ଯିଶାଇୟକେ ଦର୍ସନ୍ ବିଃନେ ଆରି ୱାନେ
1 ଯିହୁଦାନେ ଇଃସାଙ୍ଗ୍ ଉଷୀୟନେ ଗୁଏଃକ୍ନେ ମୁଆଁ ନେଙ୍ଗ୍ ନେଙ୍ଗ୍ନେ ମାପ୍ରୁକେ ଙ୍କେକେ । ମେଁ ମୁଇଂ ମ୍ନାନେ ଚମତ୍କାର୍ ସିଂଆଁସନ୍ ଡାଗ୍ରା କଲାଏଃକେ । ମେଁନେ ଇଃସାଙ୍ଗ୍ ସକାନେ ଗାଗ୍ରା ମନ୍ଦିର୍ନେ ସାପାପାକା ଡାବିକେ ।
2 ମେଁନେ ଡାଗ୍ରା ସରାଫ ରେମୁଆଁଇଂ ତୁଆଁଆର୍କେ; ଆତାନ୍ ସାପାକେ ତୁର୍ ତୁର୍କ୍ଲିଗ୍ ଡେନା ଲାଏଃଗେ; ସାପା ମ୍ୱାକ୍ଲିଗ୍ ଡେନାନ୍ୟା ନିଜର୍ ନିଜର୍ ସାର୍ମୁଆଃ ବୁଃଡ଼ିଆର୍କେ, ମ୍ୱାକ୍ଲିଗ୍ ଡେନାନ୍ୟା ଞ୍ଚ ବୁଃଡ଼ିଆର୍କେ ବାରି ମ୍ୱାକ୍ଲିଗ୍ ଡେନାନ୍ୟା ୱାଲେଃଆର୍କେ ।
3 ବାରି ମେଇଂ ନିଜର୍ ନିଜର୍ ବିତ୍ରେ ୱାଚେ ବାସଙ୍ଗ୍ ଡିଙ୍ଗ୍ ଆର୍କେ, ସାପାବାନ୍ ବପୁ ମାପ୍ରୁ ପବିତ୍ର, ପବିତ୍ର, ପବିତ୍ର । ସାପା ମଚ୍ପୁର୍ ମେଁନେ ମହିମାରେ ବର୍ତି ।
4 ଆତାନ୍ ବେଲା ବାସଙ୍ଗ୍ଣ୍ଡ୍ରେନେ ୱାଃସାର୍କ୍ନେ ଦୁଆର୍ବନ୍ଦ୍ ଇରିୟାତୁଗ୍କେ ବାରି ମାପ୍ରୁନେ ମନ୍ଦିର୍ ମାଃସରେ ବର୍ତି ଡିଙ୍ଗ୍କେ ।
5 ଆତାନ୍ ବେଲା ନେଙ୍ଗ୍ ବୁଟମେଗ୍ଚେ ମ୍ୱାସଙ୍ଗ୍କେ, "ଆୟ, ଆୟ ! ନେଙ୍ଗ୍ ନସ୍ଟ ଡିଙ୍ଗ୍ଉଁୱେଗେ; ଡାଗ୍ଲା ନେଙ୍ଗ୍ ଅଃକେନ୍ ଅସୁଚି ଜେ, ପର୍ମେସର୍ନେ ଡାଗ୍ରା ବାସଙ୍ଗ୍ ନ୍ସା ଜଗ୍ୟ ଣ୍ଡୁ । ବାରି ଦେକ୍ରକମ୍ ଅସୁଚି ରେମୁଆଁଇଂନେ ବିତ୍ରେ ବାସା ନ୍ଲେକେ ଜେ ନେଙ୍ଗ୍ ମାପ୍ରୁନେ ଡାଗ୍ରା ବାଲିର୍ ନ୍ସା ଅଜଗ୍ୟ । ଏଲେଡିଗ୍ ନେଙ୍ଗ୍ ସାପାବାନ୍ ବପୁ ମାପ୍ରୁ ଇଃସାଙ୍ଗ୍କେ କେଣ୍ଡିଙ୍ଗ୍କେ ।"
6 ଏନ୍ ଇଡ଼ିଙ୍ଗ୍ ଆତାନ୍ ସରାଫଇଙ୍ଗ୍ ବାନ୍ ମୁଇଂଜା ନେଙ୍ଗ୍ ଡାଗ୍ରା ୱାଲେଃ ପାଙ୍ଗ୍କେ, ମେଁନେ ନ୍ତିନ୍ୟା ଇତୁଡ଼ା ଡୁଆକ୍ନେ ବୁର୍ୟା ଲାଏଃଗେ, ମେଁ ଯଜ୍ଞ ବେଦିବାନ୍ ଚିମ୍ଟା ଏଃତେ ଆତାନ୍ ରାଙ୍ଗ୍ୱେବଗେ;
7 ଆତାନ୍ ସରାଫ ଦେବ୍ଦୁତ୍ ଆତାନ୍ ଗିକ୍ନେ ବୁର୍ୟା ଏଃତେ ନେଙ୍ଗ୍ନେ ସାର୍ମୁଆଃକେ ଲିଗ୍ଚେଃ ଏନ୍ ଇଡ଼ିଙ୍ଗ୍ ମେଁ ପାଙ୍ଗ୍କେ, "କେଲା ନେଙ୍ଗ୍ ଏନ୍ ଡୁଆକ୍ନେ ବୁର୍ୟାକେ ନାନେ ସାର୍ମୁଆଃନ୍ନିଆ ଲିଗ୍ ମ୍ୱିକେ ଡାଗ୍ଲା ଏନ୍ବାନ୍ ନାନେ ପାପ୍ ସ୍ଲ ଡିଂୱେଗେ ବାରି ନାଁ ପାପ୍ବାନ୍ ମୁକ୍ତି ନାଡିଙ୍ଗ୍କେ ।"
