଆମ୍ୟାଃକେ ଣ୍ଡୁ, ନେଙ୍ଗ୍ନେ ରେମୁଆଁଇଂ ବିତ୍ରେ ବିତ୍ରେ ଆବାସଙ୍ଗ୍ଆର୍ ।"
4 ଆହା ପାପିସ୍ଟ ଜାତି, ଅଦରମ୍ କାମ୍ ଡିଙ୍ଗ୍ନେ ରେମୁଆଁଇଂ, କରାପ୍ କାମ୍ ଡିଙ୍ଗ୍ନେ ବଂସ, ପାପ୍ ଗାଲି ୱେନେ ଗଡ଼େଇଂ ! ମେଇଂ ମାପ୍ରୁକେ ଆନ୍ତାର୍ ବିଃବଆର୍କେ, ମେଇଂ ଇସ୍ରାଏଲନେ ପବିତ୍ର ମାପ୍ରୁକେ ଅମାନି ଡିଙ୍ଗ୍ବଆର୍କେ, ମେଇଂ ଅମାନି ଡିଙ୍ଗ୍ଚେ ଲାଗ୍ଡଆର୍କେ ।
5 ପେଇଂ ଜାବର୍ ଜାବର୍ ବିରଦ୍ କାମ୍ ଡିଙ୍ଗ୍ନ୍ସା ମେଃନ୍ସା ଆରି ମାଡ୍ ପେଚଙ୍ଗ୍ଏ ? ବାଆଃ ଜାକ ଚିନା ଆରି ସାପା ଗାଗ୍ଡ଼େ ଦୁର୍ବଲ୍ ଡିଙ୍ଗ୍ଲେଃକେ ।
6 ଞ୍ଚନେ ଆଲବାନ୍ ବାଆଃ ଜାକ ମେଃଡିଗ୍ ସକତ୍ ଣ୍ଡୁ, ମାତର୍ ଚିନା ଆରି ବାନା ଆରି ଲିସେ ଡିଙ୍ଗ୍ଲେଃକ୍ନେ ଇରିଃ; ଆତାନ୍ ସାପା ଗର୍ଣ୍ଡା ଏଃତେ ଗାଗ୍ ଆବକେ ଣ୍ଡୁ, କି ଞ୍ଚୁ ବାନ୍ କଅଁଲ୍ ଆରାଃଡିଂକେ ଣ୍ଡୁ ।
7 ପେନେ ଦେସ୍ ଦଂସ ଡିଙ୍ଗ୍ଲେଃକ୍ନେ ଜାଗା; ପେନେ ଇନିଇଂ ସୁଆନ୍ୟା ଗିଃୱେଲେଃକେ; ପେନେ ତୁବଃ ବିଦେସିଇଂ ପେନେ ସେଃମଁ ରାଃଆର୍ଏ, ଆତେନ୍ ବିଦେସିଇଂନେ ବାନ୍ ବିନାସ୍ ଡିଂନେ ରକମ୍ ଦଂସ ଜାଗା ଡିଂଲେଃକେ ।
8 ବାରି, ସିୟୋନନେ ସେଲାଅ ଅଙ୍ଗୁର୍ ଲିଜନେ କୁଡ଼ିଆ, ସର୍ଲା ଲିଜନେ ଉଙ୍ଗ୍ଚ୍ୟାଃ, ଗେରେଲେଃକ୍ନେ ଇନି ରକମ୍ ଡିଂଲେଃକେ ।
9 ସାପାବାନ୍ ମ୍ନାଃ ମାପ୍ରୁ ନେଃନେ ନ୍ସାଃ ଜାବର୍ ଗଣ୍ଡା ରେମୁଆଁକେ ବାକି ଆବଗେ ଣ୍ଡୁ, ନେଃ ସଦୋମନେ ରକମ୍ ଆରି ହମୋରାନେ ରକମ୍ ନେଃପାଡିଂ ।
