ଜିସାୟ 53

1 ନେନେ ସାମୁଆଁ ଜା ବିସ୍‌ବାସ୍‌ ଡିଙ୍ଗ୍‌ବକେ ? ଆରି ମାପ୍‌ରୁନେ ନ୍ତି ଜା ଡାଗ୍ରା ତ୍ନା ଲାଏଃକେ ? 2 ମେଃଡାଗ୍‌ଲା ମେଁ ମେଁନେ ମ୍‌ମୁଁଆଃଅରିଆ ଚେମୁଆଁ ରକମ୍‌ ଆରି ନ୍‌ସୁଆର୍‌କ୍ନେ ତୁବଃବାନ୍‌ ତାର୍‌ଲାଏଃକ୍ନେ ବୁନ୍ଦ୍‌ ରକମ୍‌ ମ୍ନାଃଆର୍‌କେ; ମେଁନେ ରୁପ୍‌ କି ସୁନ୍ଦର୍‌ ଣ୍ଡୁ; ବାରି, ଆମେକେ କେଲା, ନେଃ ଜେ ସାର୍ଦା ନେଃଡିଂଏ, ମେଁନେ ଦେକ୍‌ରକମ୍‌ ସୁନ୍ଦର୍‌ ଣ୍ଡୁ । 3 ମେଁ ଆମ୍ୟାଃକ୍ନେ ଆରି ରେମୁଆଁନେ ଆନ୍ତାର୍‌ବିଃବକେ; ଦୁକ୍ ରେମୁଆଁ ଆରି କସ୍‌ଟରେ ଲେକ୍ନେ ରେମୁଆଁଇଂ, ବାରି ରେମୁଆଁଇଂ ଜାନେବାନ୍‌ ସାର୍ମୁଆଃ ବୁଃଡ଼ି ଡିଂଆର୍‌କେ, ଦେକ୍‌ରକମ୍‌ ରେମୁଆଁ ରକମ୍‌ ମେଁ ଆମ୍ୟାଃକ୍ନେ ଡିଂକେ, ଆରି ନେ ଆମେକେ ନେମାନେଃକେ ଣ୍ଡୁ । 4 ଡିଲାଡିଗ୍‌ ମେଁ ନେନେ କସ୍‌ଟ ସାପା ସାଃବକେ ଆରି ନେନେ ଦୁକ୍‌ ସାପା ଡୁଙ୍ଗ୍‌ବକେ । ଏଲେଡିଗ୍‌ ନେ ଆମେକେ ଚିନାବାନା ଆରି ପର୍‌ମେସର୍‌ ବାନ୍‌ ମାଡ୍‌ ଆରି ଦୁକ୍‌ କସ୍‌ଟ ଡାଗ୍‌ଚେଃ ନେମାନେଃକେ । 5 ମାତର୍‌ ମେଁ ନେନେ ପାପ୍‌ ନ୍‌ସାଃ ଚିନାବାନା ଡିଂକେ ଆରି ନେନେ ପାପ୍‌ କାମ୍‌ ନ୍‌ସାଃ କୁଚ୍‌କୁଚା ମାଡ୍‌ ଚଙ୍ଗ୍‌କେ; ନେନେ ସାନ୍ତି ନ୍‌ସାଃ ସାସ୍ତି ମେଁନେ ଆଡ଼ାତ୍ରା ପଡ଼େକେ ଆରି ମେଁ ମାଡ୍‌ ଚଙ୍ଗ୍‌କ୍ନେ ନ୍‌ସାଃ ନେଃ ସୁସ୍ତ ନେଃଡିଂକେ । 6 ନେଃ ସାପାରେ ମେଣ୍ଡାଇଂ ରକମ୍‌ ବୁଲ୍‌ ଗାଲି ପାକା ଅଲେଙ୍ଗ୍‌ନେଃଲାଏଃକେ; ନେଃ ସାପାରେ ନିଜର୍‌ ନିଜର୍‌ ଗାଲି ପାକା ଆଣ୍ଡେ ନେଃଲାଏଃକେ; ଆରି, ମାପ୍‌ରୁ ନେଃ ସାପାରେନେ ପାପ୍‌ କାମ୍‌ ମେଁ ଆଡ଼ାତ୍ରା ଆଃନିଗ୍‌ବିଃକେ । 7 ମେଁ ପରିହାସ୍‌ ବାକେ, ଏଲେଡିଗ୍‌ ମେଁ ନିଜ୍‌କେ ଡାଆଁ ଆଃଡିଂଚେଃ ନିଜର୍‌ ତୁମୁଁଆଃ ଆରାଃତର୍ସାକେ; ବାଗୁଏଃନେ ଜାଗା‍ଅରିଆ ରାଙ୍ଗ୍‌ୱେନେ ଉଂମେଣ୍ଡା ରକମ୍‌ ଡିଙ୍ଗ୍‌କେ, ମେଣ୍ଡା ସିସିଣ୍ଡ୍ରେ ସେଃମଁ ଚୁପ୍‌ଚାପ୍‌ ଡିୟା ମେଣ୍ଡା ରକମ୍‌ ଡିଂଚେଃ ମେଁ ନିଜର୍ ତୁମୁଆଃ ଆରାଃତର୍ସାକେ । 