1 ଆମୋସନେ ଉଂଡେ ଯିଶାଇୟ, ଯିହୁଦା ଆରି ଯିରୂଶାଲମ ବିସଏରେ ଆଣ୍ଡିନେ ଦର୍ସନ୍‌ ବାଆର୍‌କେ, ଆତ୍‌ନେ ସାପାନେ ସାମୁଆଁ ।

2 ସାରାସାରି ବେଲା ଦେକ୍‌ରକମ୍‌ ଗଟେଏ, ମାପ୍‌ରୁନେ ଡୁଆନେ କଣ୍ଡା, କଣ୍ଡାଇଂନେ ଟିପ୍‌ ଆଡ଼ାତ୍ରା ତିଆର୍‌ ଡିଙ୍ଗ୍‌ଏ ଆରି କଣ୍ଡାଇଙ୍ଗ୍‌ ବାନ୍ ତିଆର୍‌ ଡିଙ୍ଗ୍‌ଏ । ଆରି, କ୍ଲିଗ୍‌ କୁଟୁମ୍‌ ଲଣ୍ଡ୍ୟାଃ ରକମ୍‌ ତେନ୍‌ ବିତ୍ରେ ଡୁଙ୍ଗ୍‌ଡ୍ୟାଃ ପାଙ୍ଗ୍‌ଆର୍‌ଏ ।

3 ବାରି, ଗୁଲୁଏ କୁଟୁମ୍‌ ଆତ୍‌ଅରିଆ ୱେଆର୍‌ଏ । ମେଇଂ ବାସଙ୍ଗ୍‌ଆର୍‌ଏ, "ପାଙ୍ଗ୍‌ଲାପା, ନେଃ ମାପ୍‌ରୁନେ କଣ୍ଡାଅରିଆ ନେଃୱେପା । ଯାକୁବନେ ପର୍‌ମେସର୍‌ନେ ମନ୍ଦିର୍‌ନ୍ୟା ନେଃ ନେଃୱେପା । ଆତାନ୍‌ ବେଲା ପର୍‌ମେସର୍‌ ଆନେକେ ମେଁନେ ଗାଲି ବିସଏରେ ସିକ୍ୟା ବିଃଏ । ନେଃ ଆତାନ୍‌ ଅନୁସାରେ ନେଃଡିଙ୍ଗ୍‌ପା ।" ପର୍‌ମେସର୍‌ନେ ସିକ୍ୟା ସାପା ମାପ୍‌ରୁନେ ସାମୁଆଁ ଯିରୂଶାଲମନ୍ୟା ସିୟୋନ କଣ୍ଡାବାନ୍‌ ଆରାମ୍‌ ଡିଙ୍ଗ୍‌ଚେ ସାପା ମଚ୍‌ପୁର୍‌ନ୍ୟା ଉଡ୍ରା ଡିଙ୍ଗ୍‌ଏ ।

4 ଏନ୍‌ଇଡ଼ିଙ୍ଗ୍‌ ପର୍‌ମେସର୍‌ ସାପା କୁଟୁମ୍‌ନେ ବିଚାର୍‌ କର୍ତା ଡିଙ୍ଗ୍‌ଏ । ଗୁଲୁଏ କୁଟୁମ୍‌ ବିସଏରେ ପର୍‌ମେସର୍‌ ସାରାସାରି ବିଚାର୍‌ ଡିଙ୍ଗ୍‌ଏ । ଆତାନ୍‌ ରେମୁଆଁଇଂ ଜୁଦ୍‌ ନ୍‌ସା ମେଇଂନେ ଅସ୍ତ୍ର ବେବଆର୍‌ ଆଡିଙ୍ଗ୍‌ଆର୍‌ ଣ୍ଡୁ । ମେଇଂ କାଣ୍ଡାକେ ସ୍ନିନେ ସ୍ନିଲ୍ୟା ତିଆର୍‌ ଡିଙ୍ଗ୍‌ଆର୍‌ଏ, ବର୍ଚାକେ ନ୍‌ସଗ୍‌ ତିଆର୍‌ ଡିଙ୍ଗ୍‌ଆର୍‌ଏ । ମେଇଂ ବିନ୍‌ ଦେସ୍‌ ବିରୁଦ୍‌ରେ ଆରି ଜୁଦ୍‌ ଆଡିଙ୍ଗ୍‌ଆର୍‌ ଣ୍ଡୁ । ମେଇଂ ଅଃନା ଡିଗ୍‌ ଜୁଦ୍‌ ନ୍‌ସା ଆୱାଆର୍‌ ଣ୍ଡୁ ।