10 ଅ ସଦୋମନେ ସାସନ୍ ଡିଂଣ୍ଡ୍ରେଇଂ, ମାପ୍ରୁନେ ସାମୁଆଁ ଦ୍ରିଗ୍, ଅ ହମୋରାନେ ରେମୁଆଁଇଂ, ପେ ନେନେ ପର୍ମେସର୍ନେ ନିଅମ୍ ଆଡ଼ାତ୍ରା ଦ୍ୟାନ୍ ବିଃପା ।
11 ପର୍ମେସର୍ ବାସଙ୍ଗ୍ଡିଂକେ, "ନେଙ୍ଗ୍ ମ୍ନିରେ ପେ ଜାବର୍ ପୁଜା ଡିଂନେ କାରନ୍ ମେଃନେ ? ନିଂ ମେଣ୍ଡାଇଂନେ ସୁଆ ବଲିଅରିଆ ଆରି ବିଃଚଙ୍ଗ୍କ୍ନେ ପସୁଇଂନେ କ୍ରିଅରିଆ ବର୍ତି ଡିଂନେଲେଃକେ; ବାରି, ଗ୍ଲେଃ କି ମେଣ୍ଡା କି ବଙ୍କାମିଃଇଂନେ ମ୍ମ୍ୟାଁଅରିଆ ନିଂନେ ସାନ୍ତି ଣ୍ଡୁ ।
12 ଉଡ଼ିବେଲା ପେଇଂ ଆନେଙ୍ଗ୍ ଅବାନ୍ସା ପାଙ୍ଗ୍ପେଲେଃଗେ, ଅଃତେନ୍ବେଲା ପେଇଂ ନେଙ୍ଗ୍ନେ ର୍ଣ୍ଣଃସାଙ୍ଗ୍ଅରିଆ ସାପା ଜିନିସ୍କେ ଲେଚାର୍ ପେବିଃକେ । ଜାଣ୍ଡେଃ ଆପେକେ ଏନ୍ ଡିଙ୍ଗ୍ ନ୍ସା ବାସଙ୍ଗ୍ ବକେ ?"
13 ପେଇଂ ଆନେଙ୍ଗ୍ ଆରି ଏନ୍ ଦର୍କାର୍ ଣ୍ଡୁନେ ପୁଜାଇଂ ରାଙ୍ଗ୍ଆପାଙ୍ଗ୍ଗେପା । ପେନେ ଦୁପ୍କେ ନେଙ୍ଗ୍ ଗିନ୍ ଡିଂଣ୍ଡିଂକେ । ପେନେ ଆମାସ୍ କାଲାନେ ପାଣ୍ଡୁଏଃ ବାରି ପୁଣ୍ଡେନେ ଦିନାନେ ପାଣ୍ଡୁଏଃକେ ନେଙ୍ଗ୍ ସାମ୍ୱାଲେ ନ୍ନାୟାକେ ଣ୍ଡୁ । ପେଇଂ ପବିତ୍ର ମ୍ନାଃ କୁକପାର୍ନ୍ୟା ଆଣ୍ଡିଅରିଆ ଅଦରମ୍ ଡିଙ୍ଗ୍ପେବକେ, ଆତାନ୍ ନେଙ୍ଗ୍ ସାମ୍ୱାଲେ ନ୍ନାୟାକେ ଣ୍ଡୁ ।
14 ନେ ଜିବନ୍ ପେଇଂନେ ଆମାସ୍ ଆରି ତିଆର୍ ଡିଙ୍ଗ୍କ୍ନେ ପାଣ୍ଡୁଏଃ ସାପା ଇଙ୍ଗ୍ଚେଃ ମ୍ୟାଃକେ, ଆତାନ୍ ସାପା ନେ ନ୍ସା କସ୍ଟ ରକମ୍, ବାରି ନେ ଆତାନ୍ ସାପା ଡୁଙ୍ଗ୍ ନ୍ସା ଲାକାଃ ନେୱେଗେ ।
