ଜିସାୟ 37

ହିଜକୀୟକେ ଯିଶାଇୟନେ ଆଦେସ୍‌

1 ଏନ୍‌ଇଡ଼ିଂ ହିଜକୀୟ ରାଜା ଆତେନ୍‌ ଅଁଚେଃ ନିଜର୍‌ ସକା ସ୍ୟାଃଚେ ଆରି ବାସ୍ତା କୁଇଚେଃ ମାପ୍‌ରୁନେ ଡୁଆ ଡାଗ୍ରା ୱେକେ । 2 ବାରି, ମେଁ ରାଜା ଡୁଆନେ ନେତା ଇଲୀୟାକୀମ୍‌କେ ଆରି ଶୀବ୍‌ନ ଗୁଗୁଆର୍‌ଣ୍ଡ୍ରେକେ ଆରି ପୁଜାରି‍ଇଂନେ ବୟସ୍କ ରେମୁଆଁଇଂକେ ବାସ୍ତା କୁଇଚେଃ ଆମୋସନେ ଉଙ୍ଗ୍‌ଡେ ଯିଶାଇୟ ବବିସତ୍‌ ବକ୍ତାନେ ଡାଗ୍ରା ବେକେ । 3 ତେନ୍‌ଇଡ଼ିଂ ମେଇଂ ଆମେକେ ବାସଙ୍ଗ୍‌ଆର୍‌କେ, ହିଜକୀୟ ଦେକ୍‌ରକମ୍‌ ବାସଙ୍ଗ୍‌ବକେ, ଏଃକେନ୍‌ ଦିନ୍‌ ଦୁକ୍‌ ବାନେ ଆରି ଡଣ୍ଡ୍‌ ବାନେ ଆରି ଅପମାନ୍‌ନେ ଦିନ୍‌; ମେଃଡାଗ୍‌ଲା ନେଃ ମୁଇଂ ଗଡ଼େଅ ଜନମ୍‌ ବିଃନ୍‌ସାଃ ତେରେପେତେ ଡିଂଲେଃକ୍ନେ ସେଲାମ୍ବୁଏଃ ରକମ୍‌; ମାତର୍‌ ଜନମ୍‌ ବିଃନେ ବପୁ ଣ୍ଡୁ । 4 ଡିଂଲେଃଏ, ଜିବିତ୍‌ ପର୍‌ମେସର୍‌କେ ନିନ୍ଦା ଆଃଡିଙ୍ଗ୍‌ନ୍‌ସାଃ ନିଜର୍‌ ମାପ୍‌ରୁ ଅଶୂରୀୟ ରାଜା ବାନ୍‌ ବେବକ୍ନେ ରବଶାକିନେ ସାପା ସାମୁଆଁ ମାପ୍‌ରୁ ନାଁ ପର୍‌ମେସର୍‌ ଅଁଏ, ବାରି ମାପ୍‌ରୁ ନାଁନେ ପର୍‌ମେସର୍‌ ଆଣ୍ଡିନେ ସାମୁଆଁ ଦ୍ରିଗ୍‌ଲେଃକେ, ତେନ୍‌ ନ୍‌ସାଃ ପରିକ୍ୟା ଡିଂଏ; ଏନ୍‌ସାଃ ଆଣ୍ଡିନେ ବାକି ଲେଃଆର୍‌କେ, ମେଇଂ ଆତ୍ଲା ନାଁ ପାର୍‌ତନା ଡିଂ । 5 ଦେକ୍‌ରକମ୍‌ ହିଜକୀୟ ରାଜାନେ ଚାକର୍‌ଇଂ ଯିଶାଇୟନେ ଡାଗ୍ରା ପିଙ୍ଗ୍‌ଚାଃଆର୍‌କେ । 6 ତେନ୍‌ଇଡ଼ିଂ ଯିଶାଇୟ ଆମେଇଂକେ ବାସଙ୍ଗ୍‌କେ, ପେ ନିଜର୍‌ ସାକାର୍‌କେ ଦେକ୍‌ରକମ୍‌ ପେବାସଙ୍ଗ୍‌ଏ, ମାପ୍‌ରୁ ବାସଙ୍ଗ୍‌ଡିଂକେ, ଅଶୂରୀୟ ରାଜାନେ ଚାକର୍‌ଇଂ ଆନେକେ ନିନ୍ଦା ଡିଂନେ ମୁଃଡ଼ି ସାମୁଆଁ ନାଁ ଅଁନାଲେଃକେ, ତେନ୍‌ଇଂ ଆବ୍‌ଟଗେ । 