ଜିସାୟ 32

ମୁଇଂ ଦରମ୍‌ ଇଃସାଙ୍ଗ୍‌

1 କେଲା, ମୁଇଂ ଇଃସାଙ୍ଗ୍‌ ଦର୍ମ ବାବ୍‌ରେ ସାସନ୍‌ ଡିଂଏ ଆରି ନେତାଇଂ ନ୍ୟାୟ୍‌ ବାବ୍‌ରେ ସାସନ୍‌ ଡିଂଆର୍‌ଏ । 2 ବାରି, ସର୍‌ତେ ରେମୁଆଁ ଦୁକ୍‌ କସ୍‌ଟବାନ୍‌ ବାସାନେ ବାଆର୍‌ଏ ଆରି ୱେଡ଼୍ୟାଃଗୁର୍ୟାଃବାନ୍‌ ବାସାନେ ବାଆର୍‌ଏ, ନ୍‌ସାର୍‌କ୍ନେ ଜାଗା‍ନିଆ ଜଲା ଣ୍ଡିଆ ରକମ୍‌ ଡିଙ୍ଗ୍‌ଏ, ଗରମ୍‌ ଲେକ୍ନେ ତୁବନିଆ ମ୍ନାନେ ତାଲେବିର୍‌ନେ ନ୍‌ଲୁଡ଼ିଆଃ ରକମ୍‌ ଡିଂଏ । 3 ବାରି, କିକେଡ଼େଙ୍ଗ୍‌ ରେମୁଆଁଇଂନେ ମ୍‌ମୁଁଆଃ ଜାପ୍‌ସା ଆଡିଂ ଣ୍ଡୁ ଆରି ଦ୍ରିଗ୍‌ନେ ରେମୁଆଁଇଂନେ ନ୍‌ଲୁଗ୍‌ ମନ୍‌ଦିଆନ୍‌ ବିଃଏ । 4 ଆରି, ବୁଦି ମାଲେଃନେ ରେମୁଆଁନେ ବୁଦି ଜ୍ଞାନ୍‌ ବାଏ ଆରି ତଃତ୍ଲାଇଂନେ ନ୍‌ଲିୟା ସ‍ଅଜ୍‌ରେ ନିମାଣ୍ଡାଃ ବାବ୍‌ରେ ସାମୁଆଁ ବାସଙ୍ଗ୍‌ଏ । 5 ମୁର୍କ ରେମୁଆଁକେ ମ୍ନାରେ ଡାଗ୍‌ଚେ ସନ୍‌ମାନ୍‌ ଆବି ଆର୍‌ କି ମିଚୁଆ ରେମୁଆଁକେ ସନ୍‌ମାନ୍‌ ଆବି ଆର୍‌ ଣ୍ଡୁ । 6 ମେଃଡାଗ୍‌ଲା ମୁର୍‌କରେ ମୁର୍‌କ ରକମ୍‌ ବେବ‍ଆର୍‌ ଡିଂନ୍‌ସାଃ ଆରି ସଦାପ୍ରବୁନେ ବିରୁଦ୍‌ରେ ମେଁ ଅର୍ତ ଣ୍ଡୁନେ ସାମୁଆଁ ବାସଙ୍ଗ୍‌ ନ୍‌ସାଃ, କିଡ଼େସଃ ରେମୁଆଁନେ ପାରାନ୍‌କେ କେଡ଼େସ ବନ୍‌ସା ଆରି ଉଗ୍‌ଡ୍ୟାଃରେନେ ଣ୍ଡିଆଃ ଉଗ୍‌ନେ ମନା ଆଃଡିଂ ନ୍‌ସାଃ ମୁର୍କ ରେମୁଆଁ ଦୁସ୍‌ଟନେ ସାମୁଆଁ ବାସଙ୍ଗ୍‌ଏ ଆରି ମେଁନେ ମନ୍‌ ଅଦରମ୍‌ ବିସୟ୍‌ରେ ଚିନ୍ତା ଡିଂଏ । 7 ଆରି, ଦୁସ୍‌ଟ ରେମୁଆଁନେ ଉପାୟ୍‌ ସାପା ଦଦ୍ୟା; ମେଁ ଦରମ୍‌ ରେମୁଆଁକେ, ଆରି, ସତ୍‌ ସାମୁଆଁ ବାସଙ୍ଗ୍‌ନେ ବେଲା ଗରିବ୍‌ରେକେ ନାଲେନେ ସାମୁଆଁ ବାନ୍‌ ବିନାସ୍‌ ଆଃଡିଂନେ ନ୍‌ସାଃ କରାପ୍‌ ଚିନ୍ତା ଡିଂଏ । 8 ମାତର୍‌ ମ୍ନାରେ ମ୍ନାଃରେ ଏଃତେ ଅଡ଼୍‌କା ଅଡ଼୍‌କି ଡିଙ୍ଗ୍‌ଏ ଆରି ମେଁ ମ୍ନାରେନେ ଆଦେସ୍‌ନେ ଚେସ୍‌ଟାରେ ବୁଙ୍ଗ୍‌ ଲେଃଏ ।

