1 ଅ ଦର୍ମ ପ୍ଲାଃ ଅଲେଙ୍ଗ୍‌ ରେମୁଆଁ, ଅ ମାପ୍‌ରୁକେ ତୁତୁର୍‌ଣ୍ଡ୍ରେ, ପେ ନେନେ ସାମୁଆଁ ଦ୍ରିଗ୍‌ପା: ପେ ଆଣ୍ଡିନେ ବ୍ରିବାନ୍‌ ଗୁଆଃ ପେଲାଏଃକେ ଆରି ମୁଃଡ଼ି କୁରୁନେ ଲେଃୱେଲେଃକ୍ନେବାନ୍‌ ଗଃ ପେଲାଏଃକେ, ତେନ୍‌ ଆଡ଼ାତ୍ରା ଦିଆନ୍‌ ବିଃପା । 2 ପେନେ ଆବା ଅବ୍ରହାମ୍‌ ଆଡ଼ାତ୍ରା ଆରି ପେନେ ଜନମ୍‌ ବିଃଣ୍ଡ୍ରେ ସାରା ଆଡ଼ାତ୍ରା କେଲା; ମେଃଡାଗ୍‌ଲା ମେଁ ମୁଇଂଜା ଲେଃନେ ବେଲା ନେ ଆମେକେ ନେୱାକେ ଆରି ନେ ଆସିର୍ବାଦ୍‌ ଡିଂଚେଃ ଆମେକେ ଜାବର୍‌ ବଂସ ନେରାଃଡିଂକେ । 3 ମେଃଡାଗ୍‌ଲା ମାପ୍‌ରୁ ସିୟୋନକେ ସାନ୍ତି ଆଃଡିଂବକେ; ମେଁ ମେଁନେ ନସ୍‌ଟ ଡିଂଲାଏଃକ୍ନେ ଜାଗା ସାପାକେ ସାନ୍ତି ଆଃଡିଂବକେ; ମେଁ ମେଁନେ କଣ୍ଡାକେ ଏଦନ ରକମ୍‌ ଆରି ମେଁନେ ବାଲିଲଃ ଏରିଆକେ ମାପ୍‌ରୁନେ ଡୁଗ୍‌ଡି ରକମ୍‌ ଆଃଡିଂବକେ; ମ୍ଲେଃଡ଼୍ୟାଃ ଆରି ସାର୍ଦା, ଦନ୍ୟବାଦ୍‌ ଆରି ଅସ୍‌ମାର୍‌ ସବ୍‌ଦ ତେନ୍‌ ବିତ୍ରେ ଡିଂଏ । 4 ଅ ନେନେ ରେମୁଆଁଇଂ, ନେନେ ସାମୁଆଁଅରିଆ ମନ୍‌ ବିଃପା; ଅ ନେନେ ଦେସ୍‌ନେ ରେମୁଆଁଇଂ, ନେ ସାମୁଆଁଅରିଆ ନ୍ଲୁଗ୍‌ ଦ୍ରିଗ୍‌ପା: ମେଃଡାଗ୍‌ଲା ନେବାନ୍‌ ମୁଇଂ ନିଅମ୍‌ ତାର୍‌ଏ ଆରି ନେ ଦେସ୍‌ ଦେସ୍‌ନେ ରେମୁଆଁନେ ତାର୍କିଗ୍‌ ନ୍‌ସାଃ ନେନେ ବିଚାର୍‌ ତିଆର୍‌ ନେରାଃଡିଂଏ । 5 ନେନେ ଦର୍ମ ଡାଗ୍ରା ପାଂଡିଂକେ, ନେନେ ପରିତ୍ରାନ୍‌ ତାର୍‌ଲାଏଃକେ ଆରି ନେନେ ନ୍ତି ଦେସ୍‌ ଦେସ୍‌ନେ ରେମୁଆଁନେ ବିଚାର୍‌ ଡିଂଏ; ମଜେ କେଣ୍ଡିଆଃନେ କଣ୍ଡାଇଂ ଆନେକେ ଉର୍‌ଚେଃ ଲେଃଆର୍‌ଏ ଆରି ନେନ ନ୍ତିଅରିଆ ମେଃଡିଗ୍‌ ଜିନିସ୍‌ଅରିଆ ଆସା ବ‍ଆର୍‌ଏ । 