7 କେଲା, ନେ ତେନ୍‌ ବିତ୍ରେ ମୁଇଂ ଆତ୍ମା ନେବିଃଏ, ବାରି ମେଁ ମେଃଡିଗ୍‌ ରେମୁଆଁନେ ସାମୁଆଁ ଅଁଚେ ନିଜର୍‌ ଦେସ୍‌ ପାକା ଆଣ୍ଡେ ୱେଏ; ଆରି, ନେ ମେଁନେ ନିଜର୍‌ ଦେସ୍‌ଅରିଆ କାଣ୍ଡା ବାନ୍‌ ଆମେକେ ନେବାଗୁଏଃଏ ।

ଅଶୂରିୟଇଂ ବାର୍‌ମୁଇଂତର୍‌ ଦମକ୍‌ ବିଃନେ

8 ଆରି ଅଶୂରୀୟ ରାଜା ଲାଖୀଶ୍‌ଠାବାନ୍‌ ୱେଲାଏଃକେ ଡାଗ୍‌ଚେ ରବ୍‌ଶାକି ଅଁଚେ ଆଣ୍ଡେକେ ଆରି ଆମେକେ ଲିବ୍ନା ବିରୁଦ୍‌ରେ ଜୁଜ୍‌ ଡିଂଡିଂକ୍ନେ କେକେ । 9 ବାରି, ଅଶୂରୀୟ ରାଜା କୂଶ ଦେସ୍‌ନେ ତିର୍ହକ ରାଜା ବିସ‍ଏରେ ଆକେନ୍‌ ସାମୁଆଁ ଅଁକେ ଜେ, ମେଁ ନାଁ ବିରୁଦ୍‌ରେ ଜୁଜ୍‌ ଡିଂନେ ପାଙ୍ଗ୍‌ଲେଃକେ; ଆକେନ୍‌ ଅଁଚେ ମେଁ ହିଜକୀୟ ଡାଗ୍ରା କବର୍ ବିଃଣ୍ଡ୍ରେକେ ବେଚେ ବାସଙ୍ଗ୍‌କେ, 10 ପେ ଯିହୁଦାନେ ରାଜା ହିଜକୀୟକେ ଆକେନ୍‌ ସାମୁଆଁ ନାବାସଙ୍ଗ୍‌ଏ, ଯିରୂଶାଲମ ଅଶୂରୀୟ ରାଜାନେ ନ୍ତିଅରିଆ ଆପାଙ୍ଗ୍‌ ଣ୍ଡୁ, ଆକେନ୍‌ ସାମୁଆଁ ବାସଙ୍ଗ୍‌ଚେ ନାଁନେ ବିସ୍‌ବାସ୍‌କେ ପର୍‌ମେସର୍‌ ଆନାକେ ଆରାଃଆବଃଲେଃ । 11 କେଲା, ଅଶୂରୀୟ ରାଜାଇଂ ମୁଇଂ ଡିଗ୍‌ ଆଲେଃକେ ରକମ୍‌ ବାଗୁଏଃନେ ବାନ୍‌ କ୍ଲିଗ୍‌ ଦେସ୍‌ ଆଡ଼ାତ୍ରା ମେଃନେ ଡିଂବକେ, ଆତେନ୍‌ ନାଁ ଅଁନାଲେଃକେ; ଆରି, ନାଁ ମେଃନେ ରକ୍ୟା ନାବାଏ ? 12 ନିଂନେ ଅଃସେଣ୍ଡ୍ରେ ମୁଃଡ଼ି ଗୋଶନ ଆରି ହାରୋଣ ଆରି ରେତ୍ସଫ୍‌ ଦେସ୍‌ନେ ରେମୁଆଁଇଂକେ ଆରି ତଳଃସର ବାସା ଲେଃକ୍ନେ ଏଦନ ରେମୁଆଁଇଂକେ ବାଗୁଏଃକେ, ମେଇଂନେ ଦେବ୍‌ତାଇଂ ମେଃନେ ଆମେଇଂକେ ରକ୍ୟା ଡିଂକେ ? 13 ହମାତନେ ରାଜା ଆରି ଅର୍ପଦନେ ରାଜା ଆରି ସଫର୍ବୟିମ ଇନିନେ, ହେନାନେ ଆରି ଅବ୍ବାନେ ରାଜା ଆଣ୍ଡିକାଃ ?

