1 ନା ନାଡଙ୍ଗାଲା ଡିଗ୍‌ ଡଙ୍ଗାନାଡିଂକେ ଜେ ନାଁ; ବାରି, ରେମୁଆଁଇଂ ନାଁ ଆଡ଼ାତ୍ରା ଅବିସ୍‌ବାସ୍‌ ଆଡିଂଲା ଡିଗ୍‌ ଅବିସ୍‌ବାସ୍‌ ଡିଂନାଡିଂକେ ଜେ ନାଁ, ନାଁ ଡଣ୍ଡ୍‌ ବାନେ ରେମୁଆଁ ! ନାଁ ଡଙ୍ଗାନେ ଆଃଡାକ୍ନେ ଇଡ଼ିଂ ନାଡଙ୍ଗାଏ ଆରି ଅବିସ୍‌ବାସ୍‌ ଡିଂନେ ଆଃଡାକ୍ନେ ଇଡ଼ିଂ ରେମୁଆଁଇଂ ନାଁ ଆଡ଼ାତ୍ରା ଅବିସ୍‌ବାସ୍‌ ଡିଂଆର୍‌ଏ । 2 ଅ ସଦାପ୍ରବୁ, ନେ ଆଡ଼ାତ୍ରା ଦୟା ଡିଂ; ନେ ଆନାକେ ଉର୍‌ନେଲେଃକେ; ନାଁ କାଲାଆଃ ଞ୍ଜିର୍‌ ମେଇଂନେ ନ୍ତିନେ ପଞ୍ଜା ରକମ୍‌ ଡିଂ, ବିପଦ୍‌ ବେଲା ଡିଗ୍‌ ନେନେ ଉଦାର୍‌ ରକମ୍‌ ଡିଂ । 3 ୱିଙ୍ଗ୍‌ଆଃ ରିଙ୍ଗ୍‌ଆଃ ସବ୍‌ଦରେ ରେମୁଆଁଇଂ ଡ‍ଆର୍‌କେ, ନାଁ ନାତଃଡ଼ିଆଃଲା, ବିନ୍‌ ଦେସ୍‌ନେ ରେମୁଆଁଇଂ ଚିନ୍‌ବିନ୍‌ ଡିଂଆର୍‌କେ । 4 ବାରି, ଡିରକମ୍‌ ଗିତାଙ୍ଗ୍‌ଡ଼୍ୟାଃ ମୁଇଂନୁଗ୍‌ ରିସିଙ୍ଗ୍‌ଆର୍‌ଏ, ଦେତ୍‌ରକମ୍‌ ପେନେ ଡଙ୍ଗାପେବକ୍ନେ ଜିନିସ୍‌ ରିସିଙ୍ଗ୍‌ଏ; ଡିରକମ୍‌ ଗିତାଙ୍ଗ୍‌ଡ଼୍ୟାଃଇଂ ପୁଏଃଆର୍‌ଏ, ଦେତ୍‌ରକମ୍‌ ରେମୁଆଁଇଂ ଆଃ ତେନ୍‌ ଆଡ଼ାତ୍ରା ପୁଏଃଆର୍‌ଏ । 5 ସଦାପ୍ରବୁ ସାପାବାନ୍ ମ୍ନାଃ; ମେଃଡାଗ୍‌ଲା ମେଁ କିତଙ୍ଗ୍‌ ଇନି ବାସା ଡିଂକେ; ମେଁ ସିୟୋନକେ ନ୍ୟାୟ୍‌ ବିଚାର୍‌ ଆରି ଦର୍ମ ସାମୁଆଁରେ ଆଃତ୍ନବକେ । 6 ବାରି, ନାଁନେ ବେଲା ସାନ୍ତି ଡିଂଏ; ଉଦାର୍‌ନେ, ବୁଦିନେ ଆରି ବୁଦିନେ ବପୁ ଡିଂଏ; ସଦାପ୍ରବୁ ବିସ‍ଏରେ ବୁଟମେଗ୍‌ନେ ମେଁନେ ଦନ୍‌ ଡିଂଏ । 