ଜିସାୟ 19

ମିସର୍‌ ଆଡ଼ାତ୍ରା ବବିସତ୍ ସାମୁଆଁ

1 ମିସର୍‌ ବିସଏରେ ବବିସତ୍‌ ସାମୁଆଁ । କେଲାପା ସଦାପ୍ରବୁନେ ଦୁତ୍‌ଇଂ ତ୍ରିଗ୍‌ଡ୍ୟାନ୍ୟା ପାଙ୍ଗ୍‌ଡିଙ୍ଗ୍‌କେ । ମେଁ ମିସର୍‌ନ୍ୟା ୱେ ଆର୍‌ଏ ବାରି ମିସର୍‌ନେ ସାପା ମୁର୍ତି ବୁଟଚେ ଜୁର୍‌ଏ । ମିସର୍‌ନେ ମନ୍‌ ମେଁ ସାମ୍‌ନାରେ ତେରେପେତେ ଡିଙ୍ଗ୍‌ୱେଏ ।

2 ପର୍‌ମେସର୍‌ ବାସଙ୍ଗ୍‌କେ, "ମିସର୍‌ଣ୍ଡ୍ରେ ନିଜର୍‌ ନିଜର୍‌ ବିରଦ୍‌ରେ ଜୁଦ୍‌ ଡିଙ୍ଗ୍‌ଆର୍‌ଏ, ନେଙ୍ଗ୍‌ ଆତାନ୍‌ କାରନ୍‌ ଣ୍ଡିଙ୍ଗ୍‌ଏ । ରେମୁଆଁ ନିଜର୍‌ ବୟାଁ ବିରଦ୍‌ରେ ଜୁଦ୍‌ ଡିଙ୍ଗ୍‌ଆର୍‌ଏ । ଡାଗ୍ରା ଡୁଆ ଡୁଆ ବିତ୍ରେ ଜୁଦ୍‌ ଡିଙ୍ଗ୍‌ଆର୍‌ଏ । ଇନି ଇନି ବିତ୍ରେ ବାରି ରାଜି ରାଜି ବିତ୍ରେ ଜୁଦ୍‌ ଡିଙ୍ଗ୍‌ଏ ।

3 ଆରି, ମିସର୍‌ନେ ଆତ୍ମା ମେଁ ବିତ୍‌ରେ ଆଲେ ଣ୍ଡୁ ଆରି ନେ ମେଁନେ ଉପାୟ୍ ନାସ୍ ଆଡିଙ୍ଗ୍ ନେବିଏ । ଆତ୍‌ଅରିଆ ମେଇଂ ମୁର୍ତିକେ ଆରି ଜାଦୁରେକେ ଆରି ସିରାକେ ଆରି ଡିସାରିଇଂକେ ତୁର୍‌ଆର୍‌ଏ ।"

4 ନେଙ୍ଗ୍‌ନେ ମାପ୍‌ରୁ ସର୍ବସକ୍ତିମାନ୍‌ ବାସଙ୍ଗ୍‌ଡିଂକେ, "ନେଙ୍ଗ୍‌ ମିସର୍‌ଣ୍ଡ୍ରେ ମୁଇଂ ଦୟା ମାଡିଙ୍ଗ୍‌ନେ ମାପ୍‌ରୁନେ ନ୍ତିନ୍ୟା ଅପେଃ ମ୍ୱିଏ ବାରି ମୁଇଂ ରିସାଡିଙ୍ଗ୍‌ନେ ଇଃସାଙ୍ଗ୍‌ ଆମେଇଂକେ ସାସନ୍‌ ଡିଙ୍ଗ୍‌ଏ ।"

