1 ବାରି ଯିଶୀନେ ବୁନ୍ଦ୍‌ ବାନ୍‌ ମୁଇଂ କେନ୍ଦା ତାର୍‌ଏ ଆରି ମେଁନେ ବୁନ୍ଦ୍‌ବାନ୍ ମୁଇଂ କେନ୍ଦା ତାର୍‌ଚେ ଚୁ ଚୁଏ ।

2 ବାରି, ସଦାପ୍ରବୁନେ ଆତ୍ମା, ଗିଆନ୍‌ ଆରି ବାବେନେ ଆତ୍ମା, ଜଜ୍‌ନା ଡିଙ୍ଗ୍‌ନେ ଆତ୍ମା ଆରି ସକ୍‌ତିସାଲିନେ ଆତ୍ମା, ବୁଦି ଆରି ସଦାପ୍ରବୁ ବିସ‍ଏରେ ବୁଟନେ ଆତ୍ମା ମେଁ ଡାଗ୍ରା ପାଙ୍ଗ୍‌ଏ ।

3 ସଦାପ୍ରବୁନେ ବିସ‍ଏରେ ବୁଟଲା ମେଁନେ ସାର୍ଦା ଡିଂଏ । ବାରି, ମେଁ ମେଁନେ ମୁଆଃବାନ୍ କେନେ ଇସାବ୍‌ରେ ବିଚାର୍ ଆଡିଙ୍ଗ୍ ଣ୍ଡୁ, କି ମେଁ ନ୍ଲୁଗ୍‌ନିଆ ଅଁକ୍ନେ ଇସାବ୍‌ରେ ଆଦ୍ରିଗ୍ ଣ୍ଡୁ ।

4 ଆତେନ୍‌ ଦରମ୍‌ ବାରି ଚୁପ୍‌ଚାପ୍‌ ଲେଃଏ, ଉଡ଼ିବେଲା ଗରିବ୍‌ ବାରି ଆୟାକ୍ନେ ରେମୁଆଁଇଂ ବିଚାର୍‌ ଡିଙ୍ଗ୍‌ଆର୍‌ଏ । ମେଁ ଉଡ଼ିବେଲା ରେମୁଆଁଇଂକେ ଡଣ୍ଡ୍‌ ବିଃନ୍‌ସାଃ ବିଚାର୍‌ ଡିଙ୍ଗ୍‌ଏ, ଆତାନ୍‌ ବେଲା ମେଇଂ ଡଣ୍ଡ୍‌ ବାଆର୍‌ଏ । ବାରି ଉଡ଼ିବେଲା ଦୁସ୍‌ଟ ରେମୁଆଁଇଂକେ ବାଗୁଏଃ ନ୍‌ସା ଆଦେସ୍‌ ବିଃଏ, ଆତାନ୍‌ ବେଲା ମେଇଂ ଗୁଏଃ ଆର୍‌ଏ ।

5 ଦର୍ମ ମେଁନେ ନ୍‌ସାନିଆ ଗାଗ୍‌ବକ୍ନେ ଗ୍ନେଗ୍‌ସାଃ ରକମ୍ ଆରି ବିସ୍‌ବାସ୍ ମେଁନେ ଗ୍ରିନେ ଗୁଟି ରକମ୍ ଡିଙ୍ଗ୍‌ଏ ।

6 ବାରି, ନାକା ଏତେ ଉଂ ମେଣ୍ଡା ଏଃତେ ବାସା ଲେଃଏ ବାରି ଚିତାଙ୍କୁ ଉଂମିଃ ଏଃତେ ଡୁଲେଗ୍‌ଆର୍‌ଏ । ଉଂତ୍ୟା, ଙ୍ଗିରେ ସିଂଅଁ ବାରି ଗାଗ୍‌ଡ଼େକ୍ନେ ପସୁ ମୁଇଂଡାଗ୍ରା ଲେଃଏ । ବାରି ମୁଇଂ ଡାଆଁ ଗଡ଼େଅ ଆମେଇଂକେ ତୁର୍‌ତ୍ୟାଏ ।

7 ଅରେଃ ବାରି ଗିବେ ମୁଇଂଡାଗ୍ରା ସାନ୍ତିରେ ବାସା ଲେଃ । ମେଇଂନେ ଗଗିସିଆଃ ସାପା ମୁଇଂଡାଗ୍ରା ଡୁଲେଗ୍‌ଆର୍‌ଏ । ବାରି ସିଂଅଁ ଅରେଃ ରକମ୍‌ ପିଆଲ୍‌ ଚଙ୍ଗ୍‌ଏ ।

