1 ଅ କେଣ୍ଡିଆଃ ବିତ୍ରେ ଲେକ୍ନେ କୁପ୍‌ଲି ଇଂ, ନିଂ ସାମୁଆଁ ଦ୍ରିଗ୍‌ପା; ଅ ସ୍ଲ ବାସା ଲାଏଃଆର୍‌କ୍ନେ ରେମୁଆଁଇଂ, ଦିଆନ୍‌ ବିଃପା; ନିଂ ଗାଗ୍‌ଡ଼େ ଆଃବାନେ ବେଲାବାନ୍‌ ମାପ୍‌ରୁ ଆନିଂକେ ୱାବକେ; ନିଂ ଇୟାଙ୍ଗ୍‌ନେ ସୁଲୁଏଃବାନ୍‌ ଜନମ୍‌ ଡିଂନେ ବେଲାବାନ୍‌ ମେଁ ନିଂନେ ମ୍ନି ଗୁଆର୍‌ବକେ; 2 ବାରି, ମେଁ ନିଂନେ ତୁମୁଁଆଃ ଡିଗ୍‌କ୍ନେ କାଣ୍ଡା ରକମ୍‌ ଆଃଡିଂବକେ, ନିଜର୍‌ ନ୍ତିନେ ନ୍ଲୁଡ଼୍ୟାଃଅରିଆ ମେଁ ଆନିଂକେ ବୁଃଡ଼ିବକେ ଆରି ମେଁ ଆନିଂ ଦାର୍‌ ଙାଁ ରକମ୍‌ ଆଃଡିଂଚେ ନିଜର୍‌ ଙାଁ ବନେ ଜାଗା ଅରିଆ ଡିଡାଚେଃ ବକେ; 3 ବାରି, ମେଁ ଆନିଂକେ ବାସଙ୍ଗ୍‌କେ, ନାଁ ନେନେ ଦାସ; ନାଁ ଇସ୍ରାଏଲ୍‌, ନାଁ ବାନ୍‌ ନେ ମହିମା ନେବାଏ । 4 ମାତର୍‌ ନିଂ ମ୍ବାସଙ୍ଗ୍‌କେ, ନିଂ ସରାଃ କସ୍‌ଟ ଡିଂଣ୍ଡିଂକେ, ନିଂ ଅର୍ତ ଣ୍ଡୁନେ ଆରି ବେକାର୍‌ ନିଂନେ ବପୁ ଆଃଡା ମ୍ୱକେ; ଏଲେଡିଗ୍‌ ଡିଲାଡିଗ୍‌ ନିଂନେ ବିଚାର୍‌ ମାପ୍‌ରୁ ଡାଗ୍ରା ଆରି ନିଂନେ କାମ୍‌ନେ ଇସାବ୍‌ ନିଂନେ ପର୍‌ମେସର୍‌ ଡାଗ୍ରା ଲାଏଃକେ । 5 ବାରି, ଆନିଂକେ ମେଁନେ ସେବକ ଡିଂନ୍‌ସାଃ ଆରି ଯାକୁବକେ ମେଁ ଡାଗ୍ରା ଡୁଙ୍ଗ୍‌ପାଙ୍ଗ୍‌ ନ୍‌ସାଃ ଆରି ଇସ୍ରାଏଲ୍‌ ମେଁନେ ଡାଗ୍ରା ରିସିଂ ନ୍‌ସାଃ ଜା ଆନିଂକେ ଗର୍ବେବାନ୍‌ ଆଃରେକେ, ଆତେନ୍‌ ମାପ୍‌ରୁ ଏବେ ବାସଙ୍ଗ୍‌ଡିଂକେ; ମେଃଡାଗ୍‌ଲା ନିଂ ମାପ୍‌ରୁନେ ମ୍‌ମୁଁଆଃଅରିଆ ଆଲାଦ୍‌ ଡିଂକ୍ନେ ଗଡ଼େଅ ରକମ୍‌ ଆରି ନିଂନେ ପର୍‌ମେସର୍‌ ନିଂନେ ବପୁ ରକମ୍‌ ଡିଂଲାଏଃକେ; 6 ଏନ୍‌ସାଃ ମେଁ ବାସଙ୍ଗ୍‌ଡିଂକେ, ନାଁ ଜେ ଯାକୁବନେ କୁଟୁମ୍‌ ରେମୁଆଁକେ ଆଃମ୍ବ୍ର ନ୍‌ସାଃ ଆରି ଇସ୍ରାଏଲ୍‌ନେ ବନ୍ଦି ରେମୁଆଁଇଂକେ ବାର୍‌ମୁଇଂତର୍‌ ଡୁଙ୍ଗ୍‌ପାଙ୍ଗ୍‌ ନ୍‌ସାଃ ନେନେ ସେବକ ନାଡିଂଏ, ଆକେନ୍‌ ବେସି ଡାଆଁ ସାମୁଆଁ; ନାଁ ମଚ୍‌ପୁର୍‌ନେ ଗିର୍‌ ଜାକ ଡିରକମ୍‌ ନେ ଡିଂନେବକ୍ନେ ଉଦାର୍‌ ରକମ୍‌ ଡିଂଏ, ଆକେନ୍‌ସାଃ ନେ ଆନାକେ ବିନ୍‌ ଦେସ୍‌ନେ ରେମୁଆଁଇଂନେ ତାର୍କିଗ୍‌ ରକମ୍‌ ନେରାଃଡିଂଏ । 7 ଆଜାକେ ରେମୁଆଁ ଅମାନି ଡିଂଆର୍‌ଏ, ଆଜାକେ ନିଜର୍‌ ଦେସ୍‌ନେ ରେମୁଆଁଇଂ ଗୁର୍ନା ଡିଂଆର୍‌ଏ, ଜା ଇଃସାଙ୍ଗ୍‌ଇଂନେ ଦାସ, ଆମେକେ ଇସ୍ରାଏଲ୍‌ନେ ରକ୍ୟା ଡିଂଣ୍ଡ୍ରେ ଆରି ମେଁନେ ପବିତ୍ର ମାପ୍‌ରୁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ବିସ୍‌ବାସ୍‌ ବକ୍ନେ ଆରି ଇସ୍ରାଏଲ୍‌ନେ ପବିତ୍ର ଇସ୍‌ପର୍‌ ଆଣ୍ଡିନେ ମାପ୍‌ରୁ ଆନାକେ ସ୍ରିବକେ, ମେଁ ନ୍‌ସାଃ ଇଃସାଙ୍ଗ୍‌ଇଂ ଆନାକେ କେଆର୍‌ଲା ତଃଡ଼୍ୟାଃଆର୍‌ଏ; ନେତାଇଂ ଆନାକେ ସାର୍ଲ‍ଆର୍‌ଏ ।

8 ମାପ୍‌ରୁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ନେ ଇକ୍‌ଚା ଡିଂନେ ବେଲା ଆନାକେ ଉତର୍‌ ବିଃନେବକେ ଆରି ଉଦାର୍‌ ଦିନ୍‌କେଲା ନେ ଆନାକେ ସାଆଜ୍ୟ ଡିଂନେବକେ; ବାରି, ନେ ଆନାକେ ରକ୍ୟା ନେଡିଂଏ ଆରି ଦେସ୍‌ନେ ଉନ୍ନତି ଡିଂନ୍‌ସାଃ, ରେମୁଆଁଇଂକେ ମେଇଂନେ ବିନାସ୍‌ ଡିଂଲାଏଃକ୍ନେ ଜାଗାଅରିଆ ସାକାର୍‌ ଆଃଡିଙ୍ଗ୍‌ସା ନେ ଆନାକେ ରେମୁଆଁଇଂନେ ନିଅମ୍‌ ବିଃଣ୍ଡ୍ରେ ରକମ୍‌ ନେସ୍ରିଏ; 9 ନାଁ ବନ୍ଦି‍ଇଂକେ ତାର୍‌ୱେଲାପା ଡାଗ୍‌ଚେଃ ନାବାସଙ୍ଗ୍‌ଏ, ତାଙ୍ଗ୍‌କିଗ୍‌ଅରିଆ ବାସା ଲାଏଃଆର୍‌କ୍ନେ ରେମୁଆଁକେ ମୁଇଂଡା ଆର୍‌ମୁଇଂଡାକେ ଆଃସୁଏଃପା ଡାଗ୍‌ଚେଃ ନାବାସଙ୍ଗ୍‌ଏ । ମେଇଂ ଗାଲିଅରିଆ ଚଙ୍ଗାଃଆର୍‌ଏ ଆରି ସ୍ଲାଃପାଃଡ଼ୁ ଆଲେଃକ୍ନେ ତିଆର୍‌ ଜାଗା ସାପା ମେଇଂନେ ବାସାନେ ଚଙ୍ଗାଃନେ ଜାଗା ଡିଂଏ । 