ଜିସାୟ 10

1 ଜାଣ୍ଡେଇଂ ଦରମ୍‌ ଣ୍ଡୁନେ ନିଅମ୍‌ ତିଆର୍‌ ଡିଙ୍ଗ୍‌ ଆର୍‌ଏ ବାରି ଜାଡିଗ୍‌ ଗୁଆର୍‌ଣ୍ଡ୍ରେ କାରାପ୍‌ ସାମୁଆଁ ଗୁଆର୍‌ ଆର୍‌ଏ, ମେଇଂ ଉଡ଼ି ଡଣ୍ଡ୍‌ ବାଆର୍‌ଏ ।

2 ଆତାନ୍‌ ନିଅମ୍‌ ତିଆର୍‌ ଡିଙ୍ଗ୍‌ଣ୍ଡ୍ରେ ଦରିଦ୍ର ଇଂନେ ନ୍ୟାୟ୍ ବିଚାର୍‌ ଆଡିଙ୍ଗ୍‌ ଆର୍‌ ଣ୍ଡୁ । ମେଇଂ ଦରିଦ୍ର ଇଂନେ ଅଦିକାର୍‌କେ ଚିନା ଆଡିଙ୍ଗ୍‌ ଆର୍‌ଏ । ମେଇଂ ଡିଗ୍‌ ଗୋଏଃସାଙ୍ଗ୍‌କୁଏଃ ବାରି ଆବା ଣ୍ଡୁନେ ଗଡ଼େଇଂନେ ଦନ୍‌ ସମ୍ପତି ଡଙ୍ଗା ନ୍‌ସା ରେମୁଆଁଇଂକେ ବେବିଃଆର୍‌ଏ ।

3 ଅ ନିଅମ୍‌ ତିଆର୍‌ ଡିଙ୍ଗ୍‌ଣ୍ଡ୍ରେ, ପ୍ରତିପଲ୍‌ ବିଃନେ ଦିନା ଆପେକେ ପେନେ କାମ୍‌ ଡିଙ୍ଗ୍‌କ୍ନେ ବିସଏରେ ବୁଜେନ୍‌ସା ପଡ଼େଏ । ସ୍ଲ ଦେସ୍‌ବାନ୍‌ ପେନେ ବିନାସ୍‌ ପାଙ୍ଗ୍‌ ଡିଙ୍ଗ୍‌କେ । ପେଇଂ ଆତାନ୍‌ ବେଲା ମେଃନେ ଡିଙ୍ଗ୍‌ପେୟାଏ ? ସାଇଜ ନ୍‌ସା ପେଇଂ ଜା ଡାଗ୍ରା ପେୱେଏ ? ପେନେ ଡାବୁ ବାରି ଦନ୍‌ସମ୍ପତି ଆଣ୍ଡିଡାଗ୍ରା ପେବଏ ?

4 ମେଇଂ ବନ୍ଦି ରେମୁଆଁନେ ଞ୍ଚ ଆଲ ମୁଣ୍ଡିଆ ବଗ୍‌ଆର୍‌ଏ । ମେଇଂ ଗୁଏଃକ୍ନେ ରେମୁଆଁ ଆଲ ଲଃଆର୍‌ଏ । ଏଲେଡିଗ୍‌ ମେଁନେ ରିସା ଚୁପ୍‌ ଆଡିଙ୍ଗ୍‌ ଣ୍ଡୁ । ମାତର୍‌ ମେଁନେ ନ୍ତି ସିସେ ରକମ୍‌ ଡଣ୍ଡ୍‌ ବିନ୍‌ସା ତିଆର୍‌ ଡିଙ୍ଗ୍‌ଚେ ଲେଃଏ ।

ଆସେରିଆ ଆତ୍‌ଲା ସଦାପ୍ରବୁନେ ଡଣ୍ଡ୍‌

5 ସଦାପ୍ରବୁ ବାସଙ୍ଗ୍‌ଡିଙ୍ଗ୍‌କେ, "ନେଙ୍ଗ୍‌ ଅଶୂରକେ ମୁଇଂ ଡୁଡୁ ରକମ୍‌ ବେବଆର୍‌ ଣ୍ଡିଙ୍ଗ୍‌ଏ । ଆକେନ୍‌ ରିସା ଡିଙ୍ଗ୍‌କ୍ନେ ଡଣ୍ଡ୍‌ ଇସ୍ରାଏଲ୍‌କେ ସାସ୍‌ତି ମ୍ୱିଃଏ ।