8 ଏନ୍ ଇଡ଼ିଙ୍ଗ୍ ନେଙ୍ଗ୍ ଆଜାକେ ମ୍ୱେଏ ? ବାରି ଜା ନେ ନ୍ସା ୱେଏ ? ମାପ୍ରୁନେ ଏନ୍ ଇଲ୍ଏଁ ନେଙ୍ଗ୍ ଙକେ । ତେଲା ନେଙ୍ଗ୍ ମ୍ୱାସଙ୍ଗ୍କେ, ନେଙ୍ଗ୍ ନ୍ଲ୍ଲେକେ ଆନେଙ୍ଗ୍ ବେପା ।
9 ଏନ୍ଇଡ଼ିଙ୍ଗ୍ ସଦାପ୍ରବୁ ବାସଙ୍ଗ୍କେ, "ୱେଲା ବାରି ଏନ୍ କବର୍ ରେମୁଆଁଇଂକେ ବାସଙ୍ଗ୍, ଜଦି ପେଇଂ ଅଁପେଡିଂକେ, ମାତ୍ରମ୍ ପେଇଂ ମେଃଡିଗ୍ ବୁଜେ ପେୟା ଣ୍ଡୁ । ଜଦି କେପେଡିଙ୍ଗ୍, ମେଃଡିଗ୍ ପେମ୍ୟାଃ ଣ୍ଡୁ ।
10 ଆମେଇଂକେ ବାୟା ଆଡିଙ୍ଗ୍ । ମେଇଂ ମେଃନି ଅଁଡିଙ୍ଗ୍ଆର୍କେ ବାରି ମେଃନି କେଡିଙ୍ଗ୍ଆର୍କେ ଆତାନ୍ ଡିରକମ୍ ବୁଜେ ଆୟାଆର୍ ଣ୍ଡୁ ଦେତ୍ରକମ୍ ବାବ୍ରେ ଆମେଇଂକେ ତିଆର୍ ଆଃଡିଂ । ନା ଜଦି ଏନ୍ ନାଁଡିଙ୍ଗ୍ ମେଇଂ ମେଃନି ଅଁଡିଙ୍ଗ୍ଆର୍କେ ବାରି ମେଃନି କେଡିଙ୍ଗ୍ଆର୍କେ ଆତାନ୍ ସତ୍ ବାବ୍ରେ ବୁଜେ ୟା ଆର୍ଏ । ରେମୁଆଁଇଂ ମେଇଂନେ ସାପା ଜାକ ବୁଜେ ୟାଆର୍ଏ । ଏନ୍ ଡିଙ୍ଗ୍ଲା ମେଇଂ ନେଙ୍ଗ୍ ଡାଗ୍ରା ଆଣ୍ଡେ ପାଙ୍ଗ୍ ଆର୍ଏ ବାରି ନେଙ୍ଗ୍ ଡାଗ୍ରା ନିମାଣ୍ଡା ଡିଙ୍ଗ୍ ଆର୍ଏ ।"
11 ଏନ୍ଇଡ଼ିଙ୍ଗ୍ ନେଙ୍ଗ୍ ସଦାପ୍ରବୁକେ ପ୍ରସ୍ନ ଣ୍ଡିଙ୍ଗ୍କେ, "ମାପ୍ରୁ, ନେଙ୍ଗ୍ ଉଡ଼ି ଜୁଗ୍ ଜାକ ଦେକ୍ ଣ୍ଡିଙ୍ଗ୍ଏ ?" ତେନ୍ଇଡ଼ିଂ ମେଁ ଉତର୍ ବିଃକେ, "ଇନି ସାପା ଦଂସ ଡିଂ ଜାକ ବାରି ରେମୁଆଁଇଂ ସାପା ଗୁଏଃ ଜାକ ଦେକ୍ ଡିଙ୍ଗ୍ । ଅଃନା ଜାକ ମୁଇଂ ଡିଗ୍ ରେମୁଆଁ ଡୁଆ ଆଲେଃ ଜାକ ବାରି ଦେସ୍ ସାପା ସୁନ୍ସାନ୍ ଡିଙ୍ଗ୍ ଜାକ ଦେକ୍ ଡିଙ୍ଗ୍ ।"
12 ସଦାପ୍ରବୁ ସାପା ରେମୁଆଁକେ ସ୍ଲ ନୁଆଁ ବିଃଏ । ଦେସ୍ନ୍ୟା ଉଃଡ଼ିପର୍ ଜାକ ଆନ୍ତାର୍ଲେକ୍ନେ ଅଞ୍ଚଲ୍ ସୁନ୍ସାନ୍ ଡିଙ୍ଗ୍ ଜାକ ।
13 ବାରି ଜାବର୍ ଡିଙ୍ଗ୍ଲା ଆତ୍ ଅରିଆ ମୁଇଂ ବାଗ୍ ଲେଃଏ, ଏଲେଡିଗ୍ ଆତାନ୍ ବାର୍ମୁଇଂତର୍ ନସ୍ଟ ଡିଙ୍ଗ୍ଏ । ଏଲା ବାରି ଅଲୋନ ସ୍ଲାଃ ସିଃତଗ୍ଲା ଡିରକମ୍ ଆତାନ୍ କୁଟ୍ ଲେଃଏ । ଦେତ୍ରକମ୍ ଆତାନ୍ ପବିତ୍ର ବଂସ ଆକାନ୍ କୁଟୁମ୍ନେ ସ୍ଲାଃନେ ବୁନ୍ଦ୍ ରକମ୍ ଲେଃଏ ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)