10 ଆମେଇଂକେ କିଡ଼େସଃ କି ଉଗ୍‌ଡ୍ୟାଃ ଆଡ ଣ୍ଡୁ; କି ନ୍ନାଃସେଙ୍ଗ୍‌ କି ସ୍ନିନେ ଗରମ୍‌ ଆମେଇଂକେ ଆନ୍ନାଃ ଣ୍ଡୁ; ମେଃଡାଗ୍‌ଲା ଜା ଆମେଇଂକେ ଦୟା ଡିଂଆର୍‌ଡିଂକେ, ମେଁ ଆମେଇଂକେ ବିଃଚଙ୍ଗ୍‌ଏ, କେଣ୍ଡିଆ ଆଡ଼ା ଆଡ଼ା ବିଃଚେ ମେଁ ଆମେଇଂକେ ୱାରାଙ୍ଗ୍‌ୱେଏ । 11 ବାରି, ନେ ନିଜର୍‌ କଣ୍ଡା ସାପାକେ ମୁଇଂ ଗାଲି ନେରାଃଡିଂଏ ଆରି ନେନେ ଅସାର୍ ଗାଲି ସାପା ତିଆର୍‌ ନେରାଃଡିଂଏ । 12 କେଲା, ଆକ୍‌ମେଇଂ ସ୍ଲବାନ୍‌ ପାଙ୍ଗ୍‌ଆର୍‌ଏ; ଆରି କେଲା, ଆକ୍‌ମେଇଂ ଉତର୍‌ ପଶ୍ଚିମ୍‌ ଗାଲିବାନ୍‌ ପାଙ୍ଗ୍‌ଆର୍‌ଏ; ବାରି, ଆକ୍‌ମେଇଂ ସୀନୀମ୍‌ ଦେସ୍‌ବାନ୍‌ ପାଙ୍ଗ୍‌ଆର୍‌ଏ । 13 ଅ କିତଙ୍ଗ୍‌ଇନି, ଅସ୍‌ମାର୍‌ ସାର୍‌ପା; ଅ ମଚ୍‌ପୁର୍‌, ସାର୍ଦା ଡିଂପା; ଅ କଣ୍ଡାଇଂ, ୱାସାର୍‌ଚେଃ ଅସ୍‌ମାର୍‌ ସାର୍‌ପା; ମେଃଡାଗ୍‌ଲା ମାପ୍‌ରୁ ନିଜର୍‌ ରେମୁଆଁଇଂକେ ସାନ୍ତି ଆଃଡିଂବକେ ଆରି ମେଁନେ କସ୍‌ଟ ରେମୁଆଁଇଂକେ ଦୟା ଡିଂଏ । 14 ମାତର୍‌ ସିୟୋନ ବାସଙ୍ଗ୍‌କେ, ମାପ୍‌ରୁ ଆନିଂକେ ଆନ୍ତାର୍‌ ବିଃବକେ, ମାପ୍‌ରୁ ଆନିଂକେ ଆବଃବିଃବକେ । 15 ସେଲାମ୍ବୁଏଃ ନିଜର୍‌ ଗର୍ବେବାନ୍‌ ଜନମ୍‌ ଡିଂକ୍ନେ ଗଡ଼େଅକେ ଆଲାଦ୍‌ ମାଡିଂଚେଃ କି ନିଜର୍‌ ତ୍ରାଃଡ଼୍ୟାଃ ବୁଃନେ ଗଡ଼େଅକେ ଆବଃ ୟାଏ ? ହାଁ, ଆକ୍‌ମେଇଂ ଆବଃ ୟାଆର୍‌ଏ, ଏଲେଡିଗ୍‌ ନେ ଆନାକେ ନେଆବଃ ଣ୍ଡୁ । 16 କେଲା, ନେ ନିଜର୍‌ ମ୍ବାକ୍ଲିଗ୍‌ ନ୍ତିନେ ନ୍ତିଅରିଆ ପେନେ ଆକାର୍‌ ଗୁଆର୍‌ନେବକେ; ପେନେ କୁଗ୍‌ଡାସା କାଲାଆଃ ନେ ସେଃମଁ ଲାଏକେ । 