ହିଜକୀୟନେ ପାର୍‌ତନା

14 ଏନ୍‌ଇଡ଼ିଂ ହିଜକୀୟ କବର୍ ବିଃଣ୍ଡ୍ରେନେ ନ୍ତିବାନ୍‌ ଚିଟି ବାଚେଃ ଆତେନ୍‌ ପଡ଼େକେ; ଆରି, ହିଜକୀୟ ମାପ୍‌ରୁନେ ଡୁଆ ୱେଚେ ମାପ୍‌ରୁନେ ସେଃମଁ ଆତେନ୍‌ ମେଲେ ବିଃକେ । 15 ଆରି ହିଜକୀୟ ମାପ୍‌ରୁନେ ଡାଗ୍ରା ପାର୍‌ତନା ଡିଂଚେ ବାସଙ୍ଗ୍‌କେ, 16 ଅ କିରୂବଇଂନେ ଆଡ଼ାତ୍ରା ଲେଃନେ ସାପାଟୁ ବପୁକ୍ନେ ମାପ୍‌ରୁ, ଇସ୍ରାଏଲ୍‌ନେ ପର୍‌ମେସର୍‌, ନାଁ, ନାଁ ମଚ୍‌ପୁର୍‌ ଲେଃକ୍ନେ କ୍ଲିଗ୍‌ ରାଜ୍ୟନେ ପର୍‌ମେସର୍‌ ନାଲେଃକେ; ନାଁ କିତଙ୍ଗ୍‌ ଆରି ମଚ୍‌ପୁର୍‌ ଆଃରେନାବକେ । 17 ଅ ମାପ୍‌ରୁ, ନାଁନେ ନ୍ଲୁଗ୍‌ ଡେରେଚେ ନାପା‍ଅଁ ଅ ମାପ୍‌ରୁ, ନାଁନେ ମ୍‌ମୁଁଆଃ ଏଃତେ କେଲା; ବାରି, ଜିବିତ୍‌ ପର୍‌ମେସର୍‌କେ ଅପମାନ୍‌ ଡିଂନ୍‌ସାଃ ସନ୍‌ହେରୀବ୍‌ ମେଁନେ ବାସଙ୍ଗ୍‌ଚେ ବେବକେ, ମେଁନେ ଆତେନ୍‌ ସାପା ସାମୁଆଁ ଦ୍ରିଗ୍‌ । 18 ଅ ମାପ୍‌ରୁ, ଅଶୂରୀୟ ରାଜାଇଂ ସାପା ଦେସ୍‌ନେ ରେମୁଆଁଇଂକେ ଆରି ମେଇଂନେ ଦେସ୍‌କେ ଚିନ୍‌ଚତର୍ ଆଡିଙ୍ଗ୍‌ବକେ । 19 ଆରି ମେଇଂନେ ଦେବ୍‌ତାଇଂକେ ସୁଆ‍ଅରିଆ ଜଗ୍‌ତ୍ଲାଗ୍‌ ବ‍ଆର୍‌କେ, ଆକେନ୍‌ ସତ୍‌; ମେଃଡାଗ୍‌ଲା ମେଇଂ ପର୍‌ମେସର୍‌ ଣ୍ଡୁ, ରେମୁଆଁନେ ନ୍ତିବାନ୍‌ ତିଆର୍‌ ଡିଂକ୍ନେ କାମ୍‌, ସୁଆ ଆରି ବ୍ରି ମାତର୍‌; ଏନ୍‌ସାଃ ମେଇଂ ଆମେଇଂକେ ନସ୍‌ଟ ଆଡିଙ୍ଗ୍‌ବକେ । 20 ଏନ୍‌ସାଃ ଏବେ, ଅ ମାପ୍‌ରୁ, ନେନେ ପର୍‌ମେସର୍‌, ମେଁନେ ନ୍ତିବାନ୍‌ ଆନେକେ ରକ୍ୟା ଡିଂ, ତେଲା ନାଁ, ନାଁ ଜେ ମାପ୍‌ରୁ ନାଲେଃକେ, ଆକେନ୍‌ ମଚ୍‌ପୁର୍‌ ଲେଃକ୍ନେ ସାପା ରାଜ୍ୟ ମ୍ୟାଃଆର୍‌ଏ ।

ରାଜାକେ ଯିଶାଇୟନେ କବର୍‌