7 କେଲା, ମେଇଂନେ ଜୁଦ୍‌ ଡିଂନେ ରେମୁଆଁଇଂ ବାଏରେ ଅଃଆର୍‌ଡିଙ୍ଗ୍‌କେ । ସାନ୍ତି ତୁର୍‌ନେ କବର୍ ବିଃଣ୍ଡ୍ରେ ଜାବର୍‌ ଅଃଡିଂଆର୍‌କେ । 8 ଅସାର୍‌ ଗାଲି ସାପା ସୁନ୍‌ସାନ୍‌ ଡିଂଲେଃକେ, ଅଲେଙ୍ଗ୍‌ଣ୍ଡ୍ରେ ଜାଡିଗ୍‌ ଣ୍ଡୁ; ମେଁ ନିଅମ୍ ବାଙ୍ଗେବକେ, ମେଁ ଇନି ସାପାକେ ଇନ୍‌ ଡିଂବକେ, ମେଁ ରେମୁଆଁକେ ମେଃଡିଗ୍ ଆବାବେକେ ଣ୍ଡୁ । 9 ଦେସ୍‌ ଅଃଚେ ଲୁଏ ୱେଡିଂକେ; ଲିବାନୋନ୍‌ ଗିଆସଃଚେ ନ୍‌ସୁଆରିୟାଃ ୱେଡିଂକେ; ଶାରୋଣନେ କତ୍‌ଲେକ୍ନେ କଣ୍ଡା ବାଲିଲଃ ରକମ୍‌ ଡିଂଲାଏଃକେ; ବାରି ବାଶନ୍‌ ଆରି କର୍ମିଲ୍‌ କଣ୍ଡାନେ ଉଲିଆଃ ଜୁର୍‌ ବିଃଡିଂକେ ।

10 ମାପ୍‌ରୁ ବାସଙ୍ଗ୍‌ଡିଂକେ, "ନେ ଏବେ ନେତଃଡ଼ିଆଃଏ," "ନେ ଏବେ ନିଜେକେ ନେରାଃତଡ଼ିଆଃଏ; ନେ ଏବେ ମ୍ନାଃ ନେଡିଂଏ । 11 ପେ ଅପବିତ୍ର ବିସୟ୍‌ ସାପା ମନେ ତ୍ଲାଗ୍‌ ପେଡିଙ୍ଗ୍‌କେ । ବାରି ଡିଙ୍ଗ୍‌ଆଡିଂକ୍ନେ କାମ୍‌ ସାପା ଡିଙ୍ଗ୍‌ପେଡିଙ୍ଗ୍‌କେ । ନେନେ ଆତ୍ମା ସୁଆ ରକମ୍‌ ଡୁଆଡିଙ୍ଗ୍‌କେ । ଆତେନ୍‌ ଆପେକେ ବିନାସ୍ ଆଡିଙ୍ଗ୍‌ଏ । 12 ବାରି, ଦେସ୍‌ନେ ରେମୁଆଁଇଂ ଡୁଆଲେକ୍ନେ ଉକ୍‌ସ ରକମ୍‌ ଚୁନ୍‌ ଡିଙ୍ଗ୍‌ଲାଏକେ ଆରି ସୁଆ‍ଅରିଆ ଗିଃକ୍ନେ ସିଃତଗ୍‌କ୍ନେ ଗ୍ରେଃ ରକମ୍‌ ଡିଂଆର୍‌ଏ । 13 ଅ ସ୍ଲ ସ୍ଲ ବାସାକ୍ନେ ରେମୁଆଁଇଂ, ପେ ନେ ନେଡିଂକ୍ନେ କାମ୍‌ନେ ସାମୁଆଁ ଦ୍ରିଗ୍‌ପା; ବାରି, ଅ ଡାଗ୍ରା ଡାଗ୍ରା ବାସାକ୍ନେ ରେମୁଆଁଇଂ, ପେ ନେନେ ବପୁ ମ୍ୟାଃ ଲାଃଲାପା ।" 