15 ପେ ସାପା ନ୍ତି ଆଃଚ୍ଲେଚେ ଆନେଙ୍ଗ୍ ପାର୍ତନା ପେଡିଙ୍ଗ୍ଏ, ମାତର୍ ନେଙ୍ଗ୍ ଇକ୍ଚା ମାଡିଙ୍ଗ୍ଚେ ମ୍ମୁଁଆଃ ଲେମୁଁଆଁଃ ମ୍ୱିଏ । ପେଇଂ ସାପା ଗୁଲୁଏ ପାର୍ତନା ପେଡିଙ୍ଗ୍ଏ, ମାତର୍ ନେଙ୍ଗ୍ ଆତାନ୍ ନ୍ନାଦ୍ରିଗ୍ ଣ୍ଡୁ । ଡାଗ୍ଲା ପେଇଂନେ ନ୍ତି ମ୍ମ୍ୟାଁ ଡିଙ୍ଗ୍ଲେଃକେ ।
16 ପେଇଂ ନିଜେକେ ଆଃବଦ୍ଲେପା, ନିଜେକେ ପର୍ଚଲ୍ ଆଃଡିଙ୍ଗ୍ପା; କରାପ୍ କାମ୍ ଡିଙ୍ଗ୍ନେ ଆନ୍ତାର୍ ବିଃପା; ନେଙ୍ଗ୍ ଆପେକେ କରାପ୍ କାମ୍ ଡିଙ୍ଗ୍ମ୍ୟାକ୍ନେ କିକେ ନ୍ସା ଇକ୍ଚା ଣ୍ଡୁ; କରାପ୍ କାମ୍ ଡିଙ୍ଗ୍ନେ ଆନ୍ତାର୍ ବିଃପା ।
17 ନିମାଣ୍ଡାଃ କାମ୍ ଡିଙ୍ଗ୍ନ୍ସା ସିକେପା; ବିନ୍ଣ୍ଡ୍ରେଇଂନେ ଆଡ଼ାତ୍ରା ସତ୍ ବିଚାର୍ ଚେସ୍ଟା ଡିଙ୍ଗ୍ପା, ମେଃଡିଗ୍ ଆଲେକ୍ନେ ରେମୁଆଁଇଂକେ ସାଆଜ୍ୟ ଡିଙ୍ଗ୍ପା, ଆବା ଣ୍ଡୁନେ ଗଡ଼େଇଂକେ ସତ୍ ବିଚାର୍ ଡିଙ୍ଗ୍ପା, ଗୁଏଃସାଙ୍ଗ୍କୁଏଃଇଂକେ ସାଇଜ ଡିଙ୍ଗ୍ପା ।
18 ମାପ୍ରୁ ବାସଙ୍ଗ୍ଡିଂକେ, ଏଲାପା, ନେଙ୍ଗ୍ ଏଃତେ ବାଃଲିର୍ବାଃତାପା; ପେଇଂନେ ପାପ୍ ମିଆଁ ବାନା ରକମ୍ ଡିଙ୍ଗ୍ଲା ଡିଗ୍ ଆରେଣ୍ଡ୍ୟାଃ ରକମ୍ ତୁଲୁଏଏ; ବାରି ପେଇଂନେ ପାପ୍ ଚିରାଃ ତ୍ନାଲା ଡିଗ୍ ତ୍ମିକ୍ନେ ତୁଲେ ପାଟେଇ ରକମ୍ ଡିଙ୍ଗ୍ଏ ।
19 ଜଦି ପେ ନେଙ୍ଗ୍ନେ ସାମୁଆଁ ଆଡ଼ାତ୍ରା ଦ୍ୟାନ୍ ପେବିଏ ବାରି ନେଙ୍ଗ୍ନେ ସାମୁଆଁ ପେମାନେଃଏ, ତେଲା ପେ ଦେସ୍ନେ ନିମାଣ୍ଡା ନିମାଣ୍ଡା ଚୁଚୁ ପେଚଙ୍ଗ୍ଏ ।