21 ଏନ୍‌ଇଡ଼ିଂ ଆମୋସନେ ଉଙ୍ଗ୍‌ଡେ ଯିଶାଇୟ ହିଜକୀୟ ଡାଗ୍ରା ବାସଙ୍ଗ୍‌ଚେ ବେକେ, ମାପ୍‌ରୁ ଇସ୍ରାଏଲ୍‌ନେ ପର୍‌ମେସର୍‌ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ନାଁ ଅଶୂରନେ ରାଜା ସନ୍‌ହେରୀବ୍‌ ବିରୁଦ୍‌ରେ ନେ ଡାଗ୍ରା ପାର୍‌ତନା ଡିଂକ୍ନେସାଃ, 22 ମାପ୍‌ରୁ ମେଁ ବିସ‍ଏରେ ଆକେନ୍‌ ସାମୁଆଁ ବାସଙ୍ଗ୍‌ବକେ; ସିୟୋନନେ ଡିଣ୍ଡା ସେଲା ଆନାକେ ଅପମାନ୍‌ ଡିଂବକେ ଆରି ଆନାକେ ଲୁଆଃ ବକେ; ଯିରୂଶାଲମନେ ସେଲା ନାଁ ପାକା ବାଆଃ ଆଃୱେଃବକେ । 23 ନାଁ ଆଜାକେ ଗିଆସ ଆରି ନିନ୍ଦା ଆଃଡିଂନାବକେ ? ଆରି ନାଁ ଜାନେ ବିରୁଦ୍‌ରେ ନା ୱାଃସାର୍‌ନାଡିଂକେ ଆରି ନିଜର୍‌ ମ୍‌ମୁଁଆଃ ଆଡ଼ାତ୍ରା କେନାଡିଂକେ ? ଇସ୍ରାଏଲ୍‌ନେ ପବିତ୍ର ମାପ୍‌ରୁ ବିରୁଦ୍‌ରେ ଆତାନ୍ । 24 ନାଁ ନିଜର୍‌ ଚାକର୍‌ଇଂ ବାନ୍‌ ମାପ୍‌ରୁକେ ନିନ୍ଦା ଆଡିଙ୍ଗ୍ ନାବକେ ଆରି ବାସଙ୍ଗ୍‌ନାବକେ, ନାଁ ନିଜର୍‌ ଜାବର୍‌ ରତ୍‌ଅରିଆ କଣ୍ଡାନେ ଆଡ଼ାତ୍ରା, ଲିବାନୋନ୍‌ନେ ତିଆର୍‌ କଣ୍ଡା ଆଡ଼ାତ୍ରା ପାଙ୍ଗ୍‌ନେଲେଃକେ । ଆରି, ନେଁ ଆତ୍‌ନେ ତିଆର୍‌ ଏରସ ସ୍ଲାଃ ଆରି ଆତ୍‌ନେ ନିମାଣ୍ଡାଃ ଦେବଦାରୁ ସ୍ଲାଃ ସାପା ସିଃ ନେବିଃଏ; ବାରି, ନେଁ ମେଁନେ ସ୍ଲଲେଃକ୍ନେ ତିଆର୍‌ ଜାଗା‍ଅରିଆ ଆରି ମେଁନେ ଚୁଚୁ ବର୍ତି ଡିଂଲେଃକ୍ନେ ଲିଜ ରକମ୍‌ନେ କଣ୍ଡା‍ଅରିଆ ନେଗାଏ । 25 ନେଁ ଣ୍ଡିଆଃ ଗଃଚେ ଉଗ୍‌ନେଲେଃକେ, ଆରି ନେଁ ନିଜର୍‌ ଞ୍ଚ ଆଲ ମିସର୍‌ନେ ଲଣ୍ଡିଆଃ ସାପା ନେରାଃନ୍‌ସୁଆର୍‌ଏ । 