6 ପେ କିତଙ୍ଗ୍‌ଇନି ଆଡ଼ାତ୍ରା କେଲାପା ଆରି ଆଲ ଲାଏଃକ୍ନେ ମଚ୍‌ପୁର୍‌କେ କେଲାପା; ମେଃଡାଗ୍‌ଲା କିତଙ୍ଗ୍‌ଇନି ମାଃସ ରକମ୍‌ ବୁଃଡ଼ି ୱେଏ ଆରି ମଞ୍ଚ୍‌ପୁର୍‌ନେ ତୁବଃ ଗଣ୍ଡାଃ ଗଣ୍ଡାଃ ୱେଚେଃ ଜିରେ ୱେଏ, ବାରି ଆତ୍‌ ବାସାଣ୍ଡ୍ରେ ଣ୍ଡ୍ରୁଏ ରକମ୍ ଗୁଏଃଆର୍‌ଏ; ମାତର୍‌ ନେନେ ଉଦାର୍‌ ମାଡାନେ କାଲ୍‌ ଜାକ ଲେଃଏ ଆରି ନେନେ ଦର୍ମ ଆବଃ ଣ୍ଡୁ । 7 ଅ ଦରମ୍‌ ଜ୍ଞାନି ରେମୁଆଁଇଂ, ପେନେ ମନ୍‌ଅରିଆ ନେନେ ନିଅମ୍‌ ଲାଏଃକେ, ପେ ନେନେ ସାମୁଆଁ ଦ୍ରିଗ୍‌ପା; ପେ ରେମୁଆଁନେ ଅପମାନ୍‌କେ ଆବ୍‌ଟଗେପା, କି ମେଇଂନେ ନିନ୍ଦା ନ୍‌ସାଃ ମନ୍‌ ଗାବ୍‌ରା ଆଡିଂଗେପା । 8 ମେଃଡାଗ୍‌ଲା ତେୱାଁ ଆମେଇଂକେ ସକାପାଟାଇ ରକମ୍‌ ଚଙ୍ଗ୍‌ବିଃଏ ଆରି ବୁବଃଉଂ ଆମେଇଂକେ ଉଗ୍‌ବଃ ରକମ୍‌ ଚଙ୍ଗ୍‌ବିଃଏ; ମାତର୍‌ ନେନେ ଦର୍ମ ମାଡାନେ କାଲ୍‌ ଜାକ ଲେଃଏ ଆରି ନେନେ ଉଦାର୍‌ ଜୁଗ୍ ଜୁଗ୍ ଜାକ ଲେଃଏ । 9 ଅ ମାପ୍‌ରୁ ତଃଡ଼୍ୟାଃ ଆନେକେ ସାଇଜ ଡିଙ୍ଗ୍,ଆରି ବପୁ ବିଃଲା ଡିରକମ୍‌ ଅଃସେ, ବାୱିର୍‌ ଜୁଗ୍‌ନେ ଙ୍ଗିର୍‌ବୁଏଃ ରିତିନିତିନେ ବେଲା, ଦେତ୍‌ରକମ୍‌ ଉର୍‌ । ଜା ରାହବକେ* ଗନ୍ଦା ଗନ୍ଦା ଆଃଡିଂଚେ ଗୁଆଃକେ, ଆରି କେଣ୍ଡିଆଃ ବିତ୍ରେ ଲାଏଃକ୍ନେ ଜନ୍ତୁକେ ବାଗୁଏଃକେ, ମେଁ କି ନା ଣ୍ଡୁ ? 10 ଜା କେଣ୍ଡିଆଃକେ, ସ୍ରିଡ଼୍ୟାଃ ସାପାକେ ଆଃନ୍‌ସୁଆର୍‌କେ, ଜା ଉଦାର୍‌ ବାଲାଏଃକେ ମେଇଂ ପୁଆଃ ନ୍‌ସାଃ କେଣ୍ଡିଆଃନେ ସ୍ରି ଜାଗାକେ ଗାଲି ଆଃଡିଂକେ, ମେଁ କି ନା ଣ୍ଡୁ ? 11 ବାରି, ମାପ୍‌ରୁନେ ମୁକ୍‌ତି ବାଲେକ୍ନେ ରେମୁଆଁଇଂ ଆଣ୍ଡେ ପାଙ୍ଗ୍‌ଆର୍‌ଏ ଆରି ସାର୍ଦା ଅସ୍‌ମାର୍‌ ସାର୍‌ ସାର୍‌ଚେଃ ସିୟୋନ ଡାଗ୍ରା ପିଙ୍ଗ୍‌ଚାଃଆର୍‌ଏ; କାଲାଆଃ ଲେଃନେ ସାର୍ଦା ଆରି ଆଲାଦ୍‌ ବାଆର୍‌ଏ, ବାରି ଦୁକ୍‌ ଆରି ଅଃନେ ସ୍ଲ ଲାଗ୍‌ଡ‍ଏ । 