6 ମାପ୍‌ରୁ ଣ୍ଡୁନେ ଦେସ୍‌କେ ନେଙ୍ଗ୍‌ ଆସେରିୟାକେ ବେ ମ୍ୱିଏ । ଆତାନ୍‌ ରେମୁଆଁଇଂନେ ଆଡ଼ାତ୍ରା ନେଙ୍ଗ୍‌ ରିସା ବାରି ମେଇଂନେ ବିରଦ୍‌ରେ ଜୁଦ୍‌ ଡିଙ୍ଗ୍‌ ନ୍‌ସା ନେଙ୍ଗ୍‌ ଆସେରିୟକେ ଆଦେସ୍‌ ମ୍ୱିଏ । ମେଁ ଆମେଇଂକେ ପରାସ୍ତ ଆଡିଙ୍ଗ୍‌ଏ ବାରି ମେଇଂନେ ବାନ୍‌ ଦନ୍‌ ସମ୍ପତି ରାଙ୍ଗ୍‌ପାଙ୍ଗ୍‌ଏ । ଇସ୍ରାଏଲ ଗାଲିନେ ଦୁଲି ରକମ୍‌ ଆସେରିୟ ଞ୍ଚନ୍ୟା ଲେଚାର୍‌ ବିଃଏ ।

7 ଏଲେଡିଗ୍‌ ମେଁନେ ଇକ୍‌ଚା ଦେତ୍‌ରକମ୍‌ ଣ୍ଡୁ, ମାତ୍ରମ୍‌ ମେଁନେ ରୁଦୟ୍‌ ଦେତ୍‌ରକମ୍‌ ଆବାବେ ଣ୍ଡୁ । ମାତ୍ରମ୍‌ ବିନାସ୍‌ ଆଡିଙ୍ଗ୍‌ ନ୍‌ସା ବାରି ଗୁଲୁଏ କୁଟୁମ୍‌କେ ଚିନ୍‌ବିନ୍‌ ଆଡିଙ୍ଗ୍‌ ନ୍‌ସା ମେଁନେ ରୁଦୟ୍‌ନିଆ ଲ୍ଲେକେ ।

8 ମାତର୍‌ ମେଁ ବାସଙ୍ଗ୍‌ଏ, ନେନେ ସେନାପତିଇଂ ସାପାରେ କି ଇଃସାଙ୍ଗ୍‌ ଣ୍ଡୁ ।

9 କଲ୍‌ନୋ ଇନି କର୍କମୀଶ୍ର ଇନି ରକମ୍‌ ? ବାରି ଅର୍ପଦ ଇନି ହମାତ୍‌ ଇନି ରକମ୍‌ ? ଶମରୀୟା ଇନି ଦମ୍ମେଶକ ଇନି ରକମ୍‌ ?

10 ଆଡିନେ ମୁର୍ତିଇଙ୍ଗ୍‌ ରାଇଜ୍‌ନିଆ ଲେକ୍ନେ ସାପା ତିଆର୍‌ ଡିଙ୍ଗ୍‌ବକ୍ନେ ମୁର୍ତି ସାପା, ଯିରୂଶାଲମନେ ବାରି ଶମରୀୟାନେ ମୁର୍ତି ଆଣ୍ଡେଙ୍ଗ୍‌ ବାନ୍‌ ମ୍ନା, ଆତାନ୍‌ ସାପା ରାଇଜ୍‌ ନେନେ ନ୍ତି ଡାଗ୍ରା ଲ୍ଲେକେ ।

11 ନେ ଶମରୀୟା ବାରି ମେଁନେ ମୁର୍ତି ଆଣ୍ଡେଙ୍ଗ୍‌ ଆଡ଼ାତ୍ରା ଡିରକମ୍‌ ଡିଙ୍ଗ୍‌ନେବକେ । ଯିରୂଶାଲମ ବାରି ମେଁନେ ମୁର୍ତି ଆଣ୍ଡେଙ୍ଗ୍‌କେ ମେଃନି ଦେତ୍‌ରକମ୍‌ ନେଡିଙ୍ଗ୍‌ ଣ୍ଡୁ ?