26 ଡିରକମ୍‌ ନେ ଜାବର୍‌ ଦିନ୍‌ବାନ୍‌ ଆକେନ୍‌ ଆଃରେନେବକେ ଆରି ଅଃସେ କାଲ୍‌ବାନ୍‌ ଆକେନ୍‌ ସ୍ରି ନେବକେ, ଆକେନ୍‌ ମେଃନେ ନାଁ ନା‍ଅଁକେ ? ନାଁ ଜେ କାନ୍ତ ଗେରେକ୍ନେ ଇନି‍ଇଂ ଦଂସ ଆଃଡିଂଚେ ତେନ୍‌ ସାପାକେ କୁରୁକୁର୍ୟାଃ ନାରାଡିଙ୍ଗ୍‌ଏ, ଆକେନ୍‌ ଏବେ ନେ ସପଲ୍‌ ଡିଂନେବକେ । 27 ଏନ୍‌ସାଃ ଆତ୍‌ଅରିଆ ବାସାଣ୍ଡ୍ରେ ସାତାଲୁ ଡିଂଆର୍‌କେ, ମେଇଂ ନିରାସ୍‌ ଆରି ତେରେପେତେ ଡିଂଆର୍‌କେ; ମେଇଂ ଲିଜନେ ଚେଃମୁଆଁ ଆରି ତ୍ମି ଚେଃମୁଆଁ, ଡୁଆ ବ୍ଲେସାଙ୍ଗ୍‌ନେ ଆଡ଼ାତ୍ରା ଲେଃକ୍ନେ ଚେଃମୁଆଁ ଆରି ଆବ୍ଲେକ୍ନେ ଲିଜ ରକମ୍‌ ଡିଂଆର୍‌କେ । 28 ମାତର୍‌ ନାଁନେ କୁକନେ ଆରି ବାଏରେ ୱେନେ ଆରି ବିତ୍ରେ ପାଙ୍ଗ୍‌ନେ ଆରି ନେ ବିରୁଦ୍‌ରେ ରିସା ଡିଂନେ ନେ ମ୍ୟାଃନେଡିଂକେ । 29 ନା ନେ ବିରୁଦ୍‌ରେ ରିସା ଡିଂନାବକେ ଆରି ନାଁନେ ଗର୍ବ ସାମୁଆଁ ନେନେ ନ୍ଲୁଗ୍‌ଅରିଆ ପାଙ୍ଗ୍‌ଲେଃକେ, ଆକେନ୍‌ସାଃ ନେ ନାଁନେ ମ୍‌ମୁଁଅରିଆ ନେନେ ଆକୁଡ଼ି ଆରି ନାନେ ତୁମୁଁଆଃଅରିଆ ନେନେ ଲାଗାମ୍‌ ନେବିଏ, ବାରି ନାଁ ଆଣ୍ଡିନେ ଗାଲି ନାପାଙ୍ଗ୍‌କେ, ଆତେନ୍‌ ଗାଲିନେ ଆନାକେ ଆଃଆଣ୍ଡେ ନେବିଃଏ । 30 ଏନ୍‌ସାଃ ଅ ହିଜକୀୟ ନା ଆଡ଼ାତ୍ରା ଆକେନ୍‌ ଚିନ୍‌ ଡିଂଏ; ପେ ଆକେନ୍‌ ମୁଆଁ ନିଜେ ତାର୍‌କ୍ନେ କିଆଉଁଆଃ ଆରି ଦୁତିୟ ମୁଆଁ ଆତ୍‌ବାନ୍‌ ପଃଡ଼୍ୟାଃକ୍ନେ କିଆଉଁଆଃ ପେଚଙ୍ଗ୍‌ଏ; ବାରି, ତୁର୍ତିୟ ମୁଆଁ ମୁଞ୍ଜି ବିଗ୍‌ଚେ କିଆଉଁଆଃ ପେଗୁଆଃଏ ଆରି ଅଙ୍ଗୁର୍‌ ଲିଜ ଆଃଡିଂଚେ ଆତ୍‌ନେ ଚୁଚୁ ପେଚଙ୍ଗ୍‌ଏ । 31 ବାରି, ଯିହୁଦା ବଂସନେ ରକ୍ୟା ବାଲେଃକ୍ନେ ବାକି ରେମୁଆଁଇଂ ବାର୍‌ମୁଇଂତର୍‌ ଆଲ ଚେର୍‌ ୱେଏ ଆରି ଆଡ଼ାତ୍ରା ଚୁଚୁ ଚୁଏ । 