8 ମେଁ ଅତ୍ୟାଚାର୍‌ ବାନ୍‌ ଆରି ବିଚାର୍‌ ବାନ୍‌ ଦସି ଡିଂକେ; ଆରି, ମେଁ ଜେ ଜିବିତ୍‌ ରେମୁଆଁଇଂନେ ଦେସ୍‌ବାନ୍‌ ଗନ୍ଦା ଗନ୍ଦା ଡିଙ୍ଗ୍‌କେ, ଆକେନ୍‌ ମେଁ ଏତେ ଲେକ୍ନେ ରେମୁଆଁଇଂନେ ବିତ୍ରେ ଜା ଚିନ୍ତା ଡିଂକେ ? ନେ ରେମୁଆଁଇଂନେ ପାପ୍‌ ନ୍‌ସାଃ ମେଁ ମାଡ୍‌ ଚଙ୍ଗ୍‌କେ । 9 ବାରି, ମେଁ ମେଃଡିଗ୍‌ ବୁଲ୍‌ କାମ୍‌ ମାଡିଂଚେଃ ଡିଗ୍‌ ଆରି ମେଁନେ ତୁମୁଁଆଃଅରିଆ ମେଃଡିଗ୍ ନାଲେ ସାମୁଆଁ ଆଲେଃଲା ଡିଗ୍‌ ରେମୁଆଁଇଂ ଦୁସ୍‌ଟ‍ଇଂ ଏଃତେ ମେଁନେ ରାଃଚ୍ୟା ଆଃରେଆର୍‌କେ ଆରି ଗୁଗୁଏଃନେ ବେଲା ଆମେକେ ସାକାର୍‌ଇଂ ଏଃତେ ଆତି ବିଃଆର୍‌କେ । 10 ଏଲେଡିଗ୍‌ ଆମେକେ ଆଃଗୁଏଃନ୍‌ସାଃ ମାପ୍‌ରୁନେ ଇକ୍‌ଚା ଡିଂକେ; ମେଁ ଆମେକେ ଦୁକ୍‌ କସ୍‌ଟରେ ଅଲେଙ୍ଗ୍‌ନେ ରେମୁଆଁ ଆଃଡିଂବକେ; ନାଁ ମେଁନେ ଜିବନ୍‌କେ ପାପ୍‌ ନ୍‌ସାଃ ବଲି ନାଡିଂଲା, ମେଁ ନିଜର୍‌ ବଂସ କେଏ, ମେଁ ଜାବର୍‌ ମୁଆଁ ବ୍ରୁଆଏ ଆରି ମେଁନେ ନ୍ତିଅରିଆ ମାପ୍‌ରୁନେ କାମ୍‌ ପୁରନ୍‌ ଡିଂଏ । 11 ମେଁ ନିଜର୍‌ ଜିବନ୍‌-କସ୍‌ଟ ବାନେ କେଚେଃ ସାନ୍ତି ଡିଂଏ; ନେନେ ଦାର୍ମିକ୍‌ ଦାସ୍‌ ନିଜର୍‌ ବୁଦି ଏଃତେ ଗୁଲୁଏରେକେ ଦାର୍ମିକ୍‌ ଆଃଡିଂଏ ଆରି ମେଁ ମେଇଂନେ ପାପ୍‌କେ ଡୁଙ୍ଗ୍‌ଏ । 12 ଏନ୍‌ସାଃ ନେ ମ୍ନାଃରେଇଂନେ ବିତ୍ରେ ଆମେକେ ଜାଗା ନେବିଃଏ ଆରି ମେଁ ସକ୍‌ତିମାନ୍‌ଇଂନେ ଏଃତେ ଡଙ୍ଗାକ୍ନେ ଜିନିସ୍‌ ବାଟାଚେଃ ରାଙ୍ଗ୍‌ଡ‍ଆର୍‌ଏ; ମେଃଡାଗ୍‌ଲା ମେଁ ଗୁଗୁଏଃନେଅରିଆ ନିଜର୍‌ ଜିବନ୍‌ କିଗ୍‌ ବିଃକେ ଆରି ଅଦାର୍ମିକ୍‌ ରେମୁଆଁଇଂ ଏଃତେ ଗଣିତ ଡିଂକେ; ଏଲେଡିଗ୍‌ ମେଁ ଗୁଲୁଏରେନେ ପାପ୍‌ ଡୁଙ୍ଗ୍‌କେ ଆରି ଅଦାର୍ମିକ୍‌ ରେମୁଆଁଇଂନେ ନ୍‌ସାଃ ପାର୍‌ତନା ଡିଂକେ ।