ବିଚାର୍‌ବାନ୍‌ ଉଦାର୍‌ ବାନେ

9 ଅ ସୁକ୍‌ରେ ବ୍ରୁଆଡିଂକ୍ନେ ସେଲାମ୍ବୁଏଃଇଂ, ପେ ତଃଡ଼ିଆଃଚେ ନିଂନେ ସାମୁଆଁ ଦ୍ରିଗ୍‌ପା, ଅ ଚିନ୍ତା ମାଡିଂନେ ସେଲାଇଂ, ନିଂନେ ସାମୁଆଁଅରିଆ ନ୍‌ଲୁଗ୍‌ ଆଃନ୍ୟାଲୁଗ୍‌ପା । 10 ଅ ଚିନ୍ତା ମାଡିଂନେ ସେଲାମ୍ବୁଏଃଇଂ, ପେ ମୁଇଂ ମୁଆଁ ବିତ୍‌ରେ ଉଃଡ଼ିସି ସାର୍‌ଦା ପେଡିଙ୍ଗ୍‌ଏ; ମେଃଡାଗ୍‌ଲା ଅଙ୍ଗୁର୍‌ ଚୁଚୁନେ ଅବାବ୍‌ ଡିଂଏ, ଚୁଚୁ ରୁଏଃନେ ବେଲା ଆପାଙ୍ଗ୍‌ ଣ୍ଡୁ । 11 ଅ ସୁକ୍‌ରେ ବ୍ରୁଆଡିଂକ୍ନେ ସେଲାମ୍ବୁଏଃଇଂ, ପେ ଇରିୟାଃତୁଗ୍‌ପା; ଅ ଚିନ୍ତା ମାଡିଂନେ ସେଲାମ୍ବୁଏଃଇଂ ବୁଟମେଗ୍‌ପା; ପାଟାଇ ତଃଡ଼ାଙ୍ଗ୍‌ଚେ ଆରି ପେନେ ନ୍‌ସାଃଅରିଆ ବାସ୍ତା ଗର୍ଣ୍ଡା ଗାଗ୍‌ପା । 12 ମେଇଂ କତ୍‌ ଲିଜ ଆତ୍ଲା ଆରି ଜାବର୍‌ ଚୁଚୁ ଚୁକ୍ନେ ଅଙ୍ଗୁର୍‌ ଚୁଚୁ ନ୍‌ସାଃ ଗ୍ରିଅରିଆ ବଗ୍‌ଆର୍‌ଏ । 13 ନିଂନେ ରେମୁଆଁଇଂନେ ତୁବଃ ଗ୍ରେଃ ଆରି ଗ୍ରେଃ ଲାଟାନେ*32:13 ସ୍ଲାଃଇଂ ଡିଂଏ; ଅଁ, ସାର୍‌ଦା ଡିଙ୍ଗ୍‌ନେ ଇନିନିଆ ସାପାରେ ସାର୍‌ଦା ଲେକ୍ନେ ଡୁଆ ଆତେନ୍‌ ଆଃ ଡିଂଏ; 14 ମେଃଡାଗ୍‌ଲା, ରାଜା ବାସାନେ ଡୁଆ ଆଃଆନ୍ତାର୍‌ଏ ଆରି ରେମୁଆଁ ପୁରୁନ୍‌ ଡିଂଲେଃକ୍ନେ ଇନି ରେମୁଆଁ ଖାଲି ଡିଂୱେଏ; କଣ୍ଡା ଆରି ଉର୍‌ଣ୍ଡ୍ରେନେ ଡୁଆ କାଲାଆଃ ନ୍‌ସାଃ ଗୁମ୍ଫା ଡିଂଏ, କଣ୍ଡାନେ ଗଦ‍ଇଂନେ ବାସାନେ ଜାଗା ଆରି ପସୁ ରାସିନେ ଚଙ୍ଗାଃନେ ଜାଗା ଡିଂଏ । 15 ଆତେନ୍‌ କାଲା ଆଡ଼ାତ୍ରାବାନ୍‌ ନେ ଆଡ଼ାତ୍ରା ଆତ୍ମା କିଗ୍‌ ବିଃଲା ବାଲିଲ କତ୍‌ଲିଜ ଡିଂଏ ଆରି କତ୍‌ଲିଜ କଣ୍ଡା ଡାଗ୍‌ଚେ ବାସଙ୍ଗ୍‌ ଆର୍‌ଏ । 16 ଅଃତେନ୍‌ବେଲା ତେନ୍‌ ବାଲିଲନ୍ୟା ନ୍ୟାୟ୍‌ରେ ବାସାଆର୍‌ଏ ଆରି କତ୍‌ ଜାଗା‍ଅରିଆ ଦରମ୍‌ରେ ବାସା ଆର୍‌ଏ । 17 ବାରି, ଦରମ୍‌ରେନେ କାମ୍‌ ସାନ୍ତି ଡିଂଏ; ଆରି, ଦରମ୍‌ରେନେ ଚୁଚୁ କାଲାଆଃ ସାନ୍ତି ଆରି ମାବ୍‌ଟଚେ ଲେଃଏ । 18 ବାରି, ନିଂନେ ରେମୁଆଁଇଂ ସାନ୍ତିରେ ଲେକ୍ନେ ଜାଗା‍ଅରିଆ, ଡାଟ୍‌କ୍ନେ ବାସାନେ ଜାଗା‍ଅରିଆ ଆରି ସାନ୍ତିରେ ବାସାନେ ଜାଗା‍ଅରିଆ ବାସାଆର୍‌ଏ । 19 ମାତର୍‌ କଣ୍ଡା ଦଂସ ଡିଂକ୍ନେ ଜାଗା‍ଅରିଆ ଆରେଣ୍ଡିଆ ଗୁର୍‌ଏ ଆରି ଇନି ପୁରାପୁରି ବାବ୍‌ରେ ଦଂସ ଡିଂଏ । 20 ଣ୍ଡିଆଃ ଲେଃକ୍ନେ ଜାଗା ସାପା‍ଅରିଆ ଚ୍ମୁ ବିଗ୍‌ ନାଡିଂକେ ଆରି ଅରେଃ ଗଦ‍ଇଂକେ ବାଏରେ ବେନାଡିଂକେ ଜେ ପେ, ପେ ଉଃଡ଼ି ନିମାଣ୍ଡାନେ ରେମୁଆଁଇଂ ।