17 ପେନେ ଗଡ଼େଇଂ ଦାପ୍ରେ ପାଙ୍ଗ୍‌ଡିଂଆର୍‌କେ, ଆପେକେ ବିନାସ୍‌ ଆଃଡିଂଣ୍ଡ୍ରେ ଆରି ଜାଣ୍ଡେଇଂ ଆପେକେ ଉଜାଡ଼େ ଆର୍‌କେ, ମେଇଂ ପେ ବିତ୍ରେବାନ୍‌ ତାର୍‌ ୱେଆର୍‌ଏ । 18 ପେ ମ୍‌ମୁଁଆଃ ମେଲେଚେଃ ଚାର୍‌ବେଡ଼୍‌ତି କେଲା; ଏନ୍‌ ସାପାରେ ମୁଇଂଅରିଆ ରିସିଙ୍ଗ୍‌ଚେଃ ନା ଡାଗ୍ରା ପାଙ୍ଗ୍‌ଡିଂଆର୍‌କେ । ମାପ୍‌ରୁ ବାସଙ୍ଗ୍‌ଡିଂକେ, ନେ ମ୍ବ୍ରନେଲାଏଃକ୍ନେ ପର୍‌ମାନ୍‌ ନ୍‌ସାଃ ନା ବାଆଃ ସାଜ ରକମ୍‌ ଆକେନ୍‌ ସାପାକେ ନାସଃଏ, ବାରି ସେଲାମ୍ବଃଅ ତାଙ୍ଗ୍‌ନେ ସାଜ ସଜା ରକମ୍‌ ଆମେଇଂକେ ଆଃତାଂଏ । 19 ମେଃଡାଗ୍‌ଲା ଡିଲାଡିଗ୍‌ ଏବେ ନା, ନାଁନେ ଉଜାଡ଼େ ବକ୍ନେ ଜାଗା ଆରି କାଲି ଜାଗା ସାପା ଆରି ପେନେ ନସ୍‌ଟ ଡିଙ୍ଗ୍‌ଲେକ୍ନେ ଦେସ୍‌, ବାସାଣ୍ଡ୍ରେ ନ୍‌ସାଃ ସରୁ ଡିଂଏ ଆରି ଆନାକେ ବାଗୁଏଃଣ୍ଡ୍ରେ ସ୍ଲ ଲେଃଆର୍‌ଏ । 20 ପେ ବାନ୍ ରାଙ୍ଗ୍‌ୱେବକ୍ନେ ଗଡ଼େଇଂ ବାର୍‌ମୁଇଂତର୍‌ ପେନେ ନ୍ଲୁଗ୍‌ଅରିଆ ବାସଙ୍ଗ୍‌ଆର୍‌ଏ, ନିଂ ନ୍‌ସାଃ ଆକେନ୍‌ ଜାଗା ମାଲେ ଚିପା; ଆନିଂକେ ଜାଗା ବିଃଲା, ନିଂ ମ୍ବାସାଏ । 21 ଅଃତେନ୍‌ବେଲା ପେ ମନେ ମନେ ପେବାସଙ୍ଗ୍‌ଏ, ନିଂନେ ଗଡ଼େଇଂକେ ସୁଲ ରାଙ୍ଗ୍‌ୱେ ବଃ ଆର୍‌କେ, ନିଂ ମୁଇଂଜା, ବନ୍ଦି ଡିଙ୍ଗ୍‌ଚେ ଆଙ୍କ୍‌ଆନ୍ତ୍‌ ଅଲେଙ୍ଗ୍‌ଣ୍ଡିଂକେ, ନିଂନେ ଆକେନ୍‌ ସାପାରେକେ ଜା ଜନମ୍‌ ବିଃବକେ ? ଆରି ଆକ୍‌ମେଇଂକେ ଜା ଜତନ୍‌ ଡିଂବକେ ? କେଲା, ନେଙ୍ଗ୍‌ ମୁଇଂଜା ଆଃ ବାକି ନ୍ଲେଃଗେ; ଆକ୍‌ମେଇଂ ଆଣ୍ଡିଅରିଆ ଲେଃଆର୍‌ଗେ ? 