12 ନେଙ୍ଗ୍‌ନେ ମାପ୍‌ରୁ ଯିରୂଶାଲମ ବାରି ସିୟୋନ କଣ୍ଡା ବିରଦ୍‌ରେ ସାପା କାମ୍‌ ଆଃଡାକ୍ନେ ଇଡ଼ିଙ୍ଗ୍‌ ଆସେରିଆକେ ଡଣ୍ଡ୍‌ ବିଃଏ । ଡାଗ୍ଲା ଅଶୂରନେ ଇଃସାଙ୍ଗ୍‌ ଜାବର୍‌ ଆଙ୍କାର୍‌ ବାରି ମେଁନେ ଗରବ୍‌ ଆମେକେ କରାପ୍‌ କାମ୍‌ ଆଡିଙ୍ଗ୍‌ ବକେ । ତେସା ପର୍‌ମେସର୍‌ ଆମେକେ ଡଣ୍ଡ୍‌ ବିଃଏ ।

13 ଡାଗ୍ଲା ଅଶୂରନେ ଇଃସାଙ୍ଗ୍‌ ବାସଙ୍ଗ୍‌ ବକେ, ନେଙ୍ଗ୍‌ ବୁଦି ଣ୍ଡିଂକେସାଃ ନିଜର୍‌ ନ୍ତିନେ ବପୁବାନ୍‌ ବାରି ନିଜର୍‌ ଜ୍ଞାନ୍‌ ବାନ୍‌ ଏନ୍‌ ଡିଙ୍ଗ୍‌ ମ୍ୱକେ । ବାରି ନେଙ୍ଗ୍‌ ଗୁଲୁଏ କୁଟୁମ୍‌ନେ ଏରିଆ ସ୍ଲ ଆଡିଙ୍ଗ୍‌ ମ୍ୱକେ ବାରି ମେଇଂନେ ଆର୍ଜେକ୍ନେ ଦନ୍‌ସମ୍ପତି ରାଃ ରାଙ୍ଗ୍‌ପାଙ୍ଗ୍‌ ମ୍ୱକେ । ବାରି ନେଙ୍ଗ୍‌ ବପୁ ରେମୁଆଁ ରକମ୍‌ ସିଂହାସନ୍‌ ଡାଗ୍ରା କକ୍ନେ ରେମୁଆଁକେ ବୁନ୍ଦେ ଆଜାର୍‌ ମ୍ୱକେ ।

14 ବାରି ନେଙ୍ଗ୍‌ନେ ନ୍ତି ଗୁଲେ ଜାତିନେ ଦନ୍‌କେ ପିଲିଗ୍‌ନେ ଉଙ୍ଗ୍‌ଚ୍ୟାଃ ରକମ୍ ଡିଙ୍ଗ୍‌ଲେକେ ଆରି ଜା ଡିରକମ୍ ମୁଇଂ ଆନ୍ତାର୍‌ବକ୍ନେ ନ୍ତାସେଙ୍ଗ୍‌କେ ରାଃସିଙ୍ଗ୍, ଦେତ୍‌ରକମ୍ ନେଙ୍ଗ୍ ସାପା ପୁର୍‌ତିବିକେ ରାସିଙ୍ଗ୍ ମ୍ୱକେ, ଆରି, ଆତ୍‌ଅରିଆ ଡେନା ଆଃୱାଲେଃ ନ୍‌ସା କି ତୁମୁଆଃ ଆଃପୁଟେ ନ୍‌ସା କି ଚିଁ ଚିଁ ସବଦ୍ ଡିଙ୍ଗ୍‌ସା ଜାଡିଗ୍‌ ଆଲେଃଗେ ଣ୍ଡୁ ।"