14 ସିୟୋନ‍ଅରିଆ ପାପି‍ଇଂ ବୁଟ ୱେଆର୍‌କେ; ଅଦରମ୍‌ ରେମୁଆଁଇଂ ଇରିୟାଃତୁଗ୍‌ ମାର୍ୟାଃତୁଗ୍‌ ଆକ୍ରମନ୍ ଡିଙ୍ଗ୍‌ବକେ । ନେ ବିତ୍ରେବାନ୍‌ ଜା ଜାବର୍‌ ଡୁଆନେ ସୁଆ ବିତ୍ରେ ଲେଃ ୟାଏ ? ନେ ବିତ୍ରେବାନ୍‌ ଜା ମାଡାନେ କାଲ୍‌ ଜାକ ଡୁଆଲେଃନେ ସୁଆ ବିତ୍ରେ ବାସାଚେଃ ଲେଃ ୟାଏ ? 15 ମୁଃଡ଼ି ରେମୁଆଁ ସତ୍‌ ଗାଲି ଅଲେଙ୍ଗ୍‌ଏ ଆରି ଜା ଦରମ୍‌ ସାମୁଆଁ ବାସଙ୍ଗ୍‌ଏ; ମୁଃଡ଼ି ରେମୁଆଁ କାରାପ୍‌ବାନ୍‌ ତାର୍‌କ୍ନେ ସାଃନେ ସାମୁଆଁବାନ୍‌ ମନା ଡିଙ୍ଗ୍‌ଏ ଆରି ଲାଞ୍ଚ୍‌ ବାନେ ବିସୟ୍‌ରେ ମେଁନେ ନ୍ତି ସାତ୍‌ ଆବି ଣ୍ଡୁ, ଜା ରେମୁଆଁ ବାଗୁଏବକ୍ନେ ସାମୁଆଁ ଦ୍ରିଗ୍‌ନେବାନ୍‌ ନିଜେନେ ନ୍ଲୁଗ୍‌ ବନ୍ଦ୍‌ ଆଃଡିଂଏ, ବାରି ମୁଇଂଡାକେ କାରାପ୍‌ କାମ୍‌ ଡିଂନେ କିକେନେବାନ୍‌ ନିଜେନେ ମ୍‌ମୁଁଆଃ ବନ୍ଦ୍‌ ଆଡିଂଏ; 16 ମେଁ ତିଆର୍‌ ଜାଗା‍ଅରିଆ ବାସାଏ; ତାଲେବିର୍‌ଇଂନେ ସ୍ଲଃ ଲାଏଃକ୍ନେ ଜାଗା ମେଁନେ ମ୍ନା ଡୁଆ ରକମ୍‌ ଡିଂଏ; ମେଁନେ ଚଙ୍ଗ୍‌ନେ କାଦି ଆମେକେ ବିଃଏ; ଆମେକେ ଣ୍ଡିଆଃ ଆରି ଅବାବ୍‌ ଆଡିଂ ଣ୍ଡୁ ।

17 ନାନେ ମ୍‌ମୁଁଆଃ ଇଃସାଙ୍ଗ୍‌କେ ମେଁନେ ସବା କେଏ; ଆରି‍ ଚ୍ଲେ ଅସାର୍‌ ଲେକ୍ନେ ଦେସ୍‌କେ କେଏ । 18 ନାନେ ମନ୍‌ ବୁଟମେଗ୍‌ନେ ସାମୁଆଁକେ ବିରଦ୍‌ ଡିଂଏ; ତେନ୍‌ ଏଜାନେ ରେମୁଆଁ ଆଣ୍ଡିକାଃ ? ଡାବୁ ଅଜନ୍‌ ଆଃଡିଂଣ୍ଡ୍ରେ ଆଣ୍ଡିକାଃ ? ତିଆର୍‌ ଡୁଆ ଆସୁଏନେ ରେମୁଆଁ ଆଣ୍ଡିକାଃ ? 