5 ଲଣ୍ଡ୍ୟାଃ ଣ୍ଡିଆଃ ନ୍‌ସୁଆର୍‌ ୱେଏ ବାରି କେଣ୍ଡ୍ୟାଃଆଣ୍ଡେଙ୍ଗ୍‌ ନ୍‌ସୁଆର୍‌ୱେଏ ।

6 ସାପା ଲଣ୍ଡ୍ୟାଃ ବାସ୍ନା ବିଃଏ । ମିସର୍‌ନେ ନାଲ୍‌ନିଆ ଣ୍ଡିଆଃ ଆଲେ ଣ୍ଡୁ । ସାପା ଣ୍ଡିଆ ନିଆ ଲେକ୍ନେ ସାପା ଚେଃମୁଆଁ ସ୍ଲାଃ ପାଃଡ଼ୁ ନ୍‌ସୁଆର୍‌ଚେ ଗୁଏଃୱେଏ ।

7 ଲଣ୍ଡ୍ୟାଃ ଡାଗ୍ରାନେ ସ୍ଲାଃପାଡ଼ୁ ସାପା ଗୁଏୱେଏ ବାରି ୱେଡ଼୍ୟାନ୍ୟା ୱାଲେଃ ୱେଏ । ଦେକ୍‌ରକମ୍‌ ନିଲ ଲଣ୍ଡ୍ୟାଃ ଆଃଡ଼ା ଜନମ୍‌ ଡିଙ୍ଗ୍‌କ୍ନେ ସ୍ଲାଃ ଆଣ୍ଡେଙ୍ଗ୍‌ ଗୁଏୱେଏ ।

8 ଆଃଡ଼ ସାଃଣ୍ଡ୍ରେ ଡିଗ୍‌ ଗ୍ରି ବଗ୍‌ଚେ ଅଁ ଆର୍‌ଏ ଆରି ଜାଣ୍ଡେଇଂ ନିଲ ଲଣ୍ଡିଆଃନିଆ ଚ୍ନାଗ୍‌ ତ୍ଲାଗ୍‌ଡିଙ୍ଗ୍‌, ମେଇଂ ସାପାରେ ଅଁ ଆର୍‌ଏ, ଆରି ଜାଣ୍ଡେଇଂ ଣ୍ଡିଆନିଆ ଜାଲ୍‌ ଗେରେ ଆର୍‌ଏ ମେଇଂ ନିରାସ୍‌ ଡିଙ୍ଗ୍‌ ଆର୍‌ଏ ।

9 ଆରି ଜାଣ୍ଡେଇଂ ପର୍‌ଚଲ୍‌ ଆରି ନ୍‌ସୁଆର୍‌କ୍ନେ ପାଟାଇ କାମ୍‌ ଡିଂମ୍ୟାଃଆର୍‌କେ ମେଇଂ ଗିଆସଃଆର୍‌ଏ ।

10 ବାରି ମେଁନେ ଡେଲି ସାପା ପାକ୍‌ଚିଚେ ଗନ୍ଦା ଗନ୍ଦା ଆଡିଙ୍ଗ୍‌ବିଏ, ସ୍ଲେଚେଃ ଡାବୁ ବାନେ ରେମୁଆଁ ସାପାରେ ରୁଦୟ୍‌ନିଆ ଦୁକ୍ ବାଆର୍‌ଏ ।

11 ସୋୟୋନନେ ନେତାଇଂ ସତେଆ ଅଗ୍ୟାନ୍‌ ରେମୁଆଁ । "ଫାରୋନେ ଗିଆନି ଆରି ବଲ୍‌ ସାମୁଆଁ ବାସଙ୍ଗ୍‌ଣ୍ଡ୍ରେ" କରାପ୍‌ ଆଦେସ୍‌ ବିଃମ୍ୟାକେ । ଆତାନ୍‌ ନେତାଇଂ ନିଜେକେ ଗିଆନି ବାରି ମ୍ନାଃ ମନେ ଡିଙ୍ଗ୍‌ଆର୍‌ଏ । ମେଇଂ ମ୍ନାରେଇଂନେ ଇଃସାଙ୍ଗ୍‌ନେ ଉଂଡେଇଂ । ମାତ୍ରମ୍‌ ସତ୍‌ରେ ମେଇଂ ଗିଆନି ଣ୍ଡୁ ।

12 ଅ ମିସର୍‌, ନାନେ ଜ୍ଞାନି ରେମୁଆଁଇଂ ଆଣ୍ଡିକା ? ଆତାନ୍‌ ଜ୍ଞାନି ରେମୁଆଁଇଂକେ ବାସଙ୍ଗ୍‌ ସାପାବାନ୍ ମ୍ନା ମାପ୍‌ରୁ ମିସର୍‌ ଦେସ୍‌ନ୍ୟା ମେଁନି ଉପାୟ୍‌ ବିଃବକେ । ମେଇଂ ମେଁନି ଗଟେଏ ମିଆଁ ଆର୍‌ଏ ।

13 ସୋୟୋନନେ ନେତାଇଂ ଆଲାଜୁ ଡିଙ୍ଗ୍‌ଲେଃଆର୍‌କେ । ନୋଫର ନେତାଇଂ ବାୟା ରକମ୍‌ ଡିଙ୍ଗ୍‌ଲେଃଆର୍‌କେ । ଜାଣ୍ଡେଇଂ ମିସର୍‌ନେ କୁଟୁମ୍‌ ରେମୁଆଁନେ ମୁଇଂ କନ୍‌ନେ ବ୍ରି ରକମ୍ । ତେସା ଆତାନ୍‌ ନେତାଇଂ ମିସର୍‌କେ ଅଲ୍‌ଗା ଗାଲିପାକା ଆଃଅଲେଙ୍ଗ୍‌ ବଆର୍‌କେ ।

14 ସଦାପ୍ରବୁ ମିସର୍‌ଣ୍ଡ୍ରେଇଂ ବିତ୍‌ରେ କିଲ୍‌ବିଲ୍‌ ଆଡିଙ୍ଗ୍‌ନେ ଆତ୍ମା ଆମିସୁବକେ । ମେଇଂ ନିଜେ ବାୟା ରକମ୍‌ ଡିଙ୍ଗ୍ ଲେଃ ଆର୍‌କେ ବାରି ମିସର୍‌କେ କରାପ୍‌ ଗାଲି ରାଙ୍ଗ୍‌ୱେ ବକେ । ଆତାନ୍ ମ୍ନା ମ୍ନାରେ ମେଁନି ସାପା ଡିଙ୍ଗ୍‌ବଆର୍‌କେ ଆତାନ୍‌ ସାପା କରାପ୍‌ କାମ୍‌ । ବୁସାଃରେ ମେଁ ନିଜେ ଲୁଆର୍‌ଚେ ତେରେପେତେ ଡିଙ୍ଗ୍‌କେ ରକମ୍‌ ମେଇଂ ମିସର୍‌କେ ସାପା କାମ୍‌ନ୍ନିଆ ଦଦ୍ୟା ଗାଲି ଆଡିଙ୍ଗ୍‌ ବକେ ।

15 ଅଦିପତି ଇଂ ମିସର୍‌ ନ୍‌ସା ମେଃଡିଗ୍‌ ଡିଙ୍ଗ୍‌ ଆୟା ଣ୍ଡୁ । ମେଇଂ, "ବାଆଃ କି ପ୍ଲା କଜ୍‌ରି କେନ୍ଦା କି ଣ୍ଡିଆଃନିଆ ଲାଏଃକ୍ନେ ଚେଃମୁଆଁ ମେଁ ଡିଙ୍ଗ୍‌ ୟାଏ ମେଇଂ ଆତାନ୍‌ ଡିଙ୍ଗ୍‌ ଆୟା ଣ୍ଡୁ ।"

ମିସର୍‌ନିଆ ମାପ୍‌ରୁନେ ପୁଜା

16 ଆତେନ୍‌ ଦିନ୍‌ ମିସର୍‌ନେ ରେମୁଆଁ ସେଲାମ୍ବୁଏଃ ରକମ୍ ଡିଙ୍ଗ୍ ଆର୍‌ଏ । ମେଇଂ ସାପାବାନ୍ ବପୁ ମାପ୍‌ରୁକେ ବୁଟମେଗ୍‌ ଆର୍‌ଏ । ଉଡ଼ିବେଲା ମାପ୍‌ରୁ ଡଣ୍ଡ୍‌ ବିଃନ୍‌ସା ନ୍ତି ଆଃୱେଃଏ, ଆତାନ୍‌ ବେଲା ମେଇଂ ଜୁର୍‌ ଆର୍‌ଏ ।

17 ମିସର୍‌ ଆଡ଼ାତ୍ରା ଯିହୁଦା କସ୍‌ଟ ରକମ୍ ଡିଙ୍ଗ୍‌ଏ । ମିସର୍‌ନେ ଜାଡିଗ୍‌ ରେମୁଆଁ ଯିହୁଦାନେ ମ୍ନି ଅଁଏ ବୁଟଚେ ଜୁର୍‌ଏ । ଏନ୍‌ ସାପା ଡିଙ୍ଗ୍‌ନେ କାରନ୍‌ ଡିଙ୍ଗ୍‌ଡିଂକେ ସାପାବାନ୍ ବପୁ ମାପ୍‌ରୁ ମିସର୍‌ନ୍ୟା ବୟାଙ୍କାର୍‌ ଜିନିସ୍‌ ଗଟେଏ ଡାଗ୍‌ଚେ ଉପାୟ୍ ଡିଙ୍ଗ୍‌ବକେ ।

18 ଆତାନ୍‌ ବେଲା, ମିସର୍‌ନେ ମାଲିକ୍ଲିଗ୍‌ ନଗର୍‌ନ୍ୟା ରେମୁଆଁଇଂ କିଣାନିୟ ବାସା ବାସଙ୍ଗ୍‌ଏ, ମେଇଂ ସାପାବାନ୍ ବପୁ ମାପ୍‌ରୁ ପ୍ଲା ନେପାଙ୍ଗ୍‌ଏ ଡାଗ୍‌ଚେ ପାର୍‌ମାନ୍‌ ଡିଙ୍ଗ୍‌ଆର୍‌ଏ । ଆତାନ୍‌ ମାଲିକ୍ଲିଗ୍‌ ଇନିଇଂନେ ବାନ୍‌ ମୁଇଂ ଇନି, "ବିନାସ୍ ଡିଙ୍ଗ୍‌କ୍ନେ ଇନି" ମ୍ନିରେ ଉଡ୍ରା ଡିଙ୍ଗ୍‌ଏ ।

19 ଆତାନ୍‌ ବେଲା ମିସର୍‌ନେ ମଜେ ଜାଗାନ୍ୟା ସଦାପ୍ରବୁ ନ୍‌ସାଃ ମୁଇଂ ଯଜ୍ଞ ବେଦି ଡିଙ୍ଗ୍‌ଏ ବାରି ମେଁନେ ଏରିଆ ଡାଗ୍ରା ସଦାପ୍ରବୁକେ ମ୍ନିରେ ମୁଇଂ ଡେଲି ତିଆର୍‌ ଡିଂଏ ।

20 ବାରି ଆତାନ୍‌ ମିସର୍‌ ଦେସ୍‌ନ୍ୟା ସାପାବାନ୍ ବପୁ ମାପ୍‌ରୁନେ ଚିନ୍‌ ବାରି ସାକି ରକମ୍‌ ଡିଙ୍ଗ୍‌ଏ । ଡାଗ୍ଲା ମେଇଂ ଅନ୍ୟାୟ୍‌ ଡିଙ୍ଗ୍‌ନେ ରେମୁଆଁଇଂ ଆତ୍‌ଲା ମାପ୍‌ରୁନେ ଡାଗ୍ରା ଅଃ ଆର୍‌ଏ, ଆତ୍‌ବା ମେଁ ମୁଇଂ ଉଦାର୍‌ କର୍ତା ବାରି ରକ୍ୟା ଡିଙ୍ଗ୍‌ଣ୍ଡ୍ରେକେ ବେବିଏ ବାରି ମେଁ ଆମେଇଂକେ ଉଦାର୍‌ ଡିଙ୍ଗ୍‌ଏ ।

21 ଆତେନ୍‌ ଦିନ୍‌ ମିସର୍‌ ରେମୁଆଁଇଂ ସଦାପ୍ରବୁନେ ଡାଗ୍ରା ସ୍ନାମୁଆଁ ଡିଙ୍ଗ୍‌ ଆର୍‌ଏ । ମେଇଂ ପର୍‌ମେସର୍‌କେ ବଲ୍‌ବା ଆର୍‌ଏ । ମେଇଂ ଆମେକେ ସେବା ଡିଙ୍ଗ୍‌ଆର୍‌ଏ ବାରି ମେଁନେ ଉଦେସ୍‌ରେ ବଲିଦାନ୍‌ ବିଃଏ । ବାରି ଡିଗ୍‌ ମେଇଂ ସଦାପ୍ରବୁନେ ଉଦେସ୍‌ରେ ପାର୍‌ମାନ୍‌ ଡିଙ୍ଗ୍‌ଆର୍‌ଏ ବାରି ଆତାନ୍‌ ପାର୍‌ମାନ୍‌ ପାଲନ୍‌ ଡିଙ୍ଗ୍‌ଆର୍‌ଏ ।

22 ବାରି, ସଦାପ୍ରବୁ ମିସର୍‌କେ ଡଣ୍ଡ୍‌ ବିଃଏ । ବାରି ଡିଗ୍‌ ଆମେଇଂକେ ମେଁ କେମା ବିଃଏ । ତେସା ମେଇଂ ସଦାପ୍ରବୁନେ ଡାଗ୍ରା ଆଣ୍ଡେ ପାଙ୍ଗ୍‌ଆର୍‌ଏ । ସଦାପ୍ରବୁ ମେଇଂନେ ଗୁଆରିକେ ଅଁଏ ବାରି ଆମେଇଂକେ କେମା ବିଃଏ ।

23 ଆତାନ୍‌ ବେଲା ମିସର୍‌ବାନ୍‌ ଅଶୂର ଜାକ ମୁଇଂ ଅସାର୍‌ ଗାଲି ତିଆର୍‌ ଡିଙ୍ଗ୍‌ଏ । ଏନ୍‌ ଇଡ଼ିଙ୍ଗ୍‌ ଅଶୂରନେ ରେମୁଆଁଇଂ ମିସର୍‌ ପାଙ୍ଗ୍‌ଆର୍‌ଏ ବାରି ମିସର୍‌ନେ ରେମୁଆଁଇଂ ଅଶୂରନ୍ୟା ୱେଆର୍‌ଏ । ମିସର୍‌ନେ ରେମୁଆଁଇଂ ଅଶୂରନେ ରେମୁଆଁଇଂ ଏଃତେ ସେବା ଡିଙ୍ଗ୍‌ଆର୍‌ଏ ।

24 ଆତାନ୍‌ ଦିନ୍‌ ଇସ୍ରାଏଲ, ମିସର୍‌ ବାରି ଅଶୂର ମୁଇଂତୁଗ୍ ଡିଙ୍ଗ୍‌ଚେ ମଚ୍‌ପୁର୍‌ନିଆ ଆସିର୍ବାଦ୍‌ ବାଃ ଆର୍‌ଏ ।

25 ସାପାବାନ୍ ବପୁ ମାପ୍‌ରୁ ଏନ୍‌ ଦେସ୍‌ଇଂକେ ଆସିର୍ବାଦ୍‌ ଡିଙ୍ଗ୍‌ଏ । ମେଁ ବାସଙ୍ଗ୍‌ଏ, "ଅ ମିସର୍‌ ରେମୁଆଁ, ପେଇଂ ନେଙ୍ଗ୍‌ନେ ରେମୁଆଁ । ଅଶୂର ନେଙ୍ଗ୍‌ ଆନାକେ ତିଆର୍‌ ଡିଙ୍ଗ୍‌ମ୍ୱକେ । ପେଇଂ ସାପାରେ ଆସିର୍ବାଦ ପେବାଏ ।"