ଜିସାୟ 29

ଦାଉଦ ଇନିକେ ଦଣ୍ଡ୍

1 ହାୟ ଅରୀୟେଲ, ଅରୀୟେଲ, ଦାଉଦନେ କୁଡ଼ିଆ ! ବରସ୍‌କେ ବରସ୍‌ ଆଃମିସୁଃ; ପାଣ୍ଡୁଏ ଆଣ୍ଡେଙ୍ଗ୍‌ ପାଲି ଇସାବ୍‌ରେ ପାଙ୍ଗ୍‌ଲେଃ;

2 ତେଲା ନିଂ ଅରୀୟେଲ ଆଡ଼ାତ୍ରା ଦୁକ୍‌ ଣ୍ଡ୍ରାଃଗଟେଏ, ଆତ୍‌ଅରିଆ ଦୁକ୍‌ ଆରି ଅଁ ଆର୍‌ଏ ଆରି ଆତେନ୍‌ ନିଂ ଆଡ଼ାତ୍ରା ଅରୀୟେଲ୍‌ନେ ଯଜ୍ଞ ବେଦି ଡିଙ୍ଗ୍‌ନେ ଜାଗା ରକମ୍‌ ଡିଂଏ ।

3 ବାରି, ନେ ଅଁ ଦିଗ୍‌ ପାକା ନାଁ ବିରୁଦ୍‌ରେ ବ୍ଲେସାଙ୍ଗ୍‌ ତିଆର୍‌ ଣ୍ଡ୍ରାଃଡିଂଏ ଆରି ଡୁଆ ବନ୍ଦି ଆଃଡିଂଚେ ଆନାକେ ନେଗେରେଏ ଆରି ନାଁ ସାମ୍‌ନାରେ ମୁଇଂ ସନ୍ୟଇଂ ଉର୍‌ନେ ତାନାଃ ନେରାଃରେଏ ।

4 ତେଲା ନାଁ ବାଆଃ ଆଲ ନାରାଃଡିଂଏ ଆରି ତୁବଃବାନ୍‌ ନାବାଃଲିର୍‌ଏ ଆରି ଦୁଲିବାନ୍‌ ନାଁନେ ସାମୁଆଁ ଲେଃଗା ଲେଃଗା ନ୍ନାଙ୍ଗ୍‌ଏ; ଆରି, ବୁତ୍‌ନେ ନ୍ୟାୟ୍‌ ନାଁନେ ବ୍ନାଲିର୍‌ ତୁବଃବାନ୍‌ ତାର୍‌ଏ ଆରି ଦୁଲିବାନ୍‌ ନାଁନେ ବ୍ନାଲିର୍‌ ପୁସ୍‌ପୁସ୍‌ ସବ୍‌ଦ ଡିଂଚେଃ ବାଃଲିର୍‌ଏ ।

5 ମାତର୍‌ ନାଁନେ ସତ୍ରୁଇଂନେ ରେମୁଆଁ ସାପା ନ୍‌ସୁଆର୍‌କ୍ନେ ଦୁଲି ରକମ୍ ଡିଂଆର୍‌ଏ ଆତେନ୍‌ ବୟାଙ୍କାର୍‌ ରେମୁଆଁଇଂନେ ଗ‍ଅଲିରେଇଂନିଆ ୱାଲେଃ ୱେନେ ଦୁଲି ରକମ୍‌ ଡିଙ୍ଗ୍‌ଏ; ମୁଇଂ ମାଡ୍‌ରେ ମାର୍ୟାଃତୁଗ୍‌ ଆକେନ୍‌ ଗଟେଏ ।

6 ସନ୍ୟ‍ଇଂନେ ନେତା କାଲାଆଃ ଲେଃନେ ମାପ୍‌ରୁ ତ୍ରିଗ୍‌ଡ଼ିଆଃ ସବ୍‌ଦ ଡିଙ୍ଗ୍‌ଏ, ତୁବଃ ପିଡାର୍‌ଏ, ମ୍ନାଃ ସବ୍‌ଦ ଡିଙ୍ଗ୍‌ଏ, ୱେଡ଼ିଆଃ ପାଙ୍ଗ୍ଏ, ହ୍ୱେଗୁର୍‌ ଆରି ଆଃଗିନେ ପୁଟୁଆଃସ ଏଃତେ ପାଙ୍ଗ୍‌ଏ ।

7 ବାରି, ସାପା ଜାତିନେ ଆଣ୍ଡିନେ ରେମୁଆଁ ଗ‍ଅଲି ଅରୀୟେଲ ବିରୁଦ୍‌ରେ ଜୁଜ୍‌ ଡିଂଆର୍‌ଏ, ଡାଗ୍‌ଲା, ଜାଣ୍ଡେଃ ମେଁନେ ଆରି ମେଁନେ ଡାଟ୍‌ ଡୁଆ ବିରୁଦ୍‌ରେ ଜୁଜ୍‌ ଡିଂଚେ ଆମେକେ ବିପଦ୍‌ଅରିଆ ଆନ୍ତାର୍‌ଆର୍‌ଏ, ତେନ୍‌ ସାପା ମୁଃସୁଡ଼ିଙ୍ଗ୍‌ ରକମ୍‌, ମିଡିଗ୍‌ ବେଲାନେ ଦର୍ସନ୍‌ ରକମ୍‌ ଡିଂଏ ।

8 ଆରି, ଡିରକମ୍‌ କିଡ଼େସଃ ରେମୁଆଁ ମୁଃସୁଡ଼ିଙ୍ଗ୍‌ଅରିଆ ଉଗ୍‌ଚଙ୍ଗ୍‌ ଣ୍ଡିଂକେ ଡାଗ୍‌ଚେଃ କେଏ, ମାତର୍‌ ମ୍ବ୍ରିଆଃଲା, ମେଁନେ ଜିବନ୍‌ ସରାଃ ଲେଃଏ, ଆରି ଡିରକମ୍‌ ଉଗ୍‌ଡିଆଃ ଡକ୍ନେ ରେମୁଆଁ ଣ୍ଡିଆଃ ଉଗ୍‌ ଣ୍ଡିଂକେ ଡାଗ୍‌ଚେଃ ମୁଃସୁଡ଼ିଙ୍ଗ୍‌ଅରିଆ କେଏ, ମାତର୍‌ ମ୍ବ୍ରିଆଃଲା, କେଲା, ମେଁ ଦୁର୍ବଲ୍‌ ଲେଃଏ ଆରି ଆମେକେ ଉଗ୍‌ଡିଆଃ ଡ ଲେଃଏ, ସିୟୋନ କଣ୍ଡାନେ ବିରୁଦ୍‌ରେ ଜୁଜ୍‌ ଡିଂଣ୍ଡ୍ରେ ସାପା ଜାତିନେ ରେମୁଆଁ ସାପା ଦେତ୍‌ରକମ୍‌ ଡିଂଆର୍‌ଏ ।

ଅବଏଲା ଡିଙ୍ଗ୍‌ନେବାନ୍‌ ତରକ୍‌ ସାମୁଆଁ

9 ପେ ତୁଆଁ ଲାଃଲାପା ଆରି ଇରିଆଃତୁଗ୍‌ପା; ପେ ନିଜେ ନିଜେ ସାଇ ସାର୍‌ଦା ଡିଙ୍ଗ୍‌ଚେ କାନା ଡିଂପା; ମେଇଂ ବୁସାଃ ଲେଃଆର୍‌କେ, ମାତର୍‌ ଅଙ୍ଗୁର୍‌ ରସ୍‌ ଉଗ୍‌ଚେଃ ଣ୍ଡୁ; ମେଇଂ ଆଡ୍‌କିବିଡ୍‌କି ଡିଂଆର୍‌ଏ, ମାତର୍‌ ସାଗ୍ରା ଉଗ୍‌ଚେଃ ଣ୍ଡୁ ।

10 ମେଃଡାଗ୍‌ଲା ସଦାପ୍ରବୁ ପେଇଂନେ ବିରୁଦ୍‌ରେ ଜାବର୍‌ ଲେମୁଁଆଃ ରକମ୍‌ ଆତ୍ମା କିଗ୍‌ ବକେ ଆରି ପେନେ ବବିସତ୍‌ ବକ୍ତାଇଂ ରକମ୍‌ ମ୍‌ମୁଁଆଃକେ ସିଲ୍‌ ବଗ୍‌ ବକେ ଆରି କିକେଡ଼େଙ୍ଗ୍‌ ରେମୁଆଁ ରକମ୍‌ ପେନେ ବାଆଃ ମେଁ ଡିଡା ବକେ ।

11 ବାରି, ସାପା ଦର୍ସନ୍‌ ପେନେ ନ୍‌ସାଃ ସିଲ୍‌ ବଗ୍‌ବକ୍ନେ ବଇ ରକମ୍‌ ଡିଂଲେଃକେ, ଜାଣ୍ଡେଃ ସିକିତ୍‌ ରେମୁଆଁକେ ଆତେନ୍‌ ବିଃଚେ ଅନୁଗ୍ରହ ଡିଂଚେ ଆକେନ୍‌ ପଡ଼େ ଡାଗ୍‌ଲା, ମେଁ ବାସଙ୍ଗ୍‌ଏ, ଆକେନ୍‌ ସିଲ୍‌ ବଗ୍‌ବ, ଏନ୍‌ସାଃ ନିଂ ପଡ଼େ ନ୍ନାୟା ଣ୍ଡୁ;

12 ଆରି, ଆତେନ୍‌ ବଇ ଅସିକିତ୍‌ ରେମୁଆଁକେ ବିଃଚେ ବାସଙ୍ଗ୍‌ଏ, ଅନୁଗ୍ରହ ଡିଂଚେ ଆକେନ୍‌ ପଡ଼େ ଡାଗ୍‌ଲା, ମେଁ ବାସଙ୍ଗ୍‌ଏ, ନିଂ ସିକିତ୍‌ ରେମୁଆଁ ଣ୍ଡୁ ।

13 ଆରି, ମାପ୍‌ରୁ ବାସଙ୍ଗ୍‌କେ, ଆକେନ୍‌ ରେମୁଆଁଇଂ ନେନେ ଡାଗ୍ରା ଡାଗ୍ରା ଡିଂମ୍ୟାଃଆର୍‌କେ ଆରି ମେଇଂ ନିଜେ ନିଜେନେ ସାର୍ମୁଆଃଅରିଆ ଆରି ତୁମୁଁଆଃଅରିଆ ନେନେ ସନ୍‌ମାନ୍‌ ଡିଂମ୍ୟାଃଆର୍‌କେ, ମାତର୍‌ ମେଇଂ ନିଜେ ନିଜେ ମନ୍‌ନେ ବାନ୍‌ ସ୍ଲ ବ‍ଆର୍‌କେ ଆରି ନେ ବିସ‍ଏରେ ମେଇଂନେ ଆଣ୍ଡିନ୍‌ ବୁଟମେଗ୍‌ ଲେଃକେ, ଆତେନ୍‌ ରେମୁଆଁବାନ୍‌ ସିକେ ଲାଏଃକ୍ନେ ଆଦେସ୍‌ ।

14 ଆତେନ୍‌ସା କେଲାପା, ନେ ଆକେନ୍‌ ରେମୁଆଁଇଂନେ ବିତ୍ରେ ମୁଇଂ ଇରିଆଃତୁଗ୍‌ ରକମ୍‌ କାମ୍‌, ଡାଗ୍‌ଲା, ଇରିଆଃତୁଗ୍‌ ଆରି କାବା ରକମ୍‌ କାମ୍‌ ନେଡିଂଏ, ବାରି ମେଇଂନେ ଜ୍ଞାନି ରେମୁଆଁଇଂନେ ବୁଦି ବିନାସ୍‌ ଡିଂଏ ଆରି ମେଇଂନେ ଚିନ୍ତା ରେମୁଆଁଇଂନେ ବୁଦି ଆଃବୁଃଡ଼ି ନେବିଃଏ ।

ବବିସତ୍‌ରେ ବାନେ ଆସା

15 ଜାଣ୍ଡେଃ ମାପ୍‌ରୁବାନ୍‌ ନିଜେ ନିଜେନେ ଜଜ୍‌ନା ଆଃବୁଡ଼ି ନ୍‌ସାଃ ଜାବର୍‌ ଚେସ୍‌ଟା ଡିଂମ୍ୟାଃଆର୍‌କେ, ମେଇଂ ଡଣ୍ଡ୍‌ ବାନେ ରେମୁଆଁଇଂ ! ଆରି, ମେଇଂ ତାଙ୍କିଗ୍‌ଅରିଆ ନିଜେ ନିଜେନେ କାମ୍‌ ଡିଂଚେଃ ବାସଙ୍ଗ୍‌ମ୍ୟାଃଆର୍‌କେ, ଆନେକେ ଜାଣ୍ଡେଃ କିକେ ଡିଂକେ ? ଆରି ଆନେକେ ଜାଣ୍ଡେଃ ସାମୁଁଆଃଡିଂକେ ?

16 ପେ ସାମୁଆଁକେ ଉଲ୍‌ଟା ଆଃଡିଂପେଡିଂକେ ! କୁମ୍ବାର୍‌ ମେଁନେ ତୁବଃନେ ରକମ୍‌ ଡିଙ୍ଗ୍‌ଏ; ଏନ୍‌ ରେମୁଆଁ ଆନେକେ ଆଃରେ ଆବକେ ଣ୍ଡୁ, ଆଃରେକ୍ନେ ଜିନିସ୍‌ ଣ୍ଡୁଲା ଆଃରେଣ୍ଡ୍ରେ ବିସ‍ଏରେ ଆକେନ୍‌ ବାସଙ୍ଗ୍‌ଏ ? ଣ୍ଡୁଲା ମେଁନେ ମେଃଡିଗ୍‌ ବୁଦି ଣ୍ଡୁ, ଆଃରେକ୍ନେ ଜିନିସ୍‌ କି ଆଃରେଣ୍ଡ୍ରେ ବିସ‍ଏରେ ଆକେନ୍‌ ବାସଙ୍ଗ୍‌ଏ ?

17 ଉଡ଼ିଦିନ୍‌ ଇଡ଼ିଂ ଲିବାନୋନ୍‌ ମେଁନେ କତ୍‌ ଲିଜ ରକମ୍‌ ଡିଂ ଆୟା ଣ୍ଡୁ ଆରି ଚୁଚୁ ବିବିଃନେ ଲିଜ ମେଁନେ କଣ୍ଡା ରକମ୍‌ ଆଡିଂ ଣ୍ଡୁ ?

18 ବାରି, ଆତେନ୍‌ ଦିନା ବ‍ଇରା, ବଇନେ ସାମୁଆଁ ଦ୍ରିଗ୍‌ଏ, ବାରି ଆମାସ୍‌ ମିଡିଗ୍‌କେ ଆରି ତାଙ୍ଗ୍‌କିଗ୍‌କେ କାନାନେ ମ୍‌ମୁଁଆଃ କେଏ ।

19 ଆରି ଦରମ୍‌ ରେମୁଆଁଇଂ ମାପ୍‌ରୁନେଅରିଆ ନିଜେ ନିଜେନେ ସାର୍ଦା ଜାବର୍‌ ଆଃଡିଂଆର୍‌ଏ ଆରି ରେମୁଆଁଇଂନେ ବିତ୍ରେ ଗରିବ୍‌ ରେମୁଆଁଇଂ ଇସ୍ରାଏଲ୍‌ନେ ପବିତ୍ର ରେମୁଆଁ ଅରିଆ ସାର୍‌ଦା ଡିଂଆର୍‌ଏ ।

20 ଦୟା ମାରାଃସୁଏକ୍ନେ ରେମୁଆଁଇଂ ନସ୍‌ଟ ଡିଙ୍ଗ୍‌ଆର୍‌ଏ । ଅପମାନ୍ ଡିଙ୍ଗ୍‌ନେ ରେମୁଆଁଇଂ ନସ୍‌ଟ ଡିଙ୍ଗ୍‌ଆର୍‌ଏ ଆରି ଜାଣ୍ଡେଇଂ ଅଦରମ୍‌ କାମ୍ ଡିଙ୍ଗ୍‌ମ୍ୟାଃ, ମେଇଂ ଡିଗ୍ ନସ୍‌ଟ ଡିଙ୍ଗ୍‌ଆର୍‌ଏ ।

21 ମେଇଂ ସାମୁଆଁଅରିଆ ରେମୁଆଁକେ ଦସି ଆଡିଂଆର୍‌ଏ ଆରି ଇନିନେ ବାଜାର୍‌ନିଆ ଦସ୍ ସାଃନ୍‌ସା ଉପାୟ୍ ଡିଙ୍ଗ୍‌ଆର୍‌ଏ ଆରି ବିନା ଦସ୍‌ରେ ଦାର୍ମିକ୍‌ ରେମୁଆଁ ଆଡ଼ାତ୍ରା ଅନ୍ୟାୟ୍‌ ଡିଂଆର୍‌ଏ ।

22 ଏନ୍‌ସାଃ ଅବ୍ରହାମ୍‌ନେ ମୁକ୍‌ତିଦାତା କାଲାଆଃନେ ମାପ୍‌ରୁ ଯାକୁବ୍‌ ବଂସ ବିସ‍ଏରେ ଦେକ୍‌ରକମ୍‌ ବାସଙ୍ଗ୍‌ଡିଂକେ; ଯାକୁବ୍‌ ଏବେ ଗିଆସଃ ଆଡିଂ ଣ୍ଡୁ, କି ମେଁନେ ସାର୍ମୁଆଃ ଆନ୍‌ସୁଆର୍‌ ଣ୍ଡୁ ।

23 ମାତର୍‌ ଉଃଡ଼ିବେଲା ମେଁ ନେନେ ନ୍ତିବାନ୍‌ ତିଆର୍‌ ଡିଂକ୍ନେ କାମ୍‌ ରକମ୍‌ ମେଁନେ ଗଡ଼େଇଂକେ ନିଜେନେ ବିତ୍ରେ କେଏ, ଅଃତେନ୍‌ବେଲା ମେଇଂ ନେନେ ମ୍ନିକେ ପବିତ୍ର ଡାଗ୍‌ଚେ ମାନେଃଆର୍‌ଏ; ଆଁ, ମେଇଂ ଯାକୁବ୍‌ନେ ପର୍‌ମେସର୍‌କେ ପବିତ୍ର ଡାଗ୍‌ଚେଃ ମାନେଃଆର୍‌ଏ ଆରି ଇସ୍ରାଏଲ୍‌ନେ ପର୍‌ମେସର୍‌କେ ବୁଟ ଆର୍‌ଏ ।

24 ଜାଣ୍ଡେଃଇଂନେ ବାୟା ରକମ୍‌ନେ ମନ୍‌, ମେଇଂ ଡିଗ୍‌ ବୁଦି ବାଆର୍‌ଏ ଆରି କୁଟ୍‌ ଡିଂଣ୍ଡ୍ରେଇଂ ଆତେନ୍‌ ସାମୁଆଁ ସିକେଆର୍‌ଏ ।