19 ନା ଆତେନ୍‌ ଦୁଷ୍ଟ ଜାତିକେ, ଡାଗ୍‌ଲା, ଜା ଜାନେ ବିତ୍ରେନେ ବ୍ନାସା ନା ମ୍ୟାଃ ନାୟାକେ, ଜା ଜାନେ ବିଦେସି ବ୍ନାସା ବୁଜେ ନାୟାକେ ଣ୍ଡୁ, ଆତେନ୍‌ ଜାତିକେ ଆରି ନାକେ ଣ୍ଡୁ । 20 ନେନେ ପବିତ୍ର କୁକପାର୍‌ ଜାଗା ସିୟୋନ ଇନି ଆଡ଼ାତ୍ରା କେଲାପା; ନାନେ ମ୍‌ମୁଁଆଃ ସାନ୍ତିମୟ୍‌ ବାସାନେ ଜାଗା ଯିରୂଶାଲମକେ କେଏ, ଆତେନ୍‌ ମାତୁଗ୍‌ନେ କୁଡ଼ିଆ ରକମ୍‌, ଆତ୍‌ନେ ସାପା କୁଟି ଅଃନାଡିଗ୍‌ ଆତଃ ଣ୍ଡୁ, କି ଆତ୍‌ନେ ମେଃଡିଗ୍‌ ଗେହେଃ ଆତେଗ୍‌ଚି ଣ୍ଡୁ । 21 ମାତର୍‌ ଆତ୍‌ଅରିଆ ମାପ୍‌ରୁନେ ବପୁ ନେ ଏଃତେ ଲେଃଏ, ଅସାର୍‌ ଲଣ୍ଡିଆଃ ଆରି ଜଲାଡ଼୍ୟାଃ ରକମ୍‌ନେ ଜାଗା ରକମ୍‌ ଡିଂଏ; ଆତେନ୍‌ ଜାଗା‍ଅରିଆ ୱାଣ୍ଡିଆଃନେ ତରା ଆତେନ୍‌ ଗାଲି ଆୱେ ଣ୍ଡୁ, କି ମ୍ନାଃ ଜାଆଜ୍‌ ଆତେନ୍‌ ଗାଲି ପାକା ଆଚିଙ୍ଗ୍‌ଲେ ଣ୍ଡୁ । 22 ମେଃଡାଗ୍‌ଲା ମାପ୍‌ରୁ ନେନେ ବିଚାର୍‌ ଡିଂଣ୍ଡ୍ରେ, ମାପ୍‌ରୁ ନେନେ ଆଇନ୍‌ ବିବିଃଣ୍ଡ୍ରେ, ମାପ୍‌ରୁ ନେନେ ଇଃସାଙ୍ଗ୍‌, ମେଁ ନେନ ପାପ୍‌ବାନ୍‌ ରକ୍ୟା ଡିଂଏ । 23 ନାନେ ପିଆଲ୍‌ ଗେହେଃ ସାପା ପୁଏଃଚଗ୍‌ ୱେଲେଃକେ, ଆତେନ୍‌ ସାପା ନିଜେନେ ଅଲାସକେ ଡାଟ୍‌ ଆରି ପିଆଲ୍‌କେ ଅସାର୍‌ ଆଃଡିଂ ଆୟାକେ ଣ୍ଡୁ; ଅଃତେନ୍‌ବେଲା ଜାବର୍‌ ଡଙ୍ଗାକ୍ନେ ଜିନିସ୍‌ ବାଗ୍‌ ବାଗ୍‌ ଆଃଡିଂକେ; ଚଟା ରେମୁଆଁ ଡଙ୍ଗାକ୍ନେ ଜିନିସ୍‌ ସାଃକେ । 24 ବାରି, ନିଂ ଆଃସି ନ୍ଲେଃକେ ଡାଗ୍‌ଚେ ସିୟୋନ ଇନିଣ୍ଡ୍ରେ ଆବାସଙ୍ଗ୍‌ଆର୍‌ ଣ୍ଡୁ; ଆରି ଆତ୍‌ଅରିଆ ବାସାକ୍ନେ ରେମୁଆଁଇଂନେ ପାପ୍‌ କେମା ଆଃଡିଂବିଃଏ ।