22 ମାପ୍‌ରୁ, ସଦାପ୍ରବୁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, କେଲା, ନେ ବିନ୍‌ ଦେସ୍‌ଣ୍ଡ୍ରେଇଂ ଆଡ଼ାତ୍ରା ନିଜର୍‌ ନ୍ତି ନେଲିଙ୍ଗ୍‌ଏ ଆରି ସାପା ଜାତି ଆଡ଼ାତ୍ରା ନିଜର୍‌ ଜେଣ୍ଡା ନେଲିଙ୍ଗ୍‌ଏ; ତେଲା ମେଇଂ ପେନେ ଗଡ଼େଇଂକେ ବୁଲୁଅରିଆ କଃଆର୍‌ଏ ଆରି ପେନେ ସେଲାଇଂକେ ମେଇଂନେ ଜେବା‍ଅରିଆ ଆଃକଚେ ଡୁଙ୍ଗ୍‌ଆର୍‌ଏ । 23 ବାରି, ଇଃସାଙ୍ଗ୍‌ଇଂ ପେନେ ଜତନ୍‌ ଡିଂନେ ଆବା ଆରି ମେଇଂନେ ଇଃସାଙ୍ଗ୍‌ବୁଏଃଇଂ ପେନେ ଜତନ୍‌ ଡିଂନେ ଇୟାଙ୍ଗ୍‌ ଡିଂଆର୍‌ଏ; ମେଇଂ ଦର୍‌ତନି ନିଆ ସାର୍ମୁଆଃ ଆଲ ଆଃଡିଂଚେ ଆନାକେ ସାର୍ଲ‍ଆର୍‌ଏ ଆରି ନାନେ ଞ୍ଚନେ ଦୁଲି ଚାଲିଃଆର୍‌ଏ; ତେଲା ନେ ଜେ ମାପ୍‌ରୁ ଆରି ନେନେ ଉର୍‌ଣ୍ଡ୍ରେଇଂ ଜେ ଗିଆସଃ ଆଡିଂଆର୍‌ଣ୍ଡୁ, ଆକେନ୍‌ ପେ ପେମ୍ୟାଃଏ । 24 ବିରବାରଇଂନେ ଡଙ୍ଗାକ୍ନେ ଜିନିସ୍‌ ରାଃୟାଡିଂଏ, କି ନିୟାଇରେ ବନ୍ଦି ରେମୁଆଁଇଂ କି ରକ୍ୟା ଆଃଡିଂୟାଡିଂଏ ? 25 ମାତର୍‌ ମାପ୍‌ରୁ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ବିରବାରଇଂ ବନ୍ଦି ଡିଙ୍ଗ୍‌ଲେକ୍ନେ ରେମୁଆଁଇଂକେ ଆଃ ଟେକେ ରାଙ୍ଗ୍‌ଡ ଆର୍‌ଏ ଆରି ବୟାଙ୍କାର୍‌ ରେମୁଆଁନେ ଡଙ୍ଗାବ୍ନ ଜିନିସ୍‌ ରକ୍ୟା ଆଃଡିଂଡିଂଏ; ମେଃଡାଗ୍‌ଲା ନାନେ ବିରଦ୍‌ଡିଂଣ୍ଡ୍ରେନେ ଏଃତେ ନେ ବିରଦ୍‌ ନେଡିଂଏ ଆରି ପେନେ ଗଡ଼େଇଂକେ ନେ ରକ୍ୟା ନେଡିଂଏ । 26 ବାରି, ନେ ନାନେ କାରାପ୍‌ ବେବ‍ଆର୍‌ ଡିଂଣ୍ଡ୍ରେକେ ମେଇଂନେ ନିଜର୍‌ ଚିଲି ନେରାଃଚଙ୍ଗ୍‌ଏ ଆରି ମ୍ବ୍ରେ ଅଙ୍ଗୁର୍‌ ରସ୍‌ ଏଃତେ ବୁସାଃକେ ରକମ୍‌ ମେଇଂ ନିଜର୍‌ ମ୍‌ମ୍ୟାଁ ଏଃତେ ବୁସାଃଆର୍‌ଏ; ତେଲା ନିଜେ ମାପ୍‌ରୁ, ପେନେ ରକ୍ୟା ଡିଂଣ୍ଡ୍ରେ ଆରି ପେନେ ପାପ୍‌ବାନ୍‌ ରକ୍ୟା ଡିଂଣ୍ଡ୍ରେ, ଯାକୁବନେ ବପୁ ବିଃଣ୍ଡ୍ରେ, ଆକେନ୍‌ ସାପା ପ୍ରାନି ମ୍ୟାଃଆର୍‌ଏ ।