ଜିସାୟ 52

ଇସ୍‌ପର୍‌ ଯିରୂଶାଲମକେ ରକ୍ୟା ଡିଂଏ

1 ଅ ସିୟୋନ, ଉର୍‌, ଉର୍‌, ନିଜର୍‌ ବପୁ ବିଃ; ଅ ପବିତ୍ର ଇନି ଯିରୂଶାଲମ, ପେ ନିଜର୍‌ ସୁନ୍ଦର ସକାପାଟାଇ ସାପା ସଃ; ମେଃଡାଗ୍‌ଲା ଆକେନ୍‌ ବେଲାବାନ୍‌ ନା ବିତ୍ରେ ଅପବିତ୍ର କି ଅସୁଚି ରେମୁଆଁ ଆରି ଆପାଙ୍ଗ୍‌ ଣ୍ଡୁ । 2 ନା ନିଜର୍‌ ଗାଗ୍‌ଡ଼େନେ ଦୁଲି ତାଞ୍ଜୁର୍‌ ବିଃ; ଅ ଯିରୂଶାଲମ, ତଃଡ଼୍ୟାଃ, ସିଂହାସନ୍ ଡାଗ୍ରା କଲା; ଆଗୋ ସିୟୋନନେ ଜେଲ୍‌ଡୁଆନେ ସେଲାଇଂ, ନିଜର୍‌ ଲୁଗଃ ଗାଗ୍‌କ୍ନେ ସିକ୍‌ଲି ସାପା ତଃବିଃପା । 3 ମେଃଡାଗ୍‌ଲା ମାପ୍‌ରୁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ପେ ବିନା ଡାବୁରେ ବିକ୍ରି ଡିଂପେଲାଏଃଗେ, ଆରି ବିନା ଡାବୁରେ ଉଦାର୍‌ ପେଡିଂଏ । 4 ମେଃଡାଗ୍‌ଲା ମାପ୍‌ରୁ, ସଦାପ୍ରବୁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ନେନେ ରେମୁଆଁ ପର୍‌ତୁମ୍‌ ବାସାନ୍‌ସାଃ ମିସର୍‌ ୱେଆର୍‌କେ; ବାରି, ଅଶୂରୀୟ ସରାଃସରାଃ ମେଇଂ ଆଡ଼ାତ୍ରା କାରାପ୍‌ ବେବ‍ଆର୍‌ ଡିଂକେ । 5 ଏନ୍‌ସାଃ ମାପ୍‌ରୁ ବାସଙ୍ଗ୍‌ଡିଂକେ, ନେନେ ରେମୁଆଁଇଂକେ ତ ସରାଃସରାଃ ରାଙ୍ଗ୍‌ୱେଡିଂଆର୍‌କେ, ନେ ଆକ୍‌ଅରିଆ ଲେଃଚେ ମେଃ ଡିଂନେଡିଂକେ ? ମାପ୍‌ରୁ ବାସଙ୍ଗ୍‌ଡିଂକେ, ମେଇଂ ଆଡ଼ାତ୍ରା ସାସନ୍‌ ଡିଂଣ୍ଡ୍ରେ ଗର୍ଜେ ଡିଂଆର୍‌କେ ଆରି ନେନେ ମ୍ନି ସ୍ମିସୁରେଃସି କାଲାଆଃ ନିନ୍ଦା ଡିଂଆର୍‌ଡିଙ୍କେ । 6 ଆକେନ୍‌ସାଃ ନେନେ ରେମୁଆଁଇଂ ନେନେ ମ୍ନି ମ୍ୟାଃଆର୍‌ଏ; ଆକେନ୍‌ସାଃ ଜା ସାମୁଆଁ ବାସଙ୍ଗ୍‌ଡିଂକେ, ମେଁ ଜେ ନିଂ, ଆକେନ୍‌ ମେଇଂ ଆତେନ୍‌ କାଲା ମ୍ୟାଃଆର୍‌ଏ; କେଲା, ଆତେନ୍‌ ନେଙ୍ଗ୍‌ । 7 ମୁଃଡ଼ି ରେମୁଆଁ ସୁସମାଚାର୍‌ ରାଙ୍ଗ୍‌ପାଙ୍ଗ୍‌ଡିଂକେ, ଜା ସାନ୍ତିନେ ସାମୁଆଁ ବାସଙ୍ଗ୍‌ଡିଂକେ, ଜା ମଙ୍ଗଲ୍‌ନେ ସୁସମାଚାର୍‌ ରାଙ୍ଗ୍‌ଫାଙ୍ଗ୍‌ଡିଂକେ, ଜା ଉଦାର୍‌ ସାମୁଆଁ ବାସଙ୍ଗ୍‌ଡିଂକେ, ଜା ସିୟୋନକେ ନାନେ ପର୍‌ମେସର୍‌ ରାଜ୍ୟ ଆଃଡିଂଏ ଡାଗ୍‌ଚେଃ ବାସଙ୍ଗ୍‌ଡିଂକେ, ମେଁନେ ଞ୍ଚ କଣ୍ଡାଇଂ ଆଡ଼ାତ୍ରା ଉଃଡ଼ି ସବା ତ୍ନାଏ ! 8 ଆକେନ୍‌, ପେନେ ଡୁଆ ଉର୍‌ଣ୍ଡ୍ରେନେ ବାଃଲିର୍‌ବାତାନେ ସାମୁଆଁ ! ମେଇଂ ଜାବର୍‌ ୱାସାର୍‌ଚେଃ ବାଃଲିର୍‌ବାତା ଡିଂଆର୍‌ଡିଂକେ, ମେଇଂ ମୁଇଂଅରିଆ ଅସ୍‌ମାର୍‌ ସାର୍‌ଡିଂଆର୍‌କେ; ମେଃଡାଗ୍‌ଲା ମାପ୍‌ରୁ ସିୟୋନ‍ଅରିଆ ଆଣ୍ଡେନେ ବେଲା ମେଇଂ ସାମ୍‌ନାସାମ୍‌ନି ଡିଂଚେଃ କେଆର୍‌ଏ । 9 ଅ ଯିରୂଶାଲମନେ ଗନ୍ଦା ଗନ୍ଦା ଡିଙ୍ଗ୍‌ଲାଏକ୍ନେ ଜାଗା ସାପା, ଜାବର୍‌ ସାର୍ଦା ଡିଂପା, ମୁଇଂଅରିଆ ସାର୍‌ପା; ମେଃଡାଗ୍‌ଲା ମାପ୍‌ରୁ ନିଜର୍‌ ରେମୁଆଁଇଂକେ ସାନ୍ତି ଆଃଡିଂବକେ, ମେଁ ଯିରୂଶାଲମକେ ଉଦାର୍‌ ଆଃଡିଂବକେ । 10 ମାପ୍‌ରୁ ସାପା ଦେସ୍‌ନେ ରେମୁଆଁଇଂଅରିଆ ନିଜର୍‌ ପବିତ୍ର ନ୍ତି ଟେକେ ବକେ ଆରି ମଞ୍ଚ୍‌ପୁର୍‌ନେ ଅଃସେବାନ୍‌ ସାରାସାରି ଜାକ ଲେଃଣ୍ଡ୍ରେ ସାପାରେ ନେନେ ପର୍‌ମେସର୍‌ନେ ଉଦାର୍‌ କେଆର୍‌ଏ । 11 ପେ ତାର୍ଲାପା, ତାର୍ଲାପା, ଆତେନ୍‌ ଜାଗାବାନ୍‌ ତାର୍‌ୱେଲାପା, ମେଃଡିଗ୍‌ ଅସୁଚି ଜିନିସ୍‌କେ ଆଲିଗ୍‌ଗେପା; ପେ ମେଁବାନ୍‌ ତାର୍‌ୱେଲାପା; ଅ ମାପ୍‌ରୁନେ ମନ୍ଦିର୍‌ନିଆ ଣ୍ଡିଆଃ ଉଗ୍‌ନେ ମୁତା ଡୁଙ୍ଗ୍‌ଣ୍ଡ୍ରେ, ପେ ପବିତ୍ର ଡିଂପା । 12 ମେଃଡାଗ୍‌ଲା ପେ ତର୍‌ତର୍‌ ଡିଂଚେଃ ତାର୍‌ ପେୱେ ଣ୍ଡୁ, କି ପେ ଡଚେଃ ତାର୍‌ ପେୱେ ଣ୍ଡୁ; ମେଃଡାଗ୍‌ଲା ମାପ୍‌ରୁ ପେନେ ସିସେ ସିସେ ଅଲେଙ୍ଗ୍‌ଏ ଆରି ଇସ୍ରାଏଲ୍‌ନେ ପର୍‌ମେସର୍‌ ପେନେ ପ୍ଲାଃ ଲେଃଏ ।