12 ଜା ଆନାକେ ସାନ୍ତି ବିଃଏ, ମେଁ ନେଙ୍ଗ୍ ଆଃ, ନେ ଆଃ; ଗୁଏଃନେ ଅଦିକାର୍‌ ରେମୁଆଁକେ ଆରି ଜେ ଚେଃମୁଆଁ ରକମ୍‌ ଆଃଡିଂଡିଂଏ, ଦେକ୍‌ରକମ୍‌ ରେମୁଆଁନେ ଗଡ଼େଅକେ ବୁଟନାଡିଂକେ, 13 ବାରି କିତଙ୍ଗ୍‌ଇନି ଅସାର୍‌ ଆଃଡିଂଣ୍ଡ୍ରେ ଆରି ମଚ୍‌ପୁର୍‌ନେ ପାଣ୍ଡୁସନ୍‌ ଆଃରେଣ୍ଡ୍ରେ ନା ଆଃରେଣ୍ଡ୍ରେ ସଦାପ୍ରବୁକେ ଆବଃନାବକେ ଆରି ବିରଦିକେ ବିନାସ୍‌ ଆଃଡିଂନ୍‌ସାଃ ତିଆର୍‌ ଡିଂନେବେଲା ମେଁନେ ରିସା ନ୍‌ସାଃ ପ୍ରାଃସ୍ମି କାଲାଆଃ ବୁଟନାଡିଂକେ ଜେ ନା, ନା ଣ୍ଡୁଲା ଆରି ଜା ? ଆରି, ଆତେନ୍‌ ବିନାସ୍‌ ଆଃଡିଙ୍ଗ୍‌ନେ ରେମୁଆଁନେ ରିସା ଆଣ୍ଡିକାଃ ? 14 ବନ୍ଦି ରେମୁଆଁ ଦାପ୍ରେ ମୁକ୍ତି ଡିଂଏ; ବାରି, ବାରି ମେଇଂ ଅଃନା ଆଗୁଏଃ ଣ୍ଡୁ, ବାରି ମେଇଂନେ କାଦି ଅଃନା ଅବାବ୍‌ ଆଡିଂ ଣ୍ଡୁ । 15 ମେଃଡାଗ୍‌ଲା ଲଉଡ଼ିନେ ସାପା ଗର୍ଜେନେ ନ୍‌ସାଃ ଜା କେଣ୍ଡିଆଃକେ ତେରେପେତେ ଆଃଡିଂଏ, ନେ ଆତେନ୍‌ ମାପ୍‌ରୁ ନାନେ ପର୍‌ମେସର୍‌ ନେଲାଏଃକେ; ମେଁନେ ମ୍ନି ସନ୍ୟାଦିପତି ସଦାପ୍ରବୁ । 16 ବାରି, କିତଙ୍ଗ୍‌ଇନି ଅସାର୍ ଆଡିଙ୍ଗ୍ ମ୍ୱକେ, ମଚ୍‌ପୁର୍‌ନେ ପାଣ୍ଡୁସନ୍‌ ଆଃରେନେ ଆରି ପେ ନେନେ ରେମୁଆଁ, ଆକେନ୍‌ ସିୟୋନକେ ବାସଙ୍ଗ୍‌ ନ୍‌ସାଃ ନିଂ ନା ତୁମୁଁଆଃଅରିଆ ନିଜର୍‌ ସାମୁଆଁ ନେବକେ ଆରି ନିଜର୍‌ ନ୍ତିନେ ନ୍ଲୁଡ଼୍ୟାଃଅରିଆ ଆନାକେ ଡିଡାନେବକେ ।

17 ଅ ଯିରୂଶାଲମ ତୁଆଁ, ତଃଡ଼୍ୟାଃଚେଃ ତୁଆଁ, ପେ ମାପ୍‌ରୁନେ ନ୍ତିବାନ୍‌ ମେଁନେ ରିସା ରକମ୍‌ ମୁତା ରାଙ୍ଗ୍‌ୱେଚେଃ ଉଗ୍‌ପେବକେ; ପେ ବୁସାଃନେ ରକମ୍‌ ମ୍ନାଃ ମୁତାବାନ୍‌ ଉଗ୍‌ଚେଃ ଆତେନ୍‌ ଆଃଡ଼ାଃ ପେବକେ । 