5 ଅ ଯାକୁବ ବଂସ, ପାଙ୍ଗ୍‌ଲାପା, ନେ ମାପ୍‌ରୁନେ ତାରାସ୍‌ରେ ନେଃଅଲେଙ୍ଗ୍‌ପା ।

6 ନେଙ୍ଗ୍‌ ଏନ୍‌ ବାସଙ୍ଗ୍‌ଣ୍ଡିଂ ମେଃନ୍‌ସା ? ଡାଗ୍ଲା ପେଇଂ ଯାକୁବ ବଂସକେ ଆନ୍ତାର୍‌ ବିଃପେବକେ । ପେ ଆତାନ୍‌ ରେମୁଆଁ ଜାଣ୍ଡେଃ କି ପୁର୍ବ ଦେସ୍‌ଣ୍ଡ୍ରେଇଂନେ ରକମ୍‌ ପେଲେଃକେ । ପେ ପଲେଷ୍ଟୀୟଇଂନେ ରକମ୍‌ ବବିସତ୍‌ ସାମୁଆଁ ବାସଙ୍ଗ୍‌ ନ୍‌ସା ଚେସ୍ଟା ପେଡିଙ୍ଗ୍‌ଏ । ପେନେ ରେମୁଆଁଇଂ ବିଦେସି ରେମୁଆଁଇଂନେ ଏଃତେ କୁଡ଼େଃମାଡ଼େଃ ଡିଙ୍ଗ୍‌କେ ।

7 ପେନେ ଦେସ୍‌ ସୁନା ଆରି ରୁପା ଏଃତେ ବର୍ତି ଲାଏଃକେ । ଆତ୍‌ଡାଗ୍ରା ଦନ୍‌ ସମ୍ପତିନେ ଅବାବ୍‌ ଣ୍ଡୁ । ପେନେ ଦେସ୍‌ ଡିଗ୍‌ ଗଡ଼ା ଏଃତେ ବର୍ତି ଲେଃକେ, ବାରି ଆତ୍‌ଅରିଆ ରତ୍‌ନେ ଅବାବ୍‌ ଣ୍ଡୁ ।

8 ବାରି ଡିଗ୍‌ ପେନେ ଦେସ୍‌ ରେମୁଆଁଇଂନେ ବାନ୍‌ ପୁଜା ଡିଙ୍ଗ୍‌କ୍ନେ ମୁର୍ତିଇଙ୍ଗ୍‌ ବର୍ତି ଡିଙ୍ଗ୍‌ଲେଃକେ । ଆତାନ୍‌ ମୁର୍ତିଇଙ୍ଗ୍‌ ରେମୁଆଁଇଂ ନିଜର୍‌ ନ୍ତିବାନ୍‌ ଆଃରେ ବଆର୍‌କେ ଜିନିଷ୍‌କେ ମେଇଂ ସାର୍ଲମ୍ୟାଃକେ ।

9 ରେମୁଆଁଇଂ ଆଲ ଡିଙ୍ଗ୍‌ଆର୍‌ଏ ଆରି ମ୍ନା ରେମୁଆଁକେ ଡାଆଁ ଆଡିଙ୍ଗ୍ ଆର୍‌ଏ । ଆତେନ୍ ଆମେଇଂକେ କେମା ଆଡିଙ୍ଗ୍‌ଗେ ନାମ ।

10 ନା ସଦାପ୍ରବୁନେ ବୟଙ୍କାର୍‌ନେ ବପୁବାନ୍ ଆରି ମେଁନେ ମ୍ନା ମହିମାନେ ତାରାସ୍‌ବାନ୍, ମ୍ନା ବ୍ରିନିଆ ୱେଚେ ଦୁଲିନିଆ ନିଜ୍‌କେ ବୁଃଡ଼ି ।

11 ଗରବ୍‌ ରେମୁଆଁ ଆଙ୍କାର୍‌ ଆଡିଙ୍ଗ୍‌ ଣ୍ଡୁ । ଆତାନ୍‌ ଆଙ୍କାର୍‌ ରେମୁଆଁ ଗିଆସଚେ ବାଃଆ ଆଲ ଆଃଡିଙ୍ଗ୍‌ଆର୍‌ଏ । ମାତର୍‌ ଆତାନ୍‌ ବେଲା ମାପ୍‌ରୁନେ ଦିନ୍‌ ପାଙ୍ଗ୍‌ଏ ଆରି ମେଁ ଜିତେଏ ।

12 ଆତାନ୍‌ ଦିନ୍‌ ମାପ୍‌ରୁ ଆଙ୍କାର୍‌ ଆରି ଗରବ୍‌ ଆରି ମ୍ନାରେକେ ସାପାରେନେ ସାମ୍‌ନାରେ ସନ୍ୟାଦିପତି ସଦାପ୍ରବୁନେ ମୁଇଂ ଦିନ୍‌ ପାଙ୍ଗ୍‌ଏ । ଆତ୍‌ଅରିଆ ଆମେଇଂକେ ଡାଆଁ ଆଡିଙ୍ଗ୍ ଆର୍‌ଏ ।

13 ବାରି ଆତେନ୍ ଦିନା ଲିବାନୋନନେ ତିଆର୍ କଣ୍ଡା ଆରି ମ୍ନା ସାପା ଏରସ ସ୍ଲାଃ ସାମ୍‌ନା ଡିଙ୍ଗ୍‌ଆର୍‌ଏ ଆରି ବାଶନନେ ସାପା ଅଲୋନ ସ୍ଲାଃ ସାମ୍‌ନା ଡିଙ୍ଗ୍‌ଏ ।

14 ବାରି, ସାପା ତିଆର୍ କଣ୍ଡାନେ ସାମ୍‌ନାରେ ଆରି ସାପା ଚ୍ଲେ କଣ୍ଡାବାନ୍ ଚ୍ଲେଲେକ୍ନେ କଣ୍ଡାନେ ସାମ୍‌ନା ଡିଙ୍ଗ୍‌ଏ ।

15 ଆରି, ସାପା ତିଆର୍‌ ଡୁଆନେ ସାମ୍‌ନାରେ ଆରି ସାପା ଡାଟ୍‌ ଲେଃକ୍ନେ କୁଗ୍‌ଡାସାଃନେ ସାମ୍‌ନାରେ ।

16 ତର୍ଶୀଶ୍‌ନେ ସାପା ଜାହାଜ୍‌ନେ ସାମ୍‌ନାରେ ଆରି ସୁନ୍ଦର୍‌କ୍ନେ ସାପା ଜିନିସ୍‌ ଆଃରେଣ୍ଡ୍ରେନେ ବିରଦ୍‌ରେ ଡିଙ୍ଗ୍‌ଏ ।

17 ବାରି, ରେମୁଆଁନେ ଗର୍ବ ତୁବନିଆ ମିସେ ୱେଏ ଆରି ରେମୁଆଁଇଂନେ ରୁପ୍‌ ଡାଆଁ ଡିଙ୍ଗ୍‌ଏ । ଆରି ଆତେନ୍ ଦିନାକେଲା ସଦାପ୍ରବୁ ଆଃ ମ୍ନା ଡିଙ୍ଗ୍‌ଏ ।

18 ବାରି ସାପା ମୁର୍ତି ପୁରାପୁରି ବାବ୍‌ରେ ନସ୍‌ଟ ଡିଙ୍ଗ୍‌ୱେଏ ।

19 ଆତାନ୍‌ ବେଲା ରେମୁଆଁଇଂ ମାପ୍‌ରୁ ବାରି ମେଁନେ ମ୍ନା ବପୁ ଆରି ମହିମାନେ ତାରାସ୍‌ କେଚେ ବୁଟମେଗ୍‌ ଆର୍‌ଏ । ମାପ୍‌ରୁ ମଚ୍‌ପୁର୍‌କେ ଦେକ୍‌ରକମ୍‌ ଆଃକମ୍ପେଏ ଜେ, ରେମୁଆଁଇଂ ବୁଟମେଗ୍‌ଚେ କଣ୍ଡା ପ୍ଲଗ୍‌ନ୍ୟା ବାରି ମଚ୍‌ପୁର୍‌ନେ କୁରୁନ୍ୟା ବୁଃଡ଼ିଆର୍‌ଏ ।

20 ସଦାପ୍ରବୁ ମଚ୍‌ପୁର୍‌କେ ବୟଙ୍କାର୍ ଆଃକମ୍ପେନ୍‌ସା ତଃଡ଼୍ୟାଃଲା, ମେଁନେ ବୟଙ୍କାର୍‌ନେ ବପୁ ଆରି ମେଁନେ ମହିମାନେ ତାରାସ୍‌ବାନ୍ ତାଲେବିର୍‌ନେ କୁରୁବାନ୍ ଆରି ତାଲେବିର୍‌ନେ ଗଃକ୍ନେ କୁରୁନେ ଜାଗାନ୍ନିଆ ଗାନ୍‌ସା;

21 ଆତାନ୍‌ ବେଲା ରେମୁଆଁଇଂ ମେଇଂନେବାନ୍‌ ତିଆର୍‌ ଡିଙ୍ଗ୍‌କ୍ନେ ବାରି ପୁଜା ଡିଙ୍ଗ୍‌ମ୍ୟାକ୍ନେ ସୁନା ବାରି ରୁପାନେ ମୁର୍ତିଇଙ୍ଗ୍‌ ଜଗ୍‌ତ୍ଲାଗ୍‌ ଆର୍‌ଏ । ମେଇଂ ଆତାନ୍‌ ମୁର୍ତିଇଙ୍ଗ୍‌କେ ଗ୍‌ଡ଼ାଃ ବାରି ବାଦୁଡ଼ିଇଂନେ ସାମ୍‌ନାରେ ଜଗ୍‌ତ୍ଲାଗ୍‌ ବିଃଆର୍‌ଏ ।

22 ଆତେନ୍‌ସା ପେ ରେମୁଆଁନେ ଆସାରେ ଆଲେଗ୍‌ପା, ରେମୁଆଁନେ ପୁଣ୍ଡା ମେଁ ତୁମୁଆଃନ୍ନିଆ ଲେଃକେ, ମେଃଡାଗ୍‌ଲା ମେଁନେ ମେଃଡିଗ୍ ମୁଲ୍ୟ ଣ୍ଡୁ ।