20 ମାତର୍ ଜଦି ପେ ନେଙ୍ଗ୍ ସାମୁଆଁ ଆଡ଼ାତ୍ରା ଦ୍ୟାନ୍ ପେବିଃ ଣ୍ଡୁ ଆରି ନେଙ୍ଗ୍ନେ ବିରଦ୍ରେ କାମ୍ ପେଡିଙ୍ଗ୍ଏ, ତେଲା ଆପେକେ କାଣ୍ଡା ଏତେ । ମେଃଡାଗ୍ଲା ସଦାପ୍ରବୁ ନିଜେ ଆକାନ୍ ସାମୁଆଁ ବାସଙ୍ଗ୍ବକେ ।
ପାପ୍ରେ ବର୍ତି ଡିଂଲେକ୍ନେ ଇନି
21 ବିସ୍ବାସ୍ ବକ୍ନେ ଇନି ଡିରକମ୍ ଦାରି ଡିଂଲାଏଃକେ ! ମେଁ ନ୍ୟାୟ୍ ବିଚାର୍ ଡିଙ୍ଗ୍ସା ଇକ୍ଚା ଡିଂଲେଗେ । ଦରମ୍ ମେଡାଗ୍ରା ବାସାକେ ମାତର୍ ଏବେ ରେମୁଆଁ ବାଗୁଏଃରେ ଲେଃଆର୍କେ ।
22 ପେନେ ରୁପା ସିଲିମ୍ ସାଃ ଲେଃକେ, ପେନେ ଅଙ୍ଗୁର୍ ରସ୍ନିଆ ଣ୍ଡିଆ ମିସୁଃ ଲେଃକେ ।
23 ନାଁନେ ମୁକିଆଇଂ ବିରଦି ଡିଙ୍ଗ୍ଲେଆର୍କେ; ବାରି ଡଙ୍ଗାରେଇଂନେ ସାଙ୍ଗ ଡିଙ୍ଗ୍ଲେଃଆର୍କେ; ପେନେ ସାପା ନେତାଇଂ ଲାଞ୍ଚ୍କେ ବଲ୍ ବାମ୍ୟାଃଆର୍କେ; ଅନ୍ୟାୟ୍ କାମ୍ ନ୍ସା ବଲ୍ ବାମ୍ୟାଃଆର୍କେ; ବାରି ଆତାନ୍ ସାସନ୍ ଡିଙ୍ଗ୍ଣ୍ଡ୍ରେକେ ନାଲେଚେ ଡାବୁ ରାଙ୍ଗ୍ଡ ମ୍ୟାଃଆର୍କେ; ପେନେ ଆତାନ୍ ସାସନ୍ ଡିଙ୍ଗ୍ଣ୍ଡ୍ରେ ଅରେଉଂ ଗଡ଼େଇଂକେ ବାରି ଗୁଏସାଙ୍ଗ୍କୁଏଇଂକେ ମେଇଂନେ ଦର୍କାର୍ ବେଲା ସାଇଜ ଆଡିଙ୍ଗ୍ଆର୍ ଣ୍ଡୁ ।
24 ଏନ୍ସା ମାପ୍ରୁ, ସାପାଟୁ ମ୍ନା ମାପ୍ରୁ, ଇସ୍ରାଏଲ୍କେ ବପୁ ବିଃଣ୍ଡ୍ରେ ବାସଙ୍ଗ୍ମ୍ୟାଃକେ, ଆଁ ! "ନେଙ୍ଗ୍ ନେଙ୍ଗ୍ନେ ସତ୍ରୁଇଂନେ ବିସଏରେ ଆରାମ୍ ମ୍ବାଏ ଆରି ନେଙ୍ଗ୍ ନେଙ୍ଗ୍ନେ ସତ୍ରୁଇଂକେ ଡଣ୍ଡ୍ ମ୍ୱିଏ ।
25 ବାରି, ନେଙ୍ଗ୍ ନା ପାକା ନେଙ୍ଗ୍ନେ ନ୍ତି ଆଃଆଣ୍ଡେଚେଃ ନାନେ ଜଙ୍କ୍ ପୁରାପୁରି ବାବ୍ରେ ସପା ନେଡିଂଏ ଆରି ନାନେ ସାନ୍ଦି ସାପା ରାଃଡୁଙ୍ଗ୍ନେଡଏ ।