15 ମୁଇଂ ମାଲୁଏଃ ମେଃନେ ମେଁନେ ସିଃତଗ୍‌ନେ ରେମୁଆଁବାନ୍‌ ଜାବର୍‌ ସକ୍ତିସାଲି ଡିଙ୍ଗ୍‌ୟାଏ କି ? କରତ୍‌ ମେଃନେ କରତ୍‌ ଗୁଆଃଣ୍ଡ୍ରେନେ ବିରଦ୍‌ରେ ମେଃଡିଗ୍‌ ଡିଙ୍ଗ୍‌ଆୟା ଣ୍ଡୁ । ଜାଣ୍ଡେଇଂ ଦଣ୍ଡ୍ ବିଃମ୍ୟାଃ, ଦଣ୍ଡ୍ ମେଃନେ ଆମେଇଂକେ ଆଃତୁଗ୍‌କେ ? ଜା ସୁଆ ଣ୍ଡୁ, ଡୁଡୁ ମେଃନେ ଆମେକେ ଆଃତଡ଼୍ୟାଃଏ ?

16 ଏବେ ମାପ୍‌ରୁ ସଦାପ୍ରବୁ ଆମେକେ ମ୍ନା ରେମୁଆଁଇଂନେ ବିତ୍‌ରେ ରଗ୍ ବେମାର୍ ବେଏ ଆରି ମେଁନେ ତାରାସ୍‌ନେ ଆଲ ସୁଆ ଡୁଆଡିଙ୍ଗ୍‌କେ ସୁଆନିଆ ଡୁଆ ଆର୍‌ଏ ।

17 ଇସ୍ରାଏଲ୍‌ନେ ତାର୍‌କିଗ୍‌ ମୁଇଂ ଡୁଆକ୍ନେ ସୁଆ ରକମ୍‌ ଡିଙ୍ଗ୍ଏ । ଆତାନ୍‌ ପବିତ୍ର ରେମୁଆଁ ମୁଇଂ ସୁଆ ଡୁଆକ୍ନେ ଣ୍ଡ୍ରାସ ରକମ୍‌ ଡିଙ୍ଗ୍ଏ । ଆତାନ୍‌ ଡୁଆଚେ ମୁଇଂ ଦିନ୍‌ରେ ମେଁନେ କାଟାକଲି ବୁଟା ଆରି ଗ୍ରେଃ ଲାଟା ସାପା ଗିଃୱେଏ ।

18 ଆରି ମେଁ ମେଁନେ କଣ୍ଡା ଆରି କତ୍‌ ଲିଜକେ ପୁରାପୁରି ବାବ୍‌ରେ ନାସ୍ ଆଡିଙ୍ଗ୍‌ଏ ଦେତ୍‌ରକମ୍ ମୁଇଂ ରେମୁଆଁକେ ମୁଇଂ ରଗ୍ ସାଃଚେ ଆମେକେ ନାସ୍ ଆଡିଙ୍ଗ୍‌ଏ ।

19 ମାତ୍ରମ୍‌ କଣ୍ଡାନେ ବାକି ଉଡ଼ି ସ୍ଲାଃ ମ୍ୱ୍ରଲେଃଏ ଆଡିନେ କି ଆତେନ୍‌ ମୁଇଂ ଗଡ଼େଅ ଡିଗ୍‌ ଏଜା ୟାଏ ।

ଇସ୍ରାଏଲ୍‌ନେ ବାକି ସାପାରେ ଆଣ୍ଡେନେ

20 ବାରି, ଆତାନ୍‌ ଦିନ୍ ଦେକ୍‌ରକମ୍‌ ଗଟେଏ ଜେ, ଇସ୍ରାଏଲ୍‌ନେ ଲୁଆଁକ୍ନେ ରେମୁଆଁ ବାରି ଯାକୁବ କୁଟୁମ୍‌ନେ ଉଦାର୍ ବାଲାଏଃକ୍ନେ ରେମୁଆଁଇଂ ନିଜର୍ ବଗ୍‌ଟୁଣ୍ଡ୍ରେଇଂନେ ଆଡ଼ାତ୍ରା ଆରି ବିସ୍‌ବାସ୍‌ ଆଡିଙ୍ଗ୍‌ଆର୍‌ ଣ୍ଡୁ । ମାତର୍ ମେଇଂ ସତ୍ ବାବ୍‌ରେ ଇସ୍ରାଏଲ୍‌ନେ ପବିତ୍ର ମାପ୍‌ରୁ ଆଡ଼ାତ୍ରା ବିସ୍‌ବାସ୍‌ ଡିଙ୍ଗ୍‌ଆର୍‌ଏ ।

21 ଯାକୁବନେ ବାକି ସାପାରେ ଡିଗ୍‌ ସକ୍‌ତିଶାଲି ପର୍‌ମେସର୍‌ନେ ଡାଗ୍ରା ଆଣ୍ଡେ ପାଙ୍ଗ୍‌ଆର୍‌ଏ ।

22 ଡାଗ୍ଲା ପେନେ ଇସ୍ରାଏଲ୍‌ନେ ରେମୁଆଁ କେଣ୍ଡିଆଃନେ ବାଲି ରକମ୍‌ ମେଇଂ ଡିଙ୍ଗ୍‌ଲା ଡିଗ୍‌ ମେଇଂନେବାନ୍‍ ଗଣ୍ଡା ଉଡ଼ିରୁଆ ମାପ୍‌ରୁ ଡାଗ୍ରା ଆଣ୍ଡେ ପାଙ୍ଗ୍‌ଆର୍‌ଏ । ଇଡ଼ିଙ୍ଗ୍‌ ଦରମ୍‌ ରେମୁଆଁନେ ବୁରାଣ୍ଡ୍ୟାଃ ରକମ୍ ନାସ୍‌ ଡିଙ୍ଗ୍‌ଏ ଆତେନ୍ ଆର୍‌ମେଚେ ବକେ ।

23 ମେଃଡାଗ୍‌ଲା ମାପ୍‌ରୁ, ସାପାବାନ୍ ବପୁ ମାପ୍‌ରୁ କ୍ଲିଗ୍‌ ମଚ୍‌ପୁର୍‌କେ ଦଂସ ଆଡିଙ୍ଗ୍‌ବିଏ । ଆରି ଆତେନ୍‌ ସମାନ୍‌ ବେଲା ଆଃ ଆଃଗଟେଏ ।

ସଦାପ୍ରବୁ ଆଶେରିଆକେ ଡଣ୍ଡ୍‌ ବିଃନେ

24 ନେଙ୍ଗ୍‌ନେ ମାପ୍‌ରୁ ସାପାବାନ୍ ବପୁନେ ମାପ୍‌ରୁ ବାସଙ୍ଗ୍‌ଡିଂକେ, "ଅ ନେଙ୍ଗ୍‌ନେ ସିୟୋନଅରିଆ ବାସାକ୍ନେ ରେମୁଆଁଇଂ, ପେ ଅଶୂର ରେମୁଆଁକେ ଆବ୍‌ଟଗ୍‌ପା, ଅଃସେ ମିସର୍‌ ଆପେକେ ଡୁଡୁ ଏଃତେ ବଗ୍‌ଆର୍‌କେ ରକମ୍‌ ଅଶୂର ରେମୁଆଁ ଆପେକେ ବଗ୍‌ଆର୍‌ଏ ।"

25 ଉଃଡ଼ିସି ରକମ୍‌ ସଦାପ୍ରବୁ ରିସା ଡିଙ୍ଗ୍‌ଏ ଆରି ମେଇଂ ବିନାସ୍‌ ଡିଙ୍ଗ୍‌କ୍ନେ ବାନ୍‌ ନେନେ ରିସା ସାନ୍ତି ଡିଙ୍ଗ୍‌ଏ ।

26 ବାରି, ସାପାବାନ୍ ମ୍ନା ମାପ୍‌ରୁ, ଓରେବ୍ ବ୍ରିନିଆ ମିଦିୟନ୍ ଗୁଏଃକ୍ନେ କେଲା ଡିରକମ୍ ଡିଙ୍ଗ୍‌ବଗେ, ଦେତ୍‌ରକମ୍ ମେଁ ଆଡ଼ାତ୍ରା ମେଁନେ କୋରଡ଼ା ଆନ୍ତାର୍‌ଏ । ଆରି, ମେଁନେ ଦଣ୍ଡ୍ କେଣ୍ଡିଆ ଆଡ଼ାତ୍ରା ଲେଃଏ ଆରି ମିସର୍‌ନେ ନିୟମ୍ ଇସାବ୍‌ରେ ମେଁ ଆଃତଡ଼୍ୟାଃଏ ।

27 ଉଃଡ଼ିବେଲା ଆତେନ୍‌ ଦିନ୍ ପାଙ୍ଗ୍‌ଏ ଆସେରିଆନେ ସାସନ୍‌ବାନ୍ ଆପେକେ ଆନ୍ତାର୍ ମ୍ୱିଏ ବାରି ମେଙ୍ଗ୍‌ନେ ଲିଗିଙ୍ଗ୍‌କ୍ନେ ରିଗ୍‌ନ ପେନେ ଲୁଗଃବାନ୍ ସୁଲ ରାଙ୍ଗ୍‌ୱେଏ,

ସନ୍ୟ ଦଲ୍‌ଇଂ ଯୁଦ୍‌ ଡିଙ୍ଗ୍‌ନେ

28 ସନ୍ୟଦଲ୍‌ଇଂ, "ଆୟାତନ୍ୟା" ୱେଚା ଆର୍‌ଏ । ମେଇଂ "ମିଗ୍ରୋଣ ବିତ୍‌ରେ ବିଚେ ୱେଲାଏଃକେ । ମିକ୍‌ମସନିଆ ମେଁନେ ଜିନିସ୍ ପତର୍ ବକେ ମେଇଂ ।"

29 ମେଇଂ "ଗାଟି" ପୁଆଃଚେଃ ପାଙ୍ଗ୍‌ଲେଃଆର୍‌କେ । ମେଇଂ ଗେବାନ୍ୟା ବାସା ଲେଃଆର୍‌କେ । ରାମା ଜୁଜୁର୍‌ଡିଙ୍ଗ୍‌କେ । ଶାଉଲନେ ଗିବିୟା ଡାଗ୍ରା ରେମୁଆଁଇଂ ଲାଗ୍‌ଡ ଲେଃଆର୍‌କେ ।

30 ଅ ଗଲ୍ଲୀମନେ ରେମୁଆଁଇଂ, ପେ ସାରସାଗାଚେ ୱାଃସାର୍‌ପା । ଅ ଲୟିଶ, ଅଁପା । ଅନାଥୋତ୍‌ନେ ରେମୁଆଁଇଂ ଉତର୍‌ ବିଃ ।

31 ମଦମେନା ରେମୁଆଁଇଂ ଲାଗ୍‌ଡ ଲେଃଆର୍‌କେ । ବାରି ଗେବୀମ୍‌ ବାସାକ୍ନେ ରେମୁଆଁଇଂ ଲାଗ୍‌ଡନ୍‌ସା ମୁଇଂତୁଗ୍ ରିସିଙ୍ଗ୍‌ଆର୍‌ଡିଂକେ ।

32 ମେଁ ଏଃକେ ନୋବନିଆ ଲେଃଏ । ମେଁ ସିୟୋନ ସେଲାନେ କଣ୍ଡା ଯିରୂଶାଲମ୍‌ନେ ମ୍ନା ମ୍ନା କଣ୍ଡା ଆଡ଼ାତ୍ରା ନ୍ତି ଆୱେଃଡିଙ୍ଗ୍‌କେ ।

33 କେଲାପା ନେଇଂନେ ମାପ୍‌ରୁ ସର୍ବସକ୍ତିମାନ୍‌ ସଦାପ୍ରବୁ ଅଶୂରନେ କେନ୍ଦାକେ ସିଃବିଏ । ବାରି ମ୍ନା ମ୍ନା ଲେକ୍ନେ ସ୍ଲାଃକେ ସିତଗ୍ ବିଏ ଆରି ଜା ମ୍ନା ଆସୁଏ ଆମେକେ ଆଲ ଆଡିଙ୍ଗ୍‌ଏ ।

34 ସଦାପ୍ରବୁ ମେଁନେ କାଣ୍ଡା ଏତେ ଲାଟା ଲେକ୍ନେ କଣ୍ଡାକେ ଗୁଏ ଜଗ୍‌ତ୍ଲାଗ୍‌ଏ । ବାରି ମ୍ନା ବପୁ ଏଃତେ ଲିବାନୋନନେ ବିନାସ୍‌ ଡିଙ୍ଗ୍‌ଏ ।