18 ମେଁ ଆଣ୍ଡିନେ ଗଡ଼େଇଂକେ ଜନମ୍‌ ବିଃବକେ, ମେଁ ସାପାରେନେ ବିତ୍ରେ ଆମେକେ ଜତନ୍ ଡିଙ୍ଗ୍‌ ନ୍‌ସାଃ ଜାଡିଗ୍‌ ଣ୍ଡୁ; କି ମେଁ ଆଣ୍ଡିନେ ଗଡ଼େଇଂକେ ଜତନ୍‌ ଡିଂବକେ, ମେଁ ସାପାରେନେ ବିତ୍ରେ ମେଁନେ ନ୍ତି ସାଃଚେ ରାଙ୍ଗ୍‌ୱେନ୍‌ସାଃ ଜାଡିଗ୍‌ ଣ୍ଡୁ । 19 ଆକେନ୍‌ ମ୍ବାକ୍ଲିଗ୍‌ ସାମୁଆଁ ନା‍ ଆଡ଼ାତ୍ରା ଗଟେଲାଏଃକେ; ନା ନ୍‌ସାଃ ଜା ଅଃଏ ? ସୁନ୍‌ସାନ୍‌ ଆରି ବିନାସ୍‌, ବାରି ମର୍‌ଡ଼ି ଆରି କାଣ୍ଡା ପାଙ୍ଗ୍‌ଲେକେ ନିଂ ଡିରକମ୍‌ ଆନାକେ ସାନ୍ତି ଣ୍ଡ୍ରାଃଡିଂଏ ? 20 ଜାଲ୍‌ଅରିଆ ଲଃଲେକ୍ନେ ଏଲା ରକମ୍ ନାଁନେ ଗଡ଼େଇଂ ଗୁଏଃଲୁଗ୍‌ ଲେଃଆର୍‌କେ, ମେଇଂ ସାପାରେ ଗାଲିନେ ମୁଣ୍ଡେ ପାକା ଲଃଲେଃଆର୍‌କେ; ମେଇଂ ମାପ୍‌ରୁନେ ରିସା‍ରେ, ନାନେ ପର୍‌ମେସର୍‌ନେ ଦମକ୍‌ରେ ମେଇଂ ବର୍ତି ଡିଂଲେଃଆର୍‌କେ । 21 ଏନ୍‌ସାଃ ଅ ଦୁକ୍‌ରେ ଲେଃକ୍ନେ ସେଲାମ୍ବୁଏଃ ଆରି ବିନା ଅଙ୍ଗୁର୍‌ ରସ୍‌ ଏଃତେ ବୁସାଃ ନାଲାଏଃକେ ଜେ, ନା ଏବେ ଆକେନ୍‌ ଦ୍ରିଗ୍‌; 22 ନାନେ ମାପ୍‌ରୁ, ସଦାପ୍ରବୁ ଆରି ନିଜର୍‌ ରେମୁଆଁଇଂନେ ସାପଟ୍‌ ଡିଂଣ୍ଡ୍ରେ ନାନେ ପର୍‌ମେସର୍‌ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, କେଲା, ନେ ବୁସାଃକ୍ନେ ରକମ୍‌ ଉଗ୍‌ଡ୍ୟାଃ ମୁତା, ଡାଗ୍‌ଲା, ନେନେ ରିସା ରକମ୍‌ ମ୍ନାଃ ଉଗ୍‌ଡ୍ୟାଃ ମୁତା ନା ନ୍ତିବାନ୍‌ ଜଗ୍‌ ରାଙ୍ଗ୍‌ୱେନେବକେ; ନା ଆରି ଆତେନ୍‌ ନାଉଗ୍‌ ଣ୍ଡୁ; 23 ବାରି, ଜାଜା ଆନାକେ କସ୍‌ଟ ବିଃଆର୍‌ଏ, ମେଇଂନେ ନ୍ତିଅରିଆ ନେ ଆତେନ୍‌ ନେବିଃଏ; ମେଇଂ ନାନେ ଜିବନ୍‌କେ ବାସଙ୍ଗ୍‌ବ‍ଆର୍‌କେ, ବ୍ରିଂ ବିଃ, ନେ ନା ଆଡ଼ାତ୍ରା ନେଅଲେଙ୍ଗ୍‌ଏ, ଆରି ନା ତୁବଃ ଆରି ଗାଲି ରକମ୍‌ ଅଲେଙ୍ଗ୍‌ଣ୍ଡ୍ରେ ନ୍‌ସାଃ ନିଜର୍‌ ଗୁଗ୍‌ଡ୍ୟା ଆଃସୁଏଃ ବିଃନାବକେ ।