32 ମେଃଡାଗ୍ଲା ଯିରୂଶାଲମବାନ୍‌ ମୁଇଂ ବାକି ଲେଃକ୍ନେ ରେମୁଆଁ ଆରି ରକ୍ୟା ବାଲେଃକ୍ନେ ରେମୁଆଁ ସିୟୋନ କଣ୍ଡାବାନ୍‌ ତାର୍‌ଆର୍‌ଏ; ସାପା ବାନ୍‌ ବପୁ ମାପ୍‌ରୁନେ ସାର୍ଦା ଆକେନ୍‌ ସାମୁଆଁ ପୁରନ୍‌ ଆଡିଂଏ । 33 ଏନ୍‌ସାଃ ମାପ୍‌ରୁ ଅଶୂରୀୟ ରାଜା ବିସ‍ଏରେ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ମେଁ ଆକେନ୍‌ ଇନି ଆପାଙ୍ଗ୍‌ ଣ୍ଡୁ, କି ଆତ୍‌ଅରିଆ ଙାଁ ଆଟୁଇଙ୍ଗ୍‌ ଣ୍ଡୁ, କି ତେନ୍‌ ସେଃମଁ ଗ୍ରି ପାଟା ସାଃଚେ ଆପାଙ୍ଗ୍‌ ଣ୍ଡୁ, ଣ୍ଡୁଲା ତେନ୍‌ ବିରୁଦ୍‌ରେ ପିତୁର୍ ପାକା ଆଗାଗ୍‌ ଣ୍ଡୁ । 34 ମାପ୍‌ରୁ ବାସଙ୍ଗ୍‌ଡିଂକେ, ମେଁ ଆଣ୍ଡିନେ ଗାଲି ପାଙ୍ଗ୍‌କେ, ଆତେନ୍‌ ଗାଲି ଆଣ୍ଡେ ୱେଏ ଆରି ମେଁ ଆକେନ୍‌ ଇନି ଆପାଙ୍ଗ୍‌ ଣ୍ଡୁ । 35 ମେଃଡାଗ୍ଲା ନେ ନିଜର୍‌ ଆତ୍ଲା ଆରି ନେନେ ଚାକର୍‌ ଦାଉଦ ଆତ୍ଲା ଆକେନ୍‌ ଇନିକେ ରକ୍ୟା ଡିଂନ୍‌ସାଃ ସାପଟ୍‌ ନେଡିଂଏ । 36 ଏନ୍‌ଇଡ଼ିଂ ମାପ୍‌ରୁନେ ଦୁତ୍‌ ତାର୍‌ଚେ ଅଶୂରୀୟ‍ଇଂନେ କେମ୍ପ୍‌ଅରିଆ ମୁଇଂ ଲାକ୍‌ ପଞ୍ଚା‍ଅସି ଅଜାର୍‌ ରେମୁଆଁ ବାଗୁଏଃକେ; ବାରି, ରେମୁଆଁଇଂ ଞ୍ଜିର୍‌ନୁଗ୍‌ ତଃଡ଼୍ୟାଃ ବେଲା, କେଲାପା ସାପାରେ ଗୁଏଃକ୍ନେ ମଡ଼ା ଆଣ୍ଡେଙ୍ଗ୍‌ । 37 ତେନ୍‌ଇଡ଼ିଂ ଅଶୂରନେ ରାଜା ସନ୍‌ହେରୀବ୍‌ ଗାକେ ଆରି ଆଣ୍ଡେଚେ ନୀନିବୀଅରିଆ ବାସାକେ । 38 ଏନ୍‌ଇଡ଼ିଂ ମେଁ ନିଜର୍‌ ନିଷ୍ରୋକ ମ୍ନିକ୍ନେ ଦେବ୍‌ତାନେ ଡୁଆ‍ଅରିଆ ପୁଜା ଡିଂନେ ବେଲା ଅଦ୍ରମ୍ମେଲକ୍‌ ଆରି ଶରେତ୍ସର ମ୍ନିକ୍ନେ ମେଁନେ ମ୍ବାର୍‌ ଉଙ୍ଗ୍‌ ଆମେକେ କାଣ୍ଡା ଏଃତେ ବାଗୁଏଃକେ । ତେସାଃ ମେଇଂ ଆରାରାଟ୍‌ ଦେସ୍‌ ପାକା ଲାଗ୍‌ଡକେ । ବାରି, ମେଁନେ ଉଙ୍ଗ୍‌ଡେ ଏସରହଦ୍ଦୋନ୍‌ ମେଁନେ ଜାଗା ଅରିଆ ସାସନ୍‌ ଡିଂକେ ।