26 ଅଃସେନେ ବେଲା ରକମ୍ ନେଙ୍ଗ୍ ବିଚାର୍ ଡିଙ୍ଗ୍ଣ୍ଡ୍ରେକେ ୱା ରାଙ୍ଗ୍ମ୍ପାଙ୍ଗ୍ଏ । ଅଃସେନେ ବେଲା ରକମ୍ ପେନେ ମନ୍ତ୍ରୀଇଂନେ ରକମ୍ ଆଦେସ୍ ବିଃନେ ରେମୁଆଁକେ ବାର୍ମୁଇଂତର୍ ତିଆର୍ ଣ୍ଡିଙ୍ଗ୍ଏ । ଏନ୍ ଇଡ଼ିଙ୍ଗ୍ ପେ ଦରମ୍ ଆରି ବିସ୍ବାସ୍ ଲେଃକ୍ନେ ସହର୍ ଡାଗ୍ଚେ ପେମ୍ୟାଏ ।"
27 ସିୟୋନ ନ୍ୟାୟ୍ ବିଚାର୍ ଏତେ ଆରି ମେଁନେ ଆଣ୍ଡେ ପାଙ୍ଗ୍ନେ ରେମୁଆଁଇଂ ଦାର୍ମିକ୍ ଏଃତେ ମୁକ୍ତି ବାଆର୍ଏ ।
28 ମାତର୍ ସାପାରେନେ ଅଦରମ୍ ରେମୁଆଁଇଂ ବାରି ପାପି ରେମୁଆଁଇଂ ସାପା ନସ୍ଟ ଡିଙ୍ଗ୍ଆର୍ଏ । ଜାଣ୍ଡେଇଂ ମାପ୍ରୁକେ ଅମାନି ଡିଙ୍ଗ୍ଆର୍ଏ, ମେଇଂ ଗୁଏ ଆର୍ଏ ।
29 ମେଃଡାଗ୍ଲା ମେଇଂ ପେନେ ଉଂପେବକ୍ନେ ଅଲୋନ1:29 ଇସ୍ରାଏଲ୍ନେ ଦକିନ୍ ଦିଗ୍ ପାକା ଣ୍ଡିଆ ଣ୍ଡୁନେ ଜାଗାନ୍ନିଆ ଆକେନ୍ ସ୍ଲାଃ ତ୍ନା ମ୍ୟାଃକେ । ସ୍ଲାଃ ବିସଏରେ ଗିଆସ ପେଡିଙ୍ଗ୍ଏ । ଆରି, ପେ ବାଚେପେବକ୍ନେ ଡୁଗ୍ଡିନିଆ ଲେଃକ୍ନେ ସାପା ବିସଏରେ ନିରାସ୍ ପେଡିଙ୍ଗ୍ଏ ।
30 ମେଃଡାଗ୍ଲା ପେ ନ୍ସାର୍କ୍ନେ ଉଲିଆ ଅଲୋନ୍ ସ୍ଲାଃ ରକମ୍ ଆରି ଣ୍ଡିଆ ଣ୍ଡୁନେ ଡୁଗ୍ଡି ରକମ୍ ପେଡିଙ୍ଗ୍ଏ ।
31 ବପୁ ଲେଃକ୍ନେ ରେମୁଆଁ ନ୍ସାର୍କ୍ନେ ଣ୍ଡ୍ରାସ ରକମ୍ ଡିଙ୍ଗ୍ଏ ଆରି ମେଁନେ କାମ୍ ପୁଟୁଆଃସ ରକମ୍ ଡିଙ୍ଗ୍ଏ; ଆତାନ୍ ମ୍ୱାୟା ମୁଇଂମାଡ୍ରେ ଗିଃଆର୍ଏ ଆରି ଜା ଆତେନ୍ ସୁଆକେ ଆଃଲିଗ୍ ଆୟାଆର୍ ଣ୍ଡୁ ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)