8 ବୁବଃ ଡିଗ୍‌ ଆଜାକେ ଆଗଗ୍‌ଟା ଣ୍ଡୁ । ମୁଇଂ ଗଡ଼େଅ ବିସ୍‌ ଲାଏଃକ୍ନେ ବୁବଃନେ ଡାଗ୍ରା ବ୍ଲୁଃଏ । ବାରି ଡିଗ୍‌ ଗଡ଼େଅ ମାବ୍‌ଟକୁଟା ବୁବଃ ପ୍ଲଗ୍‌ନ୍ୟା ନ୍ତି ଆଃଗାଏ ।

9 ମୁଡ଼ି ରେମୁଆଁ ବିନ୍‌ ମୁଇଂଜାକେ ଆବାଗୁଏଃ ଣ୍ଡୁ । ନେଙ୍ଗ୍‌ନେ ପବିତ୍ର କଣ୍ଡା ଡାଗ୍ରା ଜା ଡିଗ୍‌ ନସ୍‌ଟ ଆରାଡିଙ୍ଗ୍‌ କି ନାସ୍‌ ଆରାଡିଙ୍ଗ୍‌ ଆର୍‌ ରେମୁଆଁ କରାପ୍‌ ଚିନ୍ତା ଆଡିଙ୍ଗ୍‌ ଆର୍‌ ଣ୍ଡୁ । ଡାଗ୍ଲା ସଦାପ୍ରବୁନେ ବିସଏରେ ମେଇଂନେ ଜାବର୍‌ ଗିଆନ୍‌ ଡିଙ୍ଗ୍‌ଏ । କେଣ୍ଡିଆ ଡିରକମ୍‌ ଣ୍ଡିଆନ୍ୟା ବର୍ତି ମଚ୍‌ପୁର୍‌ ଦେତ୍‌ରକମ୍‌ ସଦାପ୍ରବୁନେ ବିସଏରେ ଜ୍ଞାନ୍‌ନ୍ୟା ବର୍ତି ଡିଙ୍ଗ୍‌ଏ ।

10 ଆତାନ୍‌ ଦିନା ଯିଶୀନେ ଡୁଆଣ୍ଡ୍ରେବାନ୍‌ ଆତ୍‌ଲା ମୁଇଂ ଜେଣ୍ଡା ସିଗ୍‌ଆର୍‌ଏ । ବିନ୍‌ ବିନ୍‌ ଦେସ୍‌ନେ ରେମୁଆଁଇଂ ଆମେକେ ତୁର୍‌ଆର୍‌ଏ । ଆତାନ୍‌ ଜାଗା ମେଇଂନେ ପୁଣ୍ଡେନେ ଜାଗା ଡିଙ୍ଗ୍‌ଏ ଆରି ମ‍ଇମା ଡିଙ୍ଗ୍‌ଏ ।

11 ଆତାନ୍‌ ଦିନା ନେଙ୍ଗ୍‌ନେ ମାପ୍‌ରୁ ବାର୍‌ମୁଇଂତର୍‌ ପାଙ୍ଗ୍‌ଏ ବାରି ବାକିରେକେ ରାଙ୍ଗ୍‌ୱେଏ । ଏନ୍‌ ଦିତିୟ ତର୍ ନିଜର୍‌ ନ୍ତି ଆଲମ୍ୱେଏ । ଏନ୍‌ ପର୍‌ମେସର୍‌ନେ ରେମୁଆଁଇଂ ଅଶୂରବାନ୍‌, ମିସର୍‌ବାନ୍ ଆରି ପଥ୍ରୋଷବାନ୍, କୂଶ୍‌ବାନ୍, ଏଲମ୍‌ବାନ୍, ଶିନୀୟରବାନ୍ ଆରି ହମାତବାନ୍ ଆରି କେଣ୍ଡିଆନେ କୁପ୍‌ଲିବାନ୍ ଆତାର୍ ଡୁଙ୍ଗ୍‌ପାଙ୍ଗ୍‌ଏ ।

12 ପର୍‌ମେସର୍‌ ଏନ୍‌ "ଜେଣ୍ଡା" ସାପା ଜାତି ନ୍‌ସା ଚିନା ରକମ୍‌ ବେବିଏ । ଇସ୍ରାଏଲ ବାରି ଯିହୁଦାନେ ଅଲ୍‌ଗା ଅଲ୍‌ଗା ଡିଙ୍ଗ୍‌ ଲାଏଃକ୍ନେ ରେମୁଆଁଇଂ ମୁଇଂଡାଗ୍ରା ଡିଙ୍ଗ୍‌ ଆର୍‌ଏ । ଜାଣ୍ଡେଇଂ ମଚ୍‌ପୁର୍‌ନେ ଚ୍ଲେ ବାରି ଅସାର୍‌ ଅଲ୍‌ଗା ଅଲ୍‌ଗା ଡିଙ୍ଗ୍‌ ଲେଃ ଆର୍‌କେ । ମାତ୍ରମ୍‌ ପର୍‌ମେସର୍‌ ଆତାନ୍‌ ସାପାକେ ମୁଇଂଡାଗ୍ରା ଆଡିଙ୍ଗ୍‌ଏ ।

13 ଆରି ଇଫ୍ରୟିମନେ ଇଂସା ଦୁର୍‌ ଡିଙ୍ଗ୍‌ଏ ଆରି ଯିହୁଦାକେ କସ୍‌ଟ ବିନେ ରେମୁଆଁଇଂ ଚିନ୍‌ ବିନ୍‌ ଡିଙ୍ଗ୍‌ ଆର୍‌ଏ । ଇଫ୍ରୟିମ ଯିହୁଦାକେ ଇର୍ସା ଆଡିଙ଼୍ଗ୍‌ ଣ୍ଡୁ ଆରି ଯିହୁଦା ଇଫ୍ରୟିମକେ ଦୁକ୍‌ ଆବିଃ ଣ୍ଡୁ ।

14 ବାରି ମେଇଂ ପଶ୍ଚିମ୍‌ ଦିଗ୍‌ପାକା ପଲେଷ୍ଟୀୟଇଂନେ କୁରୁକୁର୍ୟାଃ ଜାଗା ଆଡ଼ାତ୍ରା ପୁଏଆର୍‌ଏ । ମେଇଂ ମୁଇଂ ଡିଙ୍ଗ୍‌ଚେ ପୁରୁବ୍‌ ଦେସ୍‌ନେ ଗଡ଼େଇଂନେ ଜିନିସ୍‌ ଡଙ୍ଗା ଆର୍‌ଏ । ମେଇଂ ଇଦୋମ ଆରି ମୋୟାବ ଆଡ଼ାତ୍ରା ନ୍ତି ଆମିସୁ ଆର୍‌ଏ ଆରି ଅମ୍ମୋନ ଉଂଡେଇଂ ମେଙ୍ଗ୍‌ନେ ଆଦେସ୍‌ ମାନେଃଆର୍‌ଏ ।

15 ବାରି ସଦାପ୍ରବୁ ମିସ୍ରିୟ ଡାଗ୍ରା ଲେକ୍ନେ କେଣ୍ଡିଆନେ ଣ୍ଡିଆ ସାପାକେ ପୁରାପୁରି ବାବ୍‌ରେ ଆନ୍‌ସୁଆର୍‌ ବିଏ । ଆରି ମେଁନେ ଗରମ୍‌ ୱେଡ଼ିଆ ଏତେ ଲଣ୍ଡିଆ ଆଡ଼ାତ୍ରା ମେଁନେ ନ୍ତି ଆଃଜାର୍‌ଏ, ଆରି ଆମେକେ ବଗ୍‌ଚେ ଗୁକ୍ଲିଗ୍‌ ଜଲା ଆତାର୍‌ଏ ଆରି ରେମୁଆଁଇଂକେ ନ୍‌ସୁଆର୍‌କ୍ନେ ପାଦା ଗାଲି ବିଚେ ୱେନ୍‌ସା ଆଦେସ୍‌ ବିଏ ।

16 ବାରି, ଇସ୍ରାଏଲ୍‌ ମିସର୍‌ ଦେସ୍‌ବାନ୍‌ ତାର୍‌ଚେ ପାଙ୍ଗ୍‌ନେ ବେଲା ଯେନ୍ତିକି ମେଁ ସୁଗୁଆ ଡିଙ୍ଗ୍‌ଲେଗେ, ଦେତ୍‌ରକମ୍‌ ମେଁନେ ରେମୁଆଁଇଂନେ ବାକି ସାପାରେ ଆତ୍‌ଲା, ବା ଅଶୂର୍‌ ଦେସ୍‌ବାନ୍‌ ବାକି ସାପାରେ ଆତ୍‌ଲା ମୁଇଂ ଅସାର୍‌ ଗାଲି ଡିଙ୍ଗ୍‌ଏ ।