ଦୁକ୍‌ କସ୍‌ଟ ବାଡିଂକ୍ନେ ସଦାପ୍ରବୁନେ ଦାସ

13 କେଲା, ନେନେ ଦାସ ନିମାଣ୍ଡାଃ ଚିନ୍ତା ଡିଂଚେ ବେବ‍ଆର୍‌ ଡିଂଏ, ମେଁ ମ୍ନାଃ ଡିଙ୍ଗ୍ଏ, ମ୍ନାଃ ପଦ୍‌ ବାଏ ଆରି ବେସି ବାନ୍‌ ବେସି ମ୍ନା ଡିଙ୍ଗ୍‌ଏ ଡିଂଏ । 14 ରେମୁଆଁ ବାନ୍‌ ମେଁନେ ଆକାର୍‌ ଆରି ରେମୁଆଁ ଜାତି ବାନ୍‌ ମେଁନେ ରୁପ୍‌ ଅଦିକ୍‌ ରୁପ୍‌ ଡିଙ୍ଗ୍‌ୱେଲେଃଲା ଡିରକମ୍‌ ଗୁଲୁଏରେ ମେଁନେ ବିସ‍ଏରେ ଇରିୟାଃତୁଗ୍‌ ଲେଃଆର୍‌ଗେ, 15 ଦେତ୍‌ରକମ୍‌ ମେଁ ଗୁଲୁଏ ଦେସ୍‌ନେ ରେମୁଆଁଇଂକେ ପବିତ୍ର ଆଡିଙ୍ଗ୍‌ଏ; ଇଃସାଙ୍ଗ୍‌ଇଂ ମେଁ ଡାଗ୍ରା ନିଜର୍‌ ନିଜର୍‌ ତୁମୁଁଆଃ ବନ୍ଦ୍‌ ଆଃଡିଂଏ; ମେଃଡାଗ୍‌ଲା ମେଃନେ ଆମେଇଂକେ ମାବାସଙ୍ଗ୍‌ବ୍ନ, ଆତେନ୍‌ ମେଇଂ କେଆର୍‌ଏ ଆରି ମେଃନେ ମେଇଂ ଦ୍ରିଗ୍‌ ଆଲେଃଆର୍‌ଗେ, ଆତେନ୍‌ ମେଇଂ ବୁଜେଆର୍‌ଏ ।