ଜିସାୟ 50

ଇସ୍ରାଏଲ୍‌ନେ ପାପ୍‌ କମ୍‌

1 ମାପ୍‌ରୁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ନେ ଆଣ୍ଡିନେ କାଗଜ୍‌ ଏଃତେ ପେୟାଙ୍ଗ୍‌କେ ଆନ୍ତାର୍‌ନେବକେ, ମେଁନେ ଆତେନ୍‌ ଚାଡ଼ପତ୍ର ଉଲିଆ ଆଣ୍ଡିକାଃ ? ଣ୍ଡୁଲା ନେନେ ବେପାରି‍ଇଂ ବିତ୍ରେବାନ୍‌ ଜା ଡାଗ୍ରା ଆପେକେ ସ ନେବକେ ? କେଲା, ପେ ନିଜର୍‌ ପାପ୍‌ କାମ୍‌ ନ୍‌ସାଃ ବିକ୍ରି ଡିଂପେଲାଏଃଗେ ଆରି ପେନେ କାରାପ୍‌ କାମ୍‌ ନ୍‌ସାଃ ପେୟାଙ୍ଗ୍‌ ଆନ୍ତାର୍ ବିଃବକେ । 2 ନେ ପାଙ୍ଗ୍‌ନେ ବେଲା ମେଃନ୍‌ସାଃ ଜାଡିଗ୍‌ ଆଲେଃଆର୍‌ଗେ ? ନେ ୱାନେ ବେଲା ମେଃନ୍‌ସାଃ ଜାଡିଗ୍‌ ଉତର୍‌ ବିଃନ୍‌ସାଃ ଆଲେଃଆର୍‌ଗେ ? ନେନେ ନ୍ତି କି ଇଃତୁଡ଼ାଃ ଡାଆଁ ଡିଂଲାଏଃକେ ଜେ, ଆତେନ୍‌ ରକ୍ୟା ଡିଂଆୟା ? କି ରକ୍ୟା ଡିଂନ୍‌ସାଃ କି ନେନେ ବପୁ ଣ୍ଡୁ ? କେଲା, ନେ ଦାକା ଏଃତେ କେଣ୍ଡିଆଃକେ ନେରାଃନ୍‌ସୁଆର୍‌ଏ, ନେ ଲଣ୍ଡ୍ୟାଃପାଃଡ଼୍ୟାକେ କଣ୍ଡା ନେରାଃଡିଂଏ; ଆତ୍‌ଅରିଆ ଲାଏଃକ୍ନେ ଆଃଡ଼ ଣ୍ଡିଆଃ ଅବାବ୍‌ ଡିଂଲା ଉଗ୍‌ଡ୍ୟାଃନ୍‌ସାଃ ଗୁଏଃଚେ ବାସ୍‌ନା ଡିଂଏ । 3 ନେ କିତଙ୍ଗ୍‌ଇନିକେ ଏଡ଼େଃ ଗର୍‌ଣ୍ଡା ଏତେ ଡାନେବିଃଏ ଆରି ବାସ୍ତା ସକା ଏତେ ଆତେନ୍‌ ସାପା ନେଡାଏ ।

ମାପ୍‌ରୁନେ ସାମୁଆଁ ମାନେଃନେ ସେବକ

4 ନିଂ ଡିରକମ୍‌ ହାଲିଆ ରେମୁଆଁକେ ସାମୁଆଁ ଏଃତେ ସମ୍ବାଲେ ଇଁୟାଏ, ଆକେନ୍‌ସାଃ ମାପ୍‌ରୁ, ସଦାପ୍ରବୁ ଆନିଂ ସିକିତ୍‌ ରେମୁଆଁଇଂନେ ନ୍ଲ୍ୟା ବିଃବକେ; ମେଁ କାଲାଆଃ ଞ୍ଜିର୍‌ନୁଗ୍‌ ତରକ୍‌ ଆଃଡିଂମ୍ୟାଃକେ, ସିକିତ୍‌ ରେମୁଆଁ ରକମ୍‌ ଦ୍ରିଗ୍‌ ନ୍‌ସାଃ ମେଁ ନିଂନେ ନ୍ଲୁଗ୍‌କେ ତରକ୍‌ ଆଃଡିଂମ୍ୟାଃକେ । 5 ମାପ୍‌ରୁ, ସଦାପ୍ରବୁ ନିଂନେ ନ୍ଲୁଗ୍‌ ଆଃନାଙ୍ଗ୍‌ସା ବକେ, ବାରି ନିଂ ବିରଦ୍‌ କାମ୍‌ ଡିଂଣ୍ଡ୍ରେ ଡିଂନ୍ନାଲାଏଃକେ, କି ପ୍ଲାଃ ପାକା ନ୍ନାଆଣ୍ଡେକେ । 6 ନିଂ ବୁବଗ୍‌ଣ୍ଡ୍ରେ ଡାଗ୍ରା ନିଜର୍‌ ଗୁଗ୍‌ଡ୍ୟା, କର୍‌ତା ତିତାଗ୍‌ଣ୍ଡ୍ରେଇଂ ଡାଗ୍ରା ନିଜର୍‌ ଗିଙ୍ଗିଙ୍ଗ୍‌ ଆଃସୁଏଃ ମ୍ବିଃକେ; ନିଂ ଅପମାନ୍‌ ଆରି ବିଃତୁର୍‌ ନ୍‌ସା ନେଙ୍ଗ୍‌ନେ ସାର୍ମୁଆଃ ନ୍ନାବୁଃଡ଼ିକେ ଣ୍ଡୁ । 7 ମେଃଡାଗ୍‌ଲା ମାପ୍‌ରୁ, ସଦାପ୍ରବୁ ନିଂନେ ସାଆଜ୍ୟ ଡିଂଏ; ଆକେନ୍‌ସାଃ ନିଂ ଗାବ୍‌ରା ନ୍ନାଡିଂକେ ଣ୍ଡୁ; ଆକେନ୍‌ସାଃ ନିଂ ଜିକିମିକି ବ୍ରି ରକମ୍‌ ନିଜର୍‌ ସାର୍ମୁଆଃ ଆଃଡିଂମ୍ବକେ, ଆରି ନେଙ୍ଗ୍‌ ଜେ ଗିଆସଃ ନ୍ନାଡିଂ ଣ୍ଡୁ, ଆକେନ୍‌ ମ୍ୟାଃନ୍ଲେଃକେ । 8 ଜା ଆନିଂକେ ଦାର୍ମିକ୍‌ ଆଃଡିଂଏ, ମେଁ ଡାଗ୍ରା ପାଙ୍ଗ୍‌ଡିଂକେ; ଜା ନିଂ ଏଃତେ ବିରଦ୍‌ ଡିଂଏ ? ଏଃଲାପା, ନେଃ ମୁଇଂଅରିଆ ନେଃତୁଆଁପା; ନିଂନେ ବିପକ୍ଷ ଜା ? ମେଁ ନିଂ ଡାଗ୍ରା ପାଙ୍ଗ୍‌ଲେଃ । 9 କେଲାପା, ମାପ୍‌ରୁ, ସଦାପ୍ରବୁ ନିଂନେ ସାଆଜ୍ୟ ଡିଂଏ; ଆନିଂ ଦସି ଆଃଡିଂଏ ଜା ? କେଲାପା, ତେନ୍‌ ସାପାରେ ସକାପାଟାଇ ରକମ୍‌ ଜିରେଆର୍‌ଏ; ବୁବଃଗିଡ଼ିଆ ଆମେଇଂକେ ଚଙ୍ଗ୍‌ଏ । 10 ଜା ମାପ୍‌ରୁକେ ବୁଟଆର୍‌ଏ ଆରି ମେଁନେ ସେବକନେ ସାମୁଆଁ ମାନେଃଆର୍‌ଏ, ପେନେ ବିତ୍ରେ ଦେକ୍‌ରକମ୍‌ ଜା ଲାଏଃକେ ? ମୁଃଡ଼ି ରେମୁଆଁ ତାଙ୍ଗ୍‌କିଗ୍‌ଅରିଆ ଅଲେଙ୍ଗ୍‌ଡାଲ୍ୟା ଡିଂଏ ଆରି ତାର୍କିଗ୍‌ ଆବା ଣ୍ଡୁ, ମେଁ ମାପ୍‌ରୁନେ ମ୍ନିରେ ବିସ୍‌ବାସ୍‌ ଡିଂଲେଃ ଆରି ନିଜର୍‌ ପର୍‌ମେସର୍‌ ଆଡ଼ାତ୍ରା ଆସା ବଲେ । 11 ସୁଆ ଆଃଡୁଆପେଡିଂକେ, ଆରି ସୁଆ କୁଟ୍‌ନିଆ ଆପେକେ ପିତୁର୍‌ପାକା ଗେରେପେଡିଙ୍ଗ୍‍କେ ଜେ ପେ, ପେ ସାପାରେ କେଲାପା, ପେ ପେନେ ସୁଆ ଆଡୁଆକ୍ନେ ଡୁଡୁ ଆରି ପେନେ ଡୁଆଲେକ୍ନେ ସୁଆ କୁଟ୍‌ନିଆ ବିତ୍‌ରେ ବିଚେ ପେୱେଏ । ନିଂ ନ୍ତିବାନ୍‌ ଆକେନ୍‌ ପେ ପେବାଏ; ପେ ଅଃଅଃଚେ ପେଡୁଲେଗ୍‌ଏ ।