1 ଆହା, ବିନ୍‌ ଦେସ୍‌ନେ ରେମୁଆଁଇଂ ଡିରକମ୍‌ ନାଁ ଡାଗ୍ରା ଇରିୟାଃତୁଗ୍‌ଆର୍‌ଏ, ଆକେନ୍‌ସାଃ ନାଁନେ ବିରଦି‍ଇଂକେ ନାଁନେ ମ୍ନି ଆମ୍ୟାଃନ୍‌ସାଃ, 2 ସୁଆ ଜାଟି ଆଃଡୁଆକେ ରକମ୍‌, ସୁଆ ଣ୍ଡିଆଃ ଆଃଗିଃକେ ରକମ୍‌ ଅଃନା ନାଁ କିତଙ୍ଗ୍‌ଇନି ବଗ୍‌ଚେଃ ନାଜାର୍‌ଏ; ଆରି କଣ୍ଡାଇଂ ନାଁ ଡାଗ୍ରା ଜାର୍‌ଆର୍‌ଏ ! 3 ଉଃଡ଼ିବେଲା ନାଁ ନେନେ ବୟଙ୍କାର୍‌ କାମ୍‌ ନାଡିଂକେ, ଅଃତେନ୍‌ବେଲା ନାଁ ଜାର୍‌ଚେଃ ନାପାଙ୍ଗ୍‌କେ, କଣ୍ଡାଇଂ ନାଁ ଡାଗ୍ରା ଜୁର୍ ଆର୍‌କେ । 4 ମେଃଡାଗ୍‌ଲା ଜା ନିଜର୍‌ ଉର୍‌ଣ୍ଡ୍ରେ ପାକା କାମ୍‌ ପୁରନ୍‌ ଆଃଡିଂଏ, ରେମୁଆଁଇଂ ବାୱିର୍‌ କାଲ୍‌ବାନ୍‌ ଆନାକେ ଆନ୍ତାର୍‌ଚେଃ ବିନ୍‌ ପର୍‌ମେସର୍‌ ସାମୁଆଁ ଆଅଁକେ ଣ୍ଡୁ, କି ନ୍ଲୁଗ୍‌ ଦ୍ରିଗ୍‌ ଆଲେଃକେଣ୍ଡୁ, କି ମ୍‌ମୁଁଆଃ ଆକେକେ ଣ୍ଡୁ । 5 ମୁଃଡ଼ି ରେମୁଆଁ ସାର୍ଦାରେ ଦରମ୍‌ କାମ୍‌ ଡିଂଏ, ଜାଜା ନାଁନେ ଗାଲିଅରିଆ ଆନାକେ ମନେ ଏତେଆର୍‌ଏ, ନାଁ ମେଇଂନେ ଏଃତେ ମିସୁଃ ଲାଃଲା; କେଲା, ନାଁ ରିସା ଡିଂନାଲେଃଗେ ଆରି ନେ ପାପ୍‌ ନେଡିଂକେ; ନେ ଜାବର୍‌ ଦିନ୍‌ ଆତ୍‌ଅରିଆ ନେଲାଏଃକେ, ନେ କି ପାପ୍‌ କେମା ନେବାଏ ? 6 ମେଃଡାଗ୍‌ଲା ନେ ଅପବିତ୍ର ରେମୁଆଁ ରକମ୍‌ ଡିଂନେଲାଏଃକେ ଆରି ନେନେ ଦରମ୍‌ କରମ୍‌ ସାପା ଅପବିତ୍ର ସକାପାଟାଇ ରକମ୍‌ ଆରି ନେ ସାପାରେ ଉଲିଆଃ ରକମ୍‌ ଜିରେ ନେଡିଂକେ; ଆରି, ନେନେ ପାପ୍‌ କାମ୍‌ ସାପା ୱେଡ଼୍ୟାଃ ରକମ୍‌ ଆନେକେ ଆଃୱାଲେଃ ଡୁଙ୍ଗ୍‌ଡ‍ଏ । 7 ବାରି, ନା ନାଁନେ ମ୍ନିରେ ପାର୍‌ତନା ଡିଂଏ, ଜା ଆନାଁକେ ସାଃନ୍‌ସାଃ ନିଜ୍‌କେ ଇକ୍‌ଚା ଡିଂଏ, ଦେକ୍‌ରକମ୍‌ ଜାଡିଗ୍‌ ଣ୍ଡୁ; ମେଃଡାଗ୍‌ଲା ନା ନେନେବାନ୍‌ ନିଜର୍‌ ସାର୍ମୁଆଃ ବୁଃଡ଼ିନାବକେ ଆରି ନେନେ ପାପ୍‌ ବାନ୍‌ ଆନେକେ ଆନ୍ତାର୍ ନାବକେ । 8 ମାତର୍‌ ଏବେ ଏ ସଦାପ୍ରବୁ, ନାଁ ନେନେ ଆବା; ନେ ତୁବଃ, ନାଁ ନେନେ କୁମ୍ବାର୍‌; ବାରି, ନେ ସାପାରେ ନାଁନେ ନ୍ତିବାନ୍‌ ତିଆର୍‌ ଡିଂକ୍ନେ କାମ୍‌ । 9 ଏ ସଦାପ୍ରବୁ, ଜାବର୍‌ ରିସା ଆଡିଂଗେ, କି ଜୁଗ୍‌ ଜୁଗ୍‌ ପାପ୍‌ ମନେ ଆବଗେ; ନେ ଗୁଆରି ଡିଂନେଡିଂକେ, କେଲା, ଆନେକେ କେଲା, ନେ ସାପାରେ ନାଁନେ ରେମୁଆଁ । 10 ନାଁନେ ପବିତ୍ର ଇନି ସାପା କଣ୍ଡା ଡିଂଲାଏଃକେ, ସିୟୋନ କଣ୍ଡା ଡିଂଲାଏଃକେ, ଯିରୂଶାଲମ ବିନାସ୍‌ ଡିଂଲାଏଃକେ । 11 ନେନେ ନ୍ତାଞ୍ଜାଃଇଂ ଆଣ୍ଡିନେ ଜାଗା‍ଅରିଆ ନାଁନେ ପ୍ରସଂସା ଡିଂଆର୍‌କେ, ନେନେ ଆତେନ୍‌ ପବିତ୍ର ଆରି ସୁନ୍ଦର୍‌ ଡୁଆ ସୁଆ‍ଅରିଆ ଗିଃୱେଲାଏଃକେ ଆରି ନେନେ ମନ୍‌ ଚିନ୍ତା ସାମୁଆଁ ସାପା ନସ୍‌ଟ ଡିଂଲାଏଃକେ । 12 ଏ ସଦାପ୍ରବୁ, ଆକେନ୍‌ ସାପା ଡିଂଲା ଡିଗ୍‌ ନାଁ କି ନିଜ୍‌କେ ଆଃବୁଙ୍ଗ୍‌ଚେଃ ନାବ‍ଏ ? ନାଁ କି ବୁଙ୍ଗ୍‌ ଲାଏଃଚେଃ ଆନେକେ ଜାବର୍‌ କସ